Eba, kunti watona kukeba ni kutoosia tuntu eevi umane buino Bibilia? Eba, kunti watona kumana biingi palua mulongo umo wa lileembo, palua muntu azimbwilue, palua nkende ao kintu kilandilue mu Bibilia? Eba, waiipuziizie kale kine Mulandu Wakue Leeza kunti wakukwasia palua bintu bili byakuemia mu maano? Kine i vikili, bombia bibilioteke (butala bwa bitabu) ya mu Nsesi ya Bukolo.

Muli biombo bya kukwasia kukebulula. Paange te ukuete mpapulo ya Bibilia yoonse ya Bakasininkizia Bakue Yehova mu lulimi loobe. Inzi, mu bibilioteke ya mu Nsesi ya Bukolo, mwaikala mpapulo iingi ya leenu ni paange mpilibulo ya Bibilia ilekenkeene, ni diksionere ni bitabu binge bya kukukwasia kukebulula. Te kutiina ao kuunvua mwenzo wa kuibombia ntaanzi ao kisia kulonghaana. Kine mu bibilioteke muli ni ordinatere, kunti wabombia programe ya Watchtower Library. Ezio ni bibilioteke ya kielektronike ilimo mpapulo iingi kabili ili ni nzila ya kukebulula ileengele saana kubombia, eevi kuisambilizia buino lyasi, mulandu ao kyaleembua.

Ili yakwasia ku banafunzi ba ku kulonghaana kwa Miilo ni Buikazi bwa Mukristu. Bibilioteke ya mu Nsesi ya Bukolo ili kukukwasia kuteania kiputulua. Kangalila wa kulonghaana kwa Miilo ni Buikazi bwa Mukristu i ali waimanina bibilioteke. Apalile kumana kine bibilioteke ipangilue buino ni mpapulo ipia ibikiluemo. Weene ao Kasininkizia umwasambilila nakue Bibilia, kunti wakulangilila namuna ya kukeba lyasi liutonene. Bitabu bya mu bibilioteke bya mu Nsesi ya Bukolo te bipalile kutwalua paanze pa Nsesi ya Bukolo ao ku nsesi ya muntu. Kabili, tupalile kwizula buino eevi te kunti tuinoone, kuzabula ao sie kuleemba mukati.

Bibilia ilondoluele nangue eevi “upate maano pa lwakue Leeza,” upalile kukeba “nga bunoonsi bufiikilue.” (Tuswalo ni Mafunde 2:1-5, nwt-ZS) Bibilioteke ya mu Nsesi ya Bukolo kunti ya kukwasia.

• Mu bibilioteke ya mu Nsesi ya Bukolo muli mwasangua ki?

• Naani ali kuviinda kukukwasia kubombia buino bibilioteke ezio?