Musita uniini ntaanzi yakufua kwakue, Yesu walandile eevi: ‘Eezi mpunda iweeme ya Bukolo, yaakasimikiluanke mu kyalo kyoonse ku kuba kisininkizio ku ntundu yoonse, mane mpeleezio ikeeze.’ (Mateo 24:14) Eba, kyalo kyoonse kunti kyasimikilua siani? Kwa kukoonka nzila ya kusimikila yasiile Yesu.​—Luka 8:1.

Kusimikila nsesi kwa nsesi. Yesu wabasambiliziizie basambi bakue vya kusimikila mpunda iweeme nsesi kwa nsesi. (Mateo 10:11-13; Miilo 5:42; 20:20) Bakristu bakuntendeko babaanga baali ni tuzoonga tukasaniiziwe buino twakusimikilamo. (Mateo 10:5, 6; 2 Bakorinto 10:13) Ni leenu, miilo yetu ya kusimikila ipangilue buino: kila libumba lili ni kazoonga kamanikile buino ka kusimikilamo. Pakaako kunti twafikilizia miilo itwapeelue na Yesu: kusimikila ni kutuala busininkizio bukumeene.​—Miilo 10:42.

Nzila inge ya kusimikila. Yesu waali wasimikila mu fuasi ya bantu beengi, ao moonse mwabaanga wasaanga bantu, kumbali buziba ao kumbali kisima kya menda. (Marko 4:1; Yoane 4:5-15) Tukoonkele mufuano wakue Yesu wakulondolola na baantu palua Bibilia mu fuasi yoonse mu twabasaanga: mu misebo, mu fuasi ya miilo, ku busitaani, ni mu fuasi inge. Musita unge tuli twaboombia ni telefone pa kusimikila. Kine musita wailangilila, tuli twabasimikila bantu batupalameene naabo masesi, batwabomba naabo miilo, batuasoma naabo ni bantu ba mu lupua luetu. Kupitila mute oozo, bantu beengi ba pa kyalo bakifikiila kumana “mpunda iweeme ya bupusuko.”​—Malumbo 96:2, nwt-ZS.

Weewe pa loobe, kunti watona kumusimikila nke uni palua mpunda iweeme ya Bukolo Bwakue Leeza ni faida yali wakasaanga kupitila mpunda ezio? Eezi mpunda ya kiswapilo te kulaba kubabuilako ni baange!

• Ni “mpunda iweeme” ki ipalile kusimikilua?

• Ni nzila ki yakue Yesu ya kusimikila itukoonkele?