Sababu ya ki bantu baaba basaansamukile? Paantu bali ku kulonghaana kukata. Nga evelia babombi bakue Leeza baakale vibaalandilue kuya balonghaana litatu ku muaka, ni fwefue tuli twapembelela ni nkulu ikata kulonghaana kuetu kukata. (Malanguluzi a Mizilo 16:16) Ni fwefue tuli twalonghaana litatu ku muaka: Kulonghaana kwa Muputule kubili. Kila kulonghaana kwakitua mu busiku bumo; ni Kulonghaana kwa Kalaale kutuli twakita mu nsiku itatu. Kulonghaana kooku kutatu kukata kuli kwatuletela faida ki?

Kuli kwakosia bukibuza bwetu pamo ni balupua ni bankazi. Nga evelia vyali vyasansamuka Baisraeli mukumutasia Yehova “pa kati ka mabumba akata,” ni leenu kili kyasansamusia kumona vituli twamupupa Yehova lwa pamo. (Malumbo 26:12; 111:1, nwt-ZS) Oozu i musita utuli twasaakaana ni kumonana ni Bakasininkizia ba mu mabumba ni ba mu byalo biinge. Tuli twaikala pamo mu musita wa kutuuzia kwa midi, ni keekio kili kyakosia bukibuza bwetu. (Miilo 2:42) Ku kulonghaana kooko kwa kimupasi i kutuli twaimuena kila umo ntono ili yatukuatania pamo ni ‘bazumizi neetu’ ba mu byalo byoonse.​—1 Petro 2:17.

Kuli kwa kutukwasia kukita buyantaanzi bwa kimupasi. Baisraeli baali basaansamuka saana musita u baali “baumvua mana ya milandu” ya Maleembo aali alondololua. (Nehemia 8:8, 12, nwt-ZS) Ni fwefue tuli twasansamukila masambilizio a Bibilia atuli twapokelela ku kulonghaana kukata. Kila kulonghaana kukata kuli kwasaangua ni mutue ufumine mu Bibilia wimaniine kulonghaana kooko. Tuli twasambilila vyakukita kutona kwakue Leeza mu buikazi bwetu kupitila maasi ni bilangililo bili byakitua ku kulonghaana kooko. Mifuano ya balupua ni bankazi bali balondolola maavia aabo ni vibaaviindile byatukinkizia saana. Musita wa kulonghaana kwa kalaale, misaapo ya Bibilia ili yakwasia maasi a Bibilia amoneke kuya ali aleenu kabili ili yatusambilizia saana. Ku kulonghaana koonse kukata, kuli kwasaangua ni lubatizio lwa balia bali baipeela pasuetele mu buikazi bwabo kuli Leeza.

• Sababu ya ki tuli ni nsaansa ya kuya ku kulonghaana kuetu kukata?

• Kulonghaana kukata kuli kukuletela faida ki?