Liina “painia” lili lyabombiiwa kuzimbula muntu olia ali wavumbula nkende ya leenu ni kubalangilila baange nzila. Kunti twalanda nangue Yesu waali painia, paantu watuminue pa kyalo eevi asambilizie miilo ya kusimikila mpunda ya bukose ni kubeezuila bantu nzila ya kupusukilamo. (Mateo 20:28) Ni leenu, basambi bakue, bali bamupala mukuipeela mu miilo ya kukita basambi baange. (Mateo 28:19, 20) Ni baange babaambiziizie miilo ya bupainia.

Ni muntu ali wasimikila nsita yoonse. Bakasininkizia boonse Bakue Yehova bali basimikila mpunda iweeme. Inzi baange baiteaniizie buino eevi baaluke bapainia ba loonse, i kulanda nangue bali baakita nsaa 70 mu kusimikila kila muezi. Ni pakunti baviinde miilo ezio, bali babomba miilo ya kimubili isiizi kubatwamina nsita iingi. Baange, bali batumua baali bapainia ba buunke mu nkende isiliimo bakasimika. Beene bali baakita nsaa 130 kila muezi. Bapainia barizikile sie na buikazi buabo bulengele, paantu baswapiile nangue Yehova kunti wabakwasia. (Mateo 6:31-33; 1 Timoteo 6:6-8) Baalia basili na buviinde bwa kusimikila musita oonse, kunti baaluka bapainia bakukwasia. Beene bali baakita nsaa 30 ao 50 ku muezi.

Ni muntu akinkiziiziwe na kumutona Leeza ni bantu. Nga vyali Yesu, ni fwefue tumuene nangue bantu beengi bali ni nkulu ikata ya kumumana Leeza. (Marko 6:34) Ni maano a kisinka atuli nao kunti abakwasia loonu ni kubapeela kiswapilo kikata. Kutona bantu i kuli kwamukinkizia painia apisie musita ni maka akue waunvuile nsaansa, eevi abakwasie bantu bamane mpunda iweeme. (Mateo 22:39; 1 Batesalonika 2:8) Abe, tafuma mu kusimikila, kiketekelo kyakue kyakila kuluma, kabili wakila kumupalama Leeza waali ni nsaansa ikata saana.​—Miilo 20:35.

• Painia naani?

• Ni kiki kili kyamukinkizia painia?