Tuli twamona nangue bantu bengi bali mbeela mu kanisa, bali batona kulanziana maasi ali mu Bibilia. Kakiine, tuli twakindika nsaambu ya muntu ya kuya wakoonkele bintu byazumiine beelia bipuseene ni bituzumiine. Kabili, tetwizi kubapatikizia bange batuilizie mpunda yeetu.

 Lutuli twalanziana bintu bya diini, tuli twaikwinda kubombia masoke ali mu Bibilia ali atulanda tukite evio “mu bufuuke” kabili ‘twalangiliile mukinzi ukata’ ku bantu bange. (1 Petro 3:15) Tuli twaikala twamanine nangue, bange kunti bakaana mpunda ituli twaya kubabuila. (Mateo 10:14) Tetwizi kuya twainikile kine bantu bali kwitabila ao bali kukaana mpunda yeetu. Inzi, kulanziana nabo i kuli kwatukwasia twamana. Kabili, tumanine nangue aali ya bantu ili yaaluluka.

 Kwa mufuano, busiku bumo, kunti kyakitika muntu te kunti aye wali na musita wa kulanziana ni fwefue, inzi busiku bunge kunti watona saana kutulanzia. Kabili, bantu kunti baaluka ni maavia ao aali ya leenu ibali mukusipikizia. Ezio aali, kunti yabalengia batona kunvua mpunda ili mu Bibilia. I kili kyalengia tuye twalanziana ni bantu, apana mara imo inzi mara ingi.