Eevi tutuale “mpunda iweeme” mu ‘mitundu yoonse, ni mikowa yoonse, ni bantu ba ndimi yoonse, pamo ni ntundu yoonse (ao bantu boonse),’ tuli twaikwinda kufumia mpapulo yeetu mu ndimi ikilile pa 900. (Nfyulo 14:6) Eba, eezi miilo ya kupapia, tuli twaifikilizia siani? Kupitila sie kikundi kya bakaleemba ba kyalo kyoonse ni bakapilibula bali mu byalo paleepale bepeele kwa kwitonena. Baabo boonse ni Bakasininkizia Bakue Yehova.

Lyasi lya kupilibula lili lyateaniiwanke mu lulimi lwa Kingereza. Ku kitente kikata kya Bakasininkizia Bakue Yehova, i kuli Kabungue Kali Katungulula kemaniine biro ya kuleemba. Eezi biro ya kuleemba imaniine bakaleemba bali basaangua ku kitente kikata pamo ni bali mu misambo ilekenkeene. Kuba ni bakaleemba kufuma mu byalo paleepale kuli kwakwasia kuleemba maasi ali akumia ku mitima ya bantu mu byalo byoonse bali ni mibeele ilekenkeene ya buikazi.

Lyasi lya kupilibulua lili lyatumua ku bakapilibula. Kisia kutoosiiwa ni kwitabiziiwa, lyasi lili lyatumua mu kielektronike ku bakapilibula bali mu kyalo kyoonse. Kikundi keekio kili kyapilibula, kusiali kyatoosia ni kuwaminizia miilo yaabo. Bakapilibula bali baikwinda kusaakula “milandu ya kisinka isili na kilubo,” i kulanda nangue bali bapilibula milandu nga viilandilue mu lulimi lwa Kingereza.​—Kasimika 12:10, nwt-ZS.

Ma ordinatere ali akwasia kusuunga musita. Ordinatere te iviinda kupiana fuasi ya kaleemba ao kapilibula. Inzi, madiksionere a kielektronike pamo ni ma aplikasio ao ma programe a ordinatere akukwasia kukebulula ni bintu biingeko bili byamukwasia kapilibula kusuunga musita. Ni kangeko, Bakasininkizia baundile programe ya kielektronike ili yakwasia kuwamia ni kupaanga buino milandu mu ndimi iingi (MEPS), ili yakwasia kuwamia ni kupaanga buino maasi mu ma mia a ndimi, kuakwatania pamo ni ma foto ni kuapanga buino eevi afumiiwe ku mapapie.

Sababu ya ki tuli twaikwinda kupilibula mpapulo yeetu mu ndimi iingi, anzia kine ni ndimi ili yalondololua na bantu baniini sie? Sababu ni eezi: Yehova atonene “kubalua muntu apusuke ni kumana kisinka,” i kulanda nangue, kisinka kisili na kilubo.​—1 Timoteo 2:3, 4.

• Mpapulo yeetu ili yaleembua siani?

• Sababu ya ki tuli twapilibula mpapulo mu ndimi iingi eevi?