Mu musita wa masaanzo, tuli twaikwinda kukwasia Bakasininkizia Bakue Yehova bali basaanga maavia. Kukita eevi, kuli kwalangilila ntono yeetu ya kisinka ya bulupua. (Yoane 13:34, 35; 1 Yoane 3:17, 18) Fwefue, tuli twabakwasia siani?

Tuli twafumia nfalanga. Mu nsiku ya ba mitume, Bakristu ba ku Antiokia babatumiine nfalanga Bakristu ba ku Yuda babaanga baali mu nzala ikata. (Miilo 11:27-30) Mu eenu nsiku yeetu, tuli twapata mpunda kine Bakasininkizia basaangua na maavia mu nkende paleepale. Kupuako, tuli twalongia bintu bilekenkeene mu libumba lyetu ni kubakwasia.​—2 Bakorinto 8:13-15.

Tuli twaiteania buino pa kukwasia. Bakote bali basaangua paalia paakitika busaanzo, bali bakeba kila lupua ni nkazi wa mu libumba lyabo, eevi bamane kine boonse bakosele ao te basanzilue. Kabungue ka misaada kali katantika namuna ya kuundapa, yakupata byakulia, menda asuetele, maubo a kuvuala ni pa kulaala. Bakasininkizia beengi bali ni bufundi bwa buunke, bali baipeela kwa kuitonena ni kufumia nfalanga yaabo eevi bakwasie kukuula masesi a balupua ni bankanzi ni Masesi a Bukolo akituutika. Paantu tuli twabombela pamo kwa buumo, tuli twabakwasia lubilo-lubilo beneetu basanzilue pasili kukokola. Tuli twabakwasia ‘balia batuli naabo mu kiketekelo,’ inzi lunge, tuli twabakwasiako ni baange bila kukenta diini yaabo.​—Bagalatia 6:10.

Tuli twabateekia mutima kupitila Bibilia. Bantu bali basaanzua bali bakeba kuteekiiwa mutima. Mu musita oozo, tuli kupata maka kufuma kuli Yehova, ‘Leeza ali wakwasia bantu boonse.’ (2 Bakorinto 1:3, 4) Lutuli twalondolola ni bantu basanzilue palua bulayo buli mu Bibilia; tuli twabasininkiziizia nangue Bukolo Bwakue Leeza bwakaba kupuisia leenu sie beebi bintu byoonse bibiipile, kukisua ni masaanzo.​—Nfyulo 21:4.

• Sababu ya ki tuli twaiteania lubilo-lubilo mu nsita ya masaanzo?

• Tuli twabateekia siani mutima bantu basaanzilue?