Kine uli wasambilila Bibilia pamo ni Kasininkizia Wakue Yehova, uli waikuinda kwiteania ntaanzi ya kusambilila. Kili buino kukita evio vyenka ntaanzi ya kuya ku kulonghaana eevi upate faida ikata. Kili buino kuibikila ntantiko yoobe ya kukoonka.

Upalile kusaakula musita uweeme kabili ni pa fuasi pafuaniine. Weewe pa loobe, ni musita ki uuli waviinda kusambilila watekameene kabili bila kupuululua? Eba, ni lukele-keele ntaanzi ya kubamba miilo, ao kyungulo saana baana basialeele? Anzia kine uli kusambilila sie mu musita uniini, kili buino kupingula dakika ao nsaa iuli kukita mu lisambililo lyobe, kabili te kulekeela kantu koonse kavulunganie ntantiko yoobe. Saakula fuasi isiliipo nsuungu, kabili ikala kule ni bintu bya kupuulula nga evelia: radio, televizio ni telefone. Pepa nke ntaanzi ya kusambilila, kukita evio kunti kwakukwasia kulaba maavia akila busiku eevi upooze maano ku Mulandu Wakue Leeza.​—Bafilipi 4:6, 7.

Upalile kukeba byasuko mu lifungu, kusikamo ni kwiteania vyakuasuka. Kebaanke liwazo likata mu lyasi liwaakeba kusambilila. Tontonkania palua mutue wa lyasi, kisia tendeka kukeba umone mutue oozo upateene siani ni mitue iniini ili mu kati. Toosia buino ma foto. Soma biipuzio bya kubwelelela bili byakwasia kusaanga mawazo akata. Kusiali, tendeka kubeleenga lifungu limo-limo ni kukeba kyasuko. Beleenga maleembo oonse azimbwiluemo ni kukeba kumana vi apaleene ni lyasi likata. (Miilo 17:11) Kine wapata kyasuko kya kiipuzio, sika kisiko pensina pa milandu ao bulondolozi buli kuya kukulangulusia lubilo kyasuko. Kine watona, musita wakulonghaana kunti walendula kuboko, kine bakusinika waasukapo ni weewe mu milandu yoobe.

Kine watoosia maasi paleepale a kulonghaana kila juma, wakaba kuongezia bunoonsi bwa leenu mu bukonto boobe bwa kumana Bibilia.​—Mateo 13:51, 52.

• Kunti waibikila ntantiko ki palua kuteania kulonghaana?

• Kunti wateania siani kyasuko eevi uye wasuke ku kulonghaana?