Mu ma foto ali mu eezi broshua, eba, wamona Bakasininkizia Bakue Yehova vibavuele buino kabili ni mukinzi pa kuya ku kulonghaana? Sababu ya ki tumuene kuvualila buino kwetu kwali kwa mana saana?

Eevi tumukindike Leeza. Ni kisinka nangue Leeza teezi kukentasie aali ya panze pa muntu. (1 Samueli 16:7) Inzi, musita utuli twamupupa lwa pamo, tuli twakeba kuleeta mukinzi wa kisinka kuli Leeza ni baalia ba twalonghaana naabo. Mona oozu mufuano: twakeba kuya kumumona zuuzi ao mupinguzi, pakunti tuye tumumone buino tuli kutoosia maubo eetu, te evio? Evio vyenka, nvualilo yeetu pa kulonghaana ili yalangilila mukinzi kuli “Mupinguzi wa kyalo kyonse,” Yehova Leeza, ni palia patuli twalonghaanina.​—Kutendeka 18:25, nwt-ZS.

Eevi tukindike mafunde a Bibilia. Bibilia ili yabakinkizia Bakristu bavualile “kwa kiaasi ni maano aweeme.” (1 Timoteo 2:9, 10, nwt-ZS) Kuvuala “kwa kiaasi” ao kuvuala buino te kulangiliile nangue ni kuvuala ngubo yamutengo ukata, ya pamuulu, ya kupapia, ya kwilangisia ao ili yabuusia nkulu ya bukambue. “Maano aweeme,” ali atukwasia kusaakula maubo apalile, ao asili a ovyoovio, ao asili a kwilendula. Inzi aaza mafunde a Bibilia teezi kumutana kila muntu nsaambu yakue ya kwisaakuila maubo aatonene kuvuala. Kuvualila maubo afuaniine, kuli kwakwasia bantu ‘baye bakindikile masambilizio ali asambiliziiwa palwakua Leeza Mupususi weetu’ ni ‘kumutasia Leeza’ bila twalandile ata kaantu. (Tito 2:10; 1 Petro 2:12) Kansi, kuvualila buino musita wa kuya ku kulonghaana, kuli kwalengia ni bantu baange babaambe kumupupa Yehova.

Inzi, te kulekeela ngubo yoobe ikwanzie kwiza ku kulonghaana! Te ilombelue kuvuala ngubo ya bei ikata, inzi, maubo aswetelesie ao ali buino kabili afuaniine apalile.

• Sababu ya ki kuvuala kwetu buino ni kwa mana saana musita wa kumupupa Leeza?

• Ni mafunde ki ali atukwasia kusaakula buino maubo eetu?