Bibilia yalaandile ntaanzi nangue kisia kufua kwakue Kristu, bakasambilizia babufi bakafuma pa kati ka Bakristu baantendeko ni kwalulula kisinka kya Bibilia. (Miilo 20:29, 30) Kyakitikile nga vyalandile Bibilia. Masambilizio akue Yesu atendekele kubikuamo maano a bantu sie ao masambilizio a kipagaani, ni kutendeka paapo Bukristu bwa bufi bwatendekele. (2 Timoteo 4:3, 4) Eba, tuli kwinika siani nangue tuli mukunvua buino mana ya beelia bili byasambilizia Bibilia kakiine?

Musita wafikile wa kumana kabili kisinka. Yehova walaandile ntaanzi nangue “mu nsita ya mpelezio maano a kisinka akavula.” (Danieli 12:4, nwt-ZS) Mu 1870, kikundi kiniini kya bantu baali baakeba kisinka bainikile nangue masambilizio engi a kidiini aali apuseene ni Bibilia. Kikundi keekio, kyatendekele kukeba kunvuisia vyali vyasambilizia Bibilia kale. Ni Yehova wabakwasiizie.

Baasambiliile Bibilia baapozeleko ni maano. Banafunzi ba Bibilia baali baabombia nzila ya kusambilila Bibilia nga eezi ituli twabombia leenu: Baali baasambilila lyasi limo-limo lya Bibilia. Kine lileembo te liunvuikile, baali bakebako maleembo aange alondolole buino. Te bamona nangue aaza maleembo aange apateene ni leelia liinge balileemba. Lubaali balekeela Bibilia iilondolole iine, bapatile kisinka palua liina lyakue Leeza, palua Bukolo bwakue, palua belia biatonene kukita ku kyalo ni ku bantu, palua bafuile ni palua kiswapilo kya bufufuko. Kukebulula kwabo kwabafumiizie mu buzia bwa buzumino bwa bufi ni mibeele yaali yaakitua.​—Yoane 8:31, 32.

Mu 1879, Banafunzi ba Bibilia bainikile nangue musita wakumeene wa kusalangania mpunda ya kisinka ku bantu. Pakaako, baatendekele kuleemba Munara wa Mulinzi Unatangaza Ufalme wa Yehova (Lupungu Lwakue Kamwenenena Luli Lwabila Bukolo Bwakue Yehova), kazeeti katuli twaleemba mpaka loonu. Loonu, tuli twasimikila bantu kisinka kya Bibilia mu byalo bikilile pa 240 ni tuzoonga, kabili mu ndimi ikilile pa 900. Kakiine maano a kisinka kya Bibilia atwalilila kuvula kukila musita wa kale!

• Kisia kufua kwakue Kristu, kisinka kya Bibilia kyasangilue naki?

• Kisinka kya Bibilia kyapatikile kabili siani?