Mu Kiebrania, liina Beteli, lili na mana ya “Nsesi Yakue Leeza.” (Kutendeka 28:17, 19, nwt-ZS, bulondolozi buli pensina) Ni liina lipalile, eevi kulangilila makuule ali mu byalo paleepale muli mwateaniiziwa ni kwimaninua miilo ya kusimikila ya Bakasininkizia Bakue Yehova. Ku États-Unis (New York) i kuli Kabungue Kali Katungulula, kali kaimanina miilo ya kyalo kyoonse ao ya mu misaambo ili mu byalo paleepale. Balupua ni bankazi bali babombela mu eezi misambo baundile “lupua lwa Beteli.” Nga evelia mu lupua, ba ku Beteli bali baikala, kulia pamo kabili baalondolola ni kusambilila Bibilia mu buumo.​—Malumbo 133:1.

Ni pa fuasi pebeleele pali pabombelua mu kwitonena mu lupua lukata. Mu kila Beteli, muli Bakasininkizia balalume ni banakazi, bali bapisia musita oonse mu kukita kutona kwakue Leeza ni kukwasia faida ya Bukolo iye ku ntaanzi. (Mateo 6:33) Pakati kaabo te pali ali walipua nfalanga, inzi boonse bapeelue nkende mwa kwikala ni byakulia kabili bali bakwasiiwa eevi kufikilizia madepanse ao garama yaabo ya bintu paleepale bibakabiile. Kila muntu ali ni miilo ya kubomba: paange mu biro, ku mafika, mu fuasi ya kuliila, ku kuleemba ao kufumia mpapulo pa mapapie, kubiika jalada ku bitabu, kukita busaka, kufula, kutengenezia bintu paleepale, ni biingeko.

Ni fuasi ya kubombelako saana eevi kukwasia miilo ya kusimikila. Kikata kya kila Beteli ni kukwasia bisinka bya Bibilia bibafikiile bantu beengi. Eezi broshua i kyakumwenako. Yaleembelue na Kabungue Kali Katungulula, yatuminue mu kielektronike ku maamia a bikundi bya bakapilibula mu kyalo kyoonse, ni kufumiiwa ku mapapie na masini ali abomba lubilo saana. Masini aazo ali asaangua ku ma Beteli paleepale, kusiali broshua ezio yatumua mu mabumba akilile pa 120 000. Kila miilo ili yakitua na lupua lwa ku Beteli, ili yakwasia ku miilo yeetu ya mana saana: kusimikila mpunda iweeme.​—Marko 13:10.

• Ni baani bali babombela ku Beteli, eba, bali balipua?

• Ni miilo ki ya mana ili yabombua na kila Beteli?