1-3. Fwe bonse tupinguilue kiki, kabili Yehova wakatupokolola siani?

 TONTONKANIA wapingulua kukakua mu boloko buikazi bobe bonse, palua bungipaani buusyakikita. Tekuli kiswapilo nangue wakafuma. Teuli na kiswapilo kya musita uli mukuiza, kabili tekuli kintu kiuli kuviinda kukita. Inzi, musita luwazeezia kiswapilo kyonse, waunvua mpunda nangue kuli muntu kampanda ali ni buviinde bwa kukufumia kabili alaile kukukwasia! Uli kwiunvua siani?

² Fwe bonse tupinguilue kufua. Atasie tukite siani, tetuviinda kubutuka ao kwifompola ku lufu. Inzi, Yehova ali ni buviinde bwa kutupokolola mu lufu. Kabili alaile nangue “lufu, mulwani wa mpeleezio, wakaba kuloviiwa.”​—1 Bakorinto 15:26.

³ Tontonkania viwakeyunvua musita luusikaba kabili na muenzo wa kufua! Inzi, Yehova takafumiaposie lufu. Wakababuezia kabili ku bukose baalia bonse baafuile kale. Tontonkania vyakaba bintu beebio. Walaya nangue baalia “basili na buviinde mu lufu” baakekala kabili. (Isaya 26:19) Keekio i kili kyakuutua na Bibilia kutuntumunua.

4. (a) Ni kiki kili kutukoselezia kine muntu wa mu lupua ao kibuza wafua? (b) Ni baani bange baali babibuza ba peepi saana bakue Yesu?

⁴ Musita muntu wa mu lupua ao kibuza wa peepi saana lwafua, tuli twaunvua bulanda ni misa ikata saana.  Tuli twapeleelua. Tekuli kintu kituli kuviinda kukita eevi kumubuezia muntu ozo ku bukose. Inzi, Bibilia ili yatukoselezia kakiine. (Soma 2 Bakorinto 1:3, 4.) Tumone mufuano umo ulangiliile nangue Yehova ni Yesu batonene saana kubuezia ku bukose bantu beetu batutonene. Musita Yesu lwaali pa kyalo, waali wamuendela Lazaro pamo ni bankaziize, Marta ni Maria. Baabo bonse batatu baali babibuza baweeme bakue Yesu. Bibilia ili yalanda nangue: “Yesu waali wabatonene ba Marta ni Maria pamo ni Lazaro.” Kisia, busiku bumo Lazaro waafuile.​—Yoane 11:3-5.

5, 6. (a) Yesu waakitile ki musita lwaamuene lupua lwakue Lazaro pamo ni babibuza bakue baali mu bulanda? (b) Juu ya ki kumana vyaiunvuile Yesu palua lufu kuli kwatukoselezia?

⁵ Yesu waaile kubakoselezia ba Marta ni Maria. Musita Marta lwaunvuile nangue Yesu ali mukuiza, waaile kumusensekela panze pa muzi. Marta waunvuile nsaansa ya kumumona Yesu, inzi waamulandile eevi: “Ubengepo ndumyamwine [kaka wane] nga taakifua.” Marta waatontonkaniizie nangue Yesu waizile nyuma saana. Kisia paapo, Yesu waamumuene Maria nkazi wakue Marta, waali mukulila. Lwamuene bulanda bwabo, waakisikile saana ku mutima, ni kulila. (Yoane 11:21, 33, 35) Waaunvuile misa ikata nga elia ituli twaunvua kine twafuilua na muntu u tutonene.

⁶ Kumana nangue Yesu ali waiunvua nga fwefue palua lufu, kwatukoselezia. Yesu ali ni mibeele nga yakue Baba wakue. (Yoane 14:9) Yehova ali ni buviinde bwa kufumiapo lufu muyayaya, kabili i vyali wakaba kukita leenusie.

7, 8. Juu ya ki Marta taatonene libue lifumiiwepo pa kilibu kyakue Lazaro? Inzi Yesu waakitile ki?

⁷ Musita Yesu lwaafikile pa kilibu kyali kyalalikiluemo Lazaro, kyali kyaizeeluepo libue likata. Yesu waalandile  eevi: “Fumiepo libue.” Inzi, Marta taatonene lifumiweepo. Mubili wakue Lazaro waali wasyapuile nsiku ina mu kilibu. (Yoane 11:39) Marta taali wamanine kyali kyakebele kukita Yesu palua ndumeeze.

⁸ Yesu waamulandile eevi Lazaro: “Fumina panze!” Kupuako, kintu kibaamuene ba Marta ni Maria kyali kyakupapia. “Muntu waali wafuile, wafumina panze wapambiliilue bitambala ku maboko ni ku maulu.” (Yoane 11:43, 44, NWT) Lazaro waabueziiziwe ku bukose! Waabwelele kabili ku lupua lwakue ni ku babibuza bakue. Baamukumbatiile, baamukumiizie, ni kulanda nakue. Kyali kimpezia maano! Kakiine Yesu waamutuntumuine Lazaro.

9, 10. (a) Naani waamupeele Yesu buviinde bwa kutuntumuna bantu? (b)  Juu ya ki mpunda palua kutuntumuka ni ya mana kuli fwefue?

⁹ Eba, Yesu waali watuntumuna bantu mu buviinde bwakue muine? Bila. Ntaanzi amutuntumune Lazaro, Yesu waapepelenke kuli Yehova, ni Yehova waamupeele buviinde bwa kumutuntumuna Lazaro. (Soma Yoane 11:41, 42.) Te Lazaro sie bunke waatuntumuinue. Bibilia ili yatubuila palua muana mwanakazi waali na miaka likumi na ibili (12), waali waluele saana. Yairo baba wakue, taali na kiswapilo, pakaako, waamupaapatile Yesu eevi amukosie muana wakue. Taali na muana unge. Musita lwali wakili mukulanda, kwalapukile balalume kampanda ni kulanda nangue: “Mwana obe wafuanga kale! Ale ulimukumwemiizia ki Kasambilizia?” Inzi, Yesu waamwanine Yairo eevi: “Tekutiina, ketekela sie, mwana obe ali kukosa.” Kisia waaile ku nsesi yakue Yairo baali bonse. Lubapaleeme peepi ni nsesi yakue Yairo, Yesu waamuene ni kunvua bantu baali mukulila. Yesu waabalandile eevi:  “Emue, talale. Ozu mwana tafuile, inzi onenesie!” Paange, baba ni mama wakue baali basyaiipuzia kine Yesu wakebele kulanda ki. Yesu waabanine bantu bafume, kisia waabatueme ba baba ni mama wakue ni kuya naabo ku kiumba kwali kwalalikilue muana wabo muniini mwanakazi. Yesu wakuete kuboko kwakue ozo muana, ni kumuana eevi: “Wee muana muniini mwanakazi, nakuana, ‘buuka!’” Tontonkania vyasaansamukile baviazi bakue, musita lubamuene muana wabo wabuuka ni penka paalia wabamba kuenda! Yesu waatuntumuine muana waabo. (Marko 5:22-24, 35-42; Luka 8:49-56) Kutendekela pa bobo busiku, musita ubaali bamukenta muana wabo muniini, baali balanguluka keelia kibaakitiilue na Yehova kupitila Yesu. a

¹⁰ Baalia bonse baatuntumuinue na Yesu, baafikiile kufua kabili. Inzi, beelia bituli twasoma palua bantu baabo, ni bya mana paantu bili byatupeela kiswapilo kya kiine. Yehova atonene kutuntumuna bantu, kabili wakaba kukita evio.

11. Kasimika 9:5 yatusambilizia ki palwakue Lazaro?

¹¹ Bibilia ili yalanda bila kufiika nangue “Bafuile tebeezi kantu ata kamo.” I vikyali ni kuli Lazaro. (Kasimika 9:5) Nga vyaalandile Yesu, Lazaro waalisie nga onene. (Yoane 11:11) Musita Lazaro lwaali mu kilibu taali waizi “kantu ata kamo.”

12. Twamana siani nangue kutuntumuka kwakue Lazaro kwakitikile kakiine?

 ¹² Musita Yesu lwaamutuntumuine Lazaro, bantu bengi baamuene kintu keekio. Ni baluani bakue Yesu, baamanine nangue waakitile keekio kimpezia maano. Lazaro waali wakosele, ni keekio kyalangiliile nangue kutuntumuka kooko kwakitikile kakiine. (Yoane 11:47) Kabili, bantu bengi baaile kumumona Lazaro, ni keekio kyaalengiizie bantu bazumine nangue Yesu waali watuminue na Leeza. Baluani bakue Yesu te baunvuile buino palua kintu keekio, pakaako batendekele kukeba nzila ya kumwipaya Yesu pamo ni Lazaro.​—Yoane 11:53; 12:9-11.

13. Juu ya ki kunti twaaluka ni kisinka nangue Yehova wakatuntumuna bafuile?

¹³ Yesu waalandile nangue “bonse bali mu mankabuli alangulukilue” bakatuntumunua. (Yoane 5:28, NWT) I kulanda nangue baalia bonse balangulukilue na Yehova baakabuela ku bukose. Inzi, pakunti Yehova atuntumune muntu kampanda, apalile kulanguluka kila kantu palua muntu ozo. Eba, kunti waakita evio kakiine? Kisinka, mu muulu muli ntanda ingi saana. Bibilia ili yalanda nangue Yehova amanine liina lya kila lutanda. (Soma Isaya 40:26.) Kine ali waviinda kulanguluka liina lya kila lutanda, kansi, wakaviinda kulanguluka kila kantu palua baalia bonse bali wakabuezia ku bukose. Kintu kya mana kukila, Yehova waabumbile kila kintu, pakaako ali ni buviinde bwa kubuezia bantu ku bukose.

14, 15. Milandu yakue Yobu yatusambilizia ki palua kutuntumunua?

¹⁴ Yobu mubombi wakisinka, waali wazumiine kutuntumuka. Waipuziizie eevi: “Kine muntu wafua, eba, kunti wabuela kabili ku bukose?” Kupuako, waamuanine Yehova eevi: “Wakakuuta ni neene nakakwitaba. Wakaba ni  nkulu ikata palua miilo ya maboko obe.” Kakiine, Yobu waali wamanine nangue Yehova apembeleele kwa nkulu musita lwali wakatuntumuna bantu bafuile.​—Yobu 14:13-15.

¹⁵ Waiunvua siani palua kiswapilo kya kutuntumunua? Kunti waiipuzia eevi, ‘Eba, Bantu ba mu lupua lwane ni babibuza, ni beene bakatuntumunua?’ Kumana nangue Yehova atonene kakiine kubuezia bafuile ku bukose, kuli kwatukoselezia. Ni baani bakatuntumunua? Kabili bakeekala ku pi? Tumone vili vyalanda Bibilia.

16. Baalia bakatuntumunua ni kwikala pa kyalo bakasekelela bukose bwa siani?

¹⁶ Mu nsita ya kale, baalia bonse baatuntumuinue baabuelele ku bantu ba mu lupua lwabo ni ku babibuza, paanu pa kyalo. Keekio kyakakitika kabili musita uli mukuiza, inzi, kyakaba kyakilile kuwaama. Juu ya ki? Paantu, baalia bakabweziiwa ku bukose bakaba ni lisyuko lya kwikala loonse ni bila kufua kabili. Kabili bakekala pa kyalo kipuseene kakiine ni keenu kitulipo leenu. Tekukaba vita, bubiifi ni maluele.

17. Ni baani bakatuntumunua?

¹⁷ Ni baani bakatuntumunua? Yesu waalandile nangue “bonse bali mu mankabuli alangulukilue bakonvua lizui lyakue ni kufuma.” (Yoane 5:28, 29, NWT) Ni Nfyulo 20:13 ili yatubuila nangue: “Lyezi lyafumiizie bafuile baalimo, ni lufu ni mankabuli byafumiizie bafuile baalimo.” Een, bantu bengi saana bakekala kabili. Mutumua Paulo ni weene waalandile nangue “balunghami ni basilungheeme” bakatuntumunua. (Soma Miilo 24:15.) Keekio kili na mana ki?

18. “Balunghami” bakatuntumunua ni baani?

 ¹⁸ Pakati ka “balunghami” pali ni babombi bakue Leeza baaikeele ntaanzi Yesu eze pa kyalo. Bantu nga evelia Noa, Abrahamu, Sara, Musa, Rutu, ni Esta bakatuntumunua eevi kwikala paanu pa kyalo. Kunti wasoma palua balalume ni banakazi bamo pakati kaabo, bazimbuilue mu Baebrania katue ka 11. Kyakaba siani palua babombi ba kisinka  bakue Yehova bali mukufua leenu? Ni beene ni “balunghami,” pakaako, bakatuntumunua.

19. “Basilungheeme” ni baani? Yehova wakabapeela lisyuko ki?

¹⁹ “Basilungheeme” ni bantu basyapatile lisyuko lya kumumana Yehova. Anzia kine baafuile, Yehova tabalabile. Wakabatuntumuna, kabili bakaaluka ni lisyuko lya kusambilila palwakue Yehova ni kumubombela.

20. Naani asikatuntumunua?

²⁰ Eba, i kulanda nangue kila umo afuile wakatuntumunua? Bila. Yesu waalandile nangue bantu bange te bakatuntumunua. (Luka 12:5) Naani wakapingula nangue muntu kampanda wakatuntumunua ao abe? Yehova i Mupinguzi mukulu, inzi waamupeele Yesu buviinde “kuba mupinguzi wa bakosele ni bafuile.” (Miilo 10:42) Olia apinguilue kuba waali mubiifi kabili asiizi kutona kupilibuka takatuntumunua.​—Mona Bulondolozi Bunge bwa 19 ku lubali lwa 215.

21, 22. (a) Baalia bakuya ku muulu bali batuntumunua baali ni mubili wa siani? (b) Naani waatendekele kutuntumunua eevi kwikala ku muulu?

²¹ Kabili, Bibilia ili yalanda nangue bantu kampanda bakekala ku muulu. Kine muntu watuntumunua eevi ekale ku muulu, teezi kubuela ku bukose waali ni mubili nga wa fwefue bantu. Ali watuntumunua eevi ekale ku muulu waali ni mubili wakimupasi.

²² Yesu i waali muntu wa kuanza kutuntumunua evio. (Yoane 3:13) Nsiku itatu kisia kwipawa kwakue Yesu, Yehova waamutuntumuine. (Malumbo 16:10; Miilo 13:34, 35) Yesu taatuntumuinue waali ni mubili wa bumuntu. Mutumua Petro waalondoluele nangue Yesu  “waafuile mu mubili, inzi waabueziiziwe ku bukose mu mupasi.” (1 Petro 3:18, NWT) Yesu waabueziiziwe ku bukose waali muntu wakimupasi ali ni maka! (1 Bakorinto 15:3-6) Inzi, Bibilia ili yalanda nangue te weene sie bunke.

23, 24. “Libumba liniini” lyaalandilue na Yesu ni baani? Kabili bakaba bantu banga?

²³ Ntaanzi afue, Yesu waabalandile eevi basambi bakue bakisinka: “Ndikuya kumiteaniizia kifuka [ao, fuasi].” (Yoane 14:2) Keekio kilangiliile nangue bange pakati ka basambi bakue, bakutuntumunua eevi kwikala pamo nakue ku muulu. Ni bantu banga? Yesu waalandile nangue ni mpendua iniini, “libumba liniini.” (Luka 12:32) Mutumua Yoane waazimbuile mpendua iine musita lwaamumuene Yesu “waimeene pa Lupili Sayuni [lwa ku muulu], wali pamo ni bantu mia ni makumi ana na bana elufu (144 000).”​—Nfyulo 14:1, NWT.

²⁴ Bakristu 144 000 baali bakutendeka kutuntumunua musita ki? Bibilia ili yatubuila nangue kutuntumunua kooko kwa kubamba kukitika kisia Kristu kutendeka kuteeka ku muulu. (1 Bakorinto 15:23) Twikeele mu wenka musita uli mukukitika kintu keekio, ni bamo pa Bakristu 144 000 bali mukutuntumunua eevi kuya ku muulu. Baalia bakili pa kyalo, kabili bali mu kufua leenu, kisiasie kufua bali batuntumunua ni kuya ku muulu. Inzi, bantu bengi bakatuntumunua musita uli mukuiza eevi bakeekale mu Paradiso paanu pa kyalo.

25. Twakaba kusambilila ki mu lyasi likoonkelepo?

²⁵ Leenusie, Yehova wakaba kufumia bantu mu buzia bwa lufu, kabili lufu lwakafumiiwapo muyayaya! (Soma Isaya 25:8.) Inzi, baalia bakuya ku muulu, bakaya kukita ki? Bibilia yalondolola nangue bakateeka pamo ni Yesu mu Bukolo Bwakue Leeza. Twakaba kusambilila bingi palua Bukolo bobo mu lyasi likoonkelepo.