Bakasininkizia bakue Yehova, bali bakindika ma buteeko, ni bintu bilangiliile kyalo kyabo. Twinikile nangue, bantu bange bali ni uuru wa kusaakula kulapa eevi batwalilile kuya bali ba kisinka ku kyalo kyabo, kulumbania drapo ao kwimba lwimbo lwa kukindika kyalo.

 Anzia evio, fwefue Bakasininkizia Bakue Yehova, tupinguile nangue te tupalile kukitako bintu bya evio, paantu tuzumiine nangue te bipateene ni masambilizio ali mu Bibilia. Tuli twatona saana kine bantu bange bakindika bintu bituzumiine nga eveliasie fwefue vituli twakindika bintu bizumiine bange beelia bipuseene ni byetu.

Bintu bilandilue mu leeli lyasi

•  Ni Masambilizio ki Ali mu Bibilia Ali Alengia Tukite Evio?

•  Ale Kine Sheria Yatupatikizia Tukite Bebio Bintu?

•  Eba, Bakasininkizia Bakue Yehova Bali Bakwasiako ku Bikundi bya Bantu ao ku Bintu bya Politike?

 Aza masambilizio abili akata afumine mu Bibilia, ali atukwasia mu bupinguzi bwetu:

•   Tupalile kumupupa Leeza sie bunke. Bibilia ili yalanda eevi: “Pupa Mulopue Leeza obe ni kumubombela ye bunke.” (Luka 4:8, Le Nouveau Testament en langue Kitaabua) Lingi, bilapo bya muntu kusiala wali wa kisinka, pamo ni nghimbo ya byalo, bili byasaanguamo milandu ilangiliile nangue muntu apalile kwipeela saana palua kyalo kyakue kuliko vyali waipeela ku bintu binge byonse. I kili kyalengia Bakasininkizia Bakue Yehova bakaana kukitako bebio bintu bakeeza kwinoona zamiri yabo.

   Bakasininkizia Bakue Yehova ni beene, bali batontonkania nangue kulumbania drapo kulisie namuna imo ni kukita lupupo, ao kupupa mikisi, bintu beelia bikaaniizie Bibilia. (1 Bakorinto 10:14) Bantu bange basambiliile istoria, bali balanda nangue ma drapo ni ene, ni tulangi twa diini. Carlton J. H. Hayes, muntu umo asambiliile istoria, waaleembele eevi: “Kutona saana kyalo kupaleenesie ni kanisa, ni mu kaako kanisa drapo, i kalangi kabili kintu kya mana saana kilimo kili kyapupua saana.” Daniel P. Mannix, waalandile eevi palua Bakristu ba ku ntendeko: “Bakristu, baakeene kumukitila zabiu kateeka wa ku [Roma] kintu kipaleene leenu ni kukaana kulumbania Drapo.”

  Atasie kine nangue fwefue Bakasininkizia Bakue Yehova tetwizi kulumbania drapo, tetwizi kuizyelekania, tetwizi kuizizia, aosie kwandua kukindika drapo ao tulangi tunge twa mu kyalo.

•   Bantu bonse balingheene ntaanzi yakue Leeza. (Miilo ya Batumua 10:34, 35) Bibilia ili yalanda nangue Leeza “waakitile ntundu yonse ni kuiteeka pa kyalo.” (Miilo ya Batumua 17:26, Le Nouveau Testament en langue Kitaabua) I kili kyalengia Bakasininkizia Bakue Yehova bazumine nangue, te buino kukindika kikundi kimo kya bantu ao kyalo kimo kuliko binge. Tuli twakindika bantu bonse, atasie kine bafumine pi ao bali baikala pi.​—1 Petro 2:17.

 Bakasininkizia Bakue Yehova, tebeezi kupinga buteeko. Tuzumine nangue, buteeko ni seemu ya mupaango wakue Leeza, kabili weene, i apeele nsaambu buteeko buye bwalipo. (Baroma 13:1-7) Kabili tuzumiine nangue, Bakristu bapalile kunakila buteeko.​—Luka 20:25.

 Ale kine sheria ya buteeko yapingana ni sheria yakue Leeza? Mu aali fulani, kunti yakitika kuloomba buteeko bwalululeko sheria. a Inzi, kine te baaluluile, Bakasininkizia Bakue Yehova bali bapingula bali ni mukinzi ‘kumunakila Leeza, bantu abe.’​—Miilo ya Batumua 5:29, Le Nouveau Testament en langue Kitaabua.

 Bila. Bakasininkizia Bakue Yehova, tebeezi bakwasiako ku bikundi bya bantu ao ku bintu bya politike. Lutuli twakaana kukita kilapo, kulumbania drapo, ao kwimba lwimbo lwa kulumbania kyalo, tetwizi kukita evio juu ya kulangilila nangue twapinga buteeko. Inzi, palua bebio bintu, fwefue tuli twapingula kukita evio, paantu tukoonkele bintu bituzumiine bilandilue mu Bibilia.