Bantu beengi bamanine nangue Bakasininkizia Bakue Yehova ni liina lya diini ya leenu. Inzi, tepasiapitile miaka ikilile pa 2 700, baboombi bakue Leeza wa kisinka babaanga bakuutua “Bakasininkizia” bakue. (Isaya 43:10-12, nwt-ZS) Ntaanzi ya muaka wa 1931, twali twakuutua Banafunzi ba Bibilia. Sababu ya ki twatendekele kukuutua Bakasininkizia Bakue Yehova?

Leeli liina lilangiliile Leeza weetu. Liina lyakue Leeza weetu, Yehova, lyali lyasaangua mu maelufu a mafuasi mu maleembo a kale saana. Inzi mpilibulo iingi yafumiziemo lelio liina ni kubiikapo meena a mukinzi nga evelia Waloonse ao Mulopue. Inzi Leeza wa kisinka wailangiliile kuli Musa mu liina lyakue, Yehova, lualandile eevi: “Lelio i liina lyane loonse.” (Kufuma 3:15, nwt-ZS) Waipusanisiizie ni ba leeza boonse baabufi. Tuli twaitoneena kukuutua mu liina litakatiifu lyakue Leeza.

Leeli liina lilangiliile miilo yeetu. Kubambila pali Abeli, balalume ni banakazi beengi bakisinka bamuketekeele Yehova ni kumusininkizia. Mu kupita kwa miaka, Noa, Abrahamu, Sara, Musa, Daudi ni bangeko baiongeziizie ku “libumba likata lya bakasininkizi.” (Baebrania 11:4–12:1) Nga evelia kasininkizia taviinda kutalala kumulandilako muinakue ku nsesi ya bupinguzi, ni fwefue tetuviinda kutalala kubabwila bantu kisinka pa lwakua Leeza.

Ni Yesu nawe ni kasininkizia. Bibilia ili yamukuuta nangue “musininkizi wa kisinka ni wa kiine.” (Nfyulo 3:14) Walandile mwine nangue waababuilile liina lyakue Leeza ni kuleeta ‘busininkizio [palua] kisinka.’ (Yoane 17:26; 18:37) Basambi baakue bapalile kukuutua mu liina lyakue Leeza ni kubabuila bantu baange liina leelio. Bakasininkizia Bakue Yehova bali baikwinda kukita evio.

• Sababu ya ki Banafunzi ba Bibilia baatendekele kukuutua Bakasininkizia Bakue Yehova?

• Yehova waalukile ni Bakasininkizia bakue paanu pa kyalo kutendeka musita ki?

• Kasininkizia mukulu Wakue Yehova naani?