Weewe, umanine Bakasininkizia Bakue Yehova baanga? Paange i bantu bawikeele naabo, bawaboomba naabo, bawasoma naabo ao benoobe. Ao paange baalandile kale pamo ni weewe palua Bibilia. Kisinka, fwefue tuli baani? Sababu ya ki tuli twababuilako baange bintu bituzumiine?

Tulisie nga bantu baange boonse. Tufumine mu bantu ba ntundu yoonse ni mibeele ilekenkeene ya buikazi. Baange pa kati keetu baali balonghaana mu madiini aange, ni baange te baali bazumiine nangue Leeza kuali. Inzi, fwe boonse twasambiliile Bibilia twapozeleko ni maano. (Miilo 17:11) Twaitabiile nangue beelia bitwasambiliziiziwe ni bya kisinka. Pa kaako, kila muntu pa lwakue buunke wapinguile kumupupa Yehova Leeza.

Lisambililo lya Bibilia lili lyatuleetela faida ikata saana. Ni fwefue tuli twasaangua na maavia ni butope nga bantu baange. Inzi, buikazi ni mibeele yetu yakyaluka buino kakiine paantu tuli twaikuinda kubombia mafunde a Bibilia kila busiku. (Malumbo 128:1, 2) Ezio i sababu ili yalengia tubabuile bantu bintu biweeme bituli twasaanga mu Bibilia.

Mafunde eetu afumine kuli Leeza. Aaza mafunde ali mu Bibilia ali atukwasia kuba ni buikazi buli ni nsaansa, kukindika baange ni kulangilila mibeele paleepale nga evelia bukisinka ni buwaame. Ali asambilizia bekala kyalo baye baali ni buikazi buweeme, kabili ali aleeta buumo mu lupua ni lwendo luweeme. Paantu tumanine buino nangue ‘Leeza tali na kitoolela,’ twikeele nga lupua lumo sie lwa mu kyalo kyoonse lusili na mipaka kabili lusikasaniiziwe na rangi ya mpapa ni bintu bya politiike, tukwataniiziwe mu buumo na bintu bituzumiine. Tulisie nga bantu baange, inzi tuli ntundu ibeleele kabili ya buunke kakiine.​—Miilo 4:13; 10:34, 35.

• Sababu ya ki twalanda nangue bakasininkizia balisie nga bantu baange?

• Zimbula mafunde a Bibilia ali asambilila Bakasininkizia.