Mukanda Kufuma ku Kabungue Kali Katungulula
“Mupalile sie kuba mwali bakasambilizia.” (Baeb. 5:12, Le Nouveau Testament en langue Kitaabua) Tontonkania! Yehova—Mwalimu aweeme saana ku muulu ni mu kyalo kyonse, watukupa tubasambilizie bange palwakue! Kila miilo ya kusambilizia kisinka palwakue Yehova—ibe mu lupua, mu kilonghaano ao mu miilo ya kusimikila—ni lisyuko lya mana, kabili ni miilo ikata itupeelue. Tuli kuviinda siani kuifikilizia?
Kyasuko kili mu milandu yakue mutumua Paulo yaamuleembeele Timoteo: “Twalilila kwikwinda mu kusoma ntanzi ya bantu, mu kukinkizia, mu kusambilizia.” Paulo waaongeziizie eevi: “Kupitila kukita evio wakaba kwipususia we muine pamo ni baalia bali bakutuilizia.” (1 Ti. 4:13, 16, NWT) Uli ni mpunda ili yapususia bukose ya kubabuilako bange. Pakaako, ni kintu kya mana wikwinde eevi kuwaamia bufundi bobe bwa kusoma ni kusambilizia. Eezi broshua iteaniiziwe eevi kukukwasia ukite evio. Mona ma seemu paleepale ali mu eezi broshua.
Lileembo lili pa kila lubali, lilangiliile lifunde lya Bibilia likwateene ni lisomo lili mukubombelwapo ao kyakumuenako kya lisomo lili mukubombela muntu
Yehova i “Kasambilizia Mukulu.” (Isa. 30:20, NWT) Ata sie kine eezi broshua yakaba kukukwasia kuwaamia bufundi bobe bwa kusoma ni kusambilizia, te kulaba ata kaniini nangue, Yehova i Nsulo ya mpunda yeetu, kabili weene i ali wakula bantu. (Yoane 6:44) Pakaako, lingi uye waloomba mupasi utakatiifu. Lingi uye wabombia Mulandu Wakue Leeza. Kansi lengia bantu baye bapoozele maano kuli Yehova, apana kuli weewe ata kaniini. Ikwinde saana kubalengia bakatuilizia bobe bamutone saana weene.
Ukupilue kusambilizia mpunda ya mana saana ipitile mpunda yonse ipeelue bantu. Tusininkiziizie nangue kine weewe “waswapila maka kufuma kuli Leeza,” wakaba kuviinda.—1 Pet. 4:11, NWT.
Bakasambilizia nobe,
Kabungue Kali Katungulula ka Bakasininkizia Bakue Yehova
