Yesu Kristu wabalandile eevi basambi bakue: ‘Kansi kisue kyenu kisanikile bantu eevi bamone bikitua byenu biweeme pakuti bamutasie Sinue (ao Baba weenu) wa mwiulu.’ (Mateo 5:16) Ni pakaako, tuli twabombia biombo byakitekinolojia ya leenu, pamo ni Enternete. Kitente kili kyakwasia kubabuilako baange bintu bizumiinue na Bakasininkizia Bakue Yehova pamo ni miilo yaabo, kili kyakutua jw.org. Ulikusangamo mpunda ki?

Kyasuko kya Bibilia ku biipuzio bili byaipuzia bantu beengi. Uli kusaangamo kyasuko kya biipuzio bya mana bili bya ipuzia bantu palua buikazi. Nga evelia matrakti ali ni mitue: Kuunti kia kitika aza masaanzo akapue kisinka busiku bumo? ni Bantu bafuile kunti babuuka kabili? ali mu kitente mu ndimi ikilile pa 600. Mu kitente keeki wakaba kusaangamo ni Bibilia Tafsiri ya Ulimwengu Mupya (Mpilibulo ya Kyalo kya Leenu) ili mu ndimi ikilile pa 170, bitabu bya kusambililamo Bibilia ni biene mubili nga evelia Biblia Inatufundisha Nini? (Bibilia ili Yatusambilizia ki?) ni nimero ya leenu ya Munara wa Mulinzi (Lupungu Lwakue Kamwenenena) pamo ni Amuka! (Buuke!) Kunti wasomena bitabu mu kitente ao kupakula mu bukata nga boobu: MP3, PDF ao EPUB. Kabili, kunti watona wemuine kufumia mpapulo ezio ku mapapie mu lulimi lunge eevi uye upeeleko ni olia atonene kuunvua kisinka kya Bibilia. Mu kitente kekio muli mwasaangua maviideo ali mu ndimi iingi ya bilangililo. Kunti watona kupakula maasi akutwilizia sie a misaapo ya Bibilia, maviideo a misaapo ya Bibilia, nghiimbo ni miziki yaweeme kakiine.

Mpunda palua Bakasininkizia Bakue Yehova. Mu kitente kyetu kya Enternete, uli kusaanga mpunda ya leenu ni maviideo palua miilo yeetu ya mu kyalo kyoonse, ni bintu bili mu kukitika pa Bakasininkizia Bakue Yehova, ni palua kufumia misaada. Mu kitente kyenka keekio, uli kusaanga adrese ya misambo paleepale ni mpunda palua kulonghaana kukata.

Kupitila eezi nzila, tuli twalekelela lubuto lwa kisinka lusanikile ni kubengema mpaka mu tuzoonga twa kulee twa kyalo. Kakiine, beekazi ba mu nkende yoonse ya kyalo, atasie balia bekeele ku Antarctique, bali baingila mu kitente kyetu kya Enternete. Tutwaliliile kupepa eevi “mpunda yakua Mulopue itwalilile kukumana lubilo lubilo” mu kyalo kyoonse, mu bulumba bwakue Leeza.​—2 Batesalonika 3:1.

• Kitente kya jw.org kili kyakwasia siani bantu kusaanga kisinka kya Bibilia?

• Kunti watona kukeba mpunda ki mu kitente kyetu?