Kila Nsesi ya Bukolo ya Bakasininkizia Bakue Yehova, itueme liina litakatiifu lyakue Leeza. Ni pakaako, tumuene nangue kukita busaka bwa Nsesi ya Bukolo, kuiwamia imoneke buino pamo ni kuitengenezia buino ni lisyuko likata kabili ni seemu ya mana saana mu lupupo lwetu lutakatiifu. Kila umo kunti wakwasia kukita miilo ezio.

Kwa kwipeela mu kwitonena kuswesia Nsesi ya Bukolo kisia kupua kulonghaana. Kisia kupua kulonghaana, Bakasininkizia bali baswesia kwa kwitonena Nsesi ya Bukolo. Bali baswesia Nsesi ya Bukolo yoonse limo ku mulungu. Mukote umo wa mu libumba ao mubombi ali wabombela ali waimanina miilo ezio ya busaka, wakoonkele ntantiko ya miilo yoonse ya kukita. Kukoonkana ni bipusile, baange bali baipeela kupyanga, kufumia lufunko, kupompa dawa ya kwipaya biisi, kupaanga bitebe, kuswesia ku kabine, kuswesia madirisia ni biyo, kuzizia butiafu ni kupyanga paanze. Limo ku muaka, busiku bumo buteaniiziwe eevi kukita busaka mu nzila yoonse. Lutuli twabomba ni baana beetu, tuli twabasambilizia kukindika fuasi ya kupupila.​—Kasimika 5:1.

Kwa kutengenezia biinonekele. Miaka yoonse, Nsesi ya Bukolo ili yatosiiwa paanze ni munkati, eevi kumona kine ili buino. Kukita miilo ezio kila musita, kuli kwakwasia kusuunga buino Nsesi ya Bukolo ni kutiina kukita depaanse isili na mana. (2 Milandu ya Nsiku 24:13; 34:10) Kine Nsesi ya Bukolo iswetele kabili ya weeme, paapo i pafwaniine kumupupa Leeza. Lutuli twakwasia miilo ezio ya busaka, tuli twalangilila nangue tumutonene Leeza ni kukindika pa nkende yeetu ya lupupo. (Malumbo 122:1) Kusuunga Nsesi ya Bukolo kuli kwaleeta busininkizio buweeme ku bantu bali mu peepi ni Nsesi ya Bukolo.​—2 Bakorinto 6:3.

• Sababu ya ki te tupalile kupuulula nkende yeetu ya lupupo?

• Masesi a Bukolo ali asuungua siani?