1, 2. Naani ali kuviinda kutukingilila mu nsiku yeetu?

 TONTONKANIA ulimukwenda panze mu busiku bwa mwela ukata. Lyulu lyakila kufiita, tumpeni-mpeni twabamba kubeekia, ni bimbuluma byatendeka. Kisia musita uniini nvula yabamba kunoka. Wakeba kwa kwiama. Kine wapata nkeende iteekameene kabili iweeme, uli kuteekiwa mutima kakiine!

² Tuli mu aali ipaleene ni ezio leenu. Aali ya kyalo ili mukukila kubiipa. Kunti waiipuzia eevi, ‘Ni kupi kundikusaanga wakunkingilila?’ Mu Bibilia, kaleemba umo wa Malumbo waaleembele eevi: “Nakamuana Yehova: ‘Uli kibutukilo kyane ni kifyamino kyane, Leeza wane unswapiile.’” (Malumbo 91:2) Kakiine, Yehova kunti watuteekia mutima mu maavia etu leenu, kabili atupeele kiswapilo kiwaamiisie palua musita ulimukwiza.

3. Kunti twamwalula siani Yehova kibutukilo kyetu?

³ Yehova kunti watusuunga siani? Kunti watukwasia kuluisia kubalua buavia butuli naabo, kabili ali ni maka engi kukila kubalua muntu ali kuezia kutukita ovio. Anzia kine leenu twasaangua na kintu kampanda kibiipile, kunti twaaluka ni kisininkizio nangue Yehova wakapuisia buavia bobo musita uli waiza. Bibilia ili yatukoselezia eevi: “Siale mu ntono yakue Leeza.” (Yuda 21, NWT) Tupalile kusiala peepi ni Yehova eevi atukwasie mu nsita ikolele. Inzi, kunti twakita siani evio?

4, 5. Yehova atulangiliile siani ntono?

⁴ Pakuti tusiale peepi ni Yehova, tupalile kwinika Yehova  vyatutonene saana. Tontonkania palua beelia byonse byatukitiile. Waatupeele kyalo kyaweeme saana ni kwizuziapo bimuti ni bikusi byafuaniine, kabili ni ba nama. Kabili waatupeele bilio byaweeme saana ni menda a kumina aswetele. Kupitila Bibilia, Yehova atusambiliziizie liina lyakue ni mibeele yakue iweeme kakiine. Kukila pa bebio byonse, Yehova waatulangiliile ntono yakue musita lwaamutumine Yesu Muana wakue mutonua paanu pa kyalo, eevi atufuile. (Yoane 3:16) Kabili kupitila ezio ngeleelo, tuli ni kiswapilo kyaweeme saana palua musita uli mukuiza.

⁵ Yehova waateaniizie Bukolo bwa Kimasia, buteeko bwa ku muulu bwakaba kupuisia maavia onse leenusie. Bukolo bwakaalula kyalo kuba paradiso, moomo i mwakeekala kila muntu mu mutende ni nsaansa loonse. (Malumbo 37:29) Nzila inge Yehova yatulangiliile ntono, ni kupitila kutusambilizia nzila ya buikazi ikilile kuwaama leenu. Kabili atukupile tupepe kuli weene, kabili eteaniiziesie lyonse kutuilizia mapepo etu. Yehova alangiliile ntono yakue paswetele ku kila umo weetu.

6. Uli kulangilila siani nangue witabiile ntono yakue Yehova?

⁶ Upalile kulangilila siani nangue witabiile ntono yakue Yehova? Langilila nangue usantiile palua byonse byakukitiile. Kya bulanda ni keeki, bantu bengi leenu tebeezi kusantila. I vikyali ni musita Yesu lwabanga pa kyalo. Mu musita kampanda, Yesu waakosiizie bantu likumi baali baluele tembue ao bukoma, inzi umo sie i waamusantiile. (Luka 17:12-17) Tutonene kuba nga ozo muntu waamusantiile Yesu. Lyonse, tutonene kumusantila Yehova.

7. Tupalile kumulangilila siani Yehova nangue tumutonene kakiine?

⁷ Kabili tupalile kulangilila nangue tumutonene Yehova. Yesu waabalandile basambi bakue nangue baali bapalile kumutona Yehova na mutima wabo onse, na mweo wabo onse, kabili na maano abo onse. (Soma Mateo 22:37.) Keekio kili na mana ki?

8, 9. Kunti twamulangilila siani Yehova nangue tumutonene?

 ⁸ Eba, ipalile kupeleelasie pa kulanda nangue tumutonene Yehova? Bila. Kine tumutonene Yehova na mutima weetu onse, na mweo onse, ni maano onse, tuli kumulangilila ntono yeetu kupitila bikitua byetu. (Mateo 7:16-20) Bibilia ili yasambilizia paswetele nangue kine tumutonene Leeza, tuli kukindika milao yakue. Eba, kukita evio kukolele? Ata, paantu “milao yakue [Yehova] te mutembo ufinine.”​—Soma 1 Yoane 5:3, NWT.

⁹ Musita lutuli twamunakila Yehova, tuli twaaluka ni nsaansa ni buikazi butekameene. (Isaya 48:17, 18) Inzi, ni kiki kili kutukwasia kusiala peepi ni Yehova? Kansi tumone.

10. Juu ya ki upalile kutwalilila kusambilila palwakue Yehova?

¹⁰ Waakifikiila siani kwaluka kibuza wakue Yehova? Kupitila kusambilila Bibilia, wakifikiila kumumana buino Yehova ni kukuzia bukibuza pamo nakue. Bukibuza bobo buli nga mulilo u utonene uye watwaliliile kuleema. Nga evelia mulilo viuloombele nkuni eevi kuleema, ni weewe upalile kutwalilila kusambilila palwakue Yehova eevi bukibuza bobe butwalilile kukosa.​—Tuswalo ni Mafunde 2:1-5.

11. Wakaba kunoonkelamo ki mukusambilila Bibilia?

¹¹ Luuli mukutwalilila kusambilila Bibilia, wakaba kusambilila bintu byakaba kukumia kakiine mutima obe. Mona basambi babili bakue Yesu vibaunvuile, musita Yesu lwaabalondoluele bukabika buli mu Bibilia. Baalandile eevi: “Kansi ikitwaba twaunvwiliile mu mitima yeetu kusia muli mukuleema mulilo lolia luaba wali mukutulondoluela Maleembo.”​—Luka 24:32.

12, 13. (a) Ntono yeetu kuli Leeza kunti yaaluka siani? (b) Kunti twakita siani eevi ntono yeetu kuli Yehova itwalilile kuba yakosele?

¹² Nga eveliasie mitima ya basambi viyakumiiziwe  musita ubaaunvuile Maleembo, paange ni weewe waaiunvuile evio vyenka musita luwatendekele kunvua Bibilia. Keekio kyaakukwasiizie kumumana Yehova ni kumutona. Teutona ezio ntono inuame.​—Mateo 24:12.

¹³ Kisiasie kwaluka kibuza wakue Leeza, upalile kukita maka eevi bukibuza bobe butwalilile kukosa. Upalile kutwalilila kusambilila Bibilia palwakue Leeza ni Yesu, kabili ni kutontonkania palua beelia biuli mukusambilila ni viupalile kubibombia mu buikazi bobe. (Yoane 17:3) Musita luuli mukusoma ao kusambilila Bibilia, iipuzie eevi: ‘Bintu binasoma byansambilizia ki palwakue Yehova Leeza? Juu ya ki mpalile kumutona na mutima ni mweo wane onse?’​—1 Timoteo 4:15.

14. Lipepo lili kukwasia siani kukosia ntono yeetu kuli Yehova?

¹⁴ Musita luuli ni kibuza aweeme, uli wamulanzia lyonse, ni kukita evio kuli kwakosia bukibuza bwenu. Evio  vyenka, musita utuli twamulanzia Yehova lyonse kupitila lipepo, kukita evio kuli kwakosia bukibuza bwetu. (Soma 1 Batesalonika 5:17.) Lipepo ni bupe buweeme saana kufuma kuli Baba weetu wa ku muulu. Lyonse, tupalile kumubuila bili ku mutima weetu. (Malumbo 62:8) Te tupalile kubueluluka mapepo atubiikiliile mu maano, inzi, tupalile kulanda beelia bili kakiine ku mutima weetu. Kulanda kisinka, kine twatualilila kusambilila Bibilia ni kupepa kufuma ku mutima weetu, tuli kukosia bukibuza bwetu pamo ni Yehova.

15, 16. Uli wamona siani miilo ya kusimikila?

¹⁵ Kine tutonene kusiala peepi ni Yehova, tupalile kabili kulanda ni bange palua kiketekelo kyetu. Kulanda ni bange palwakue Yehova ni kifulo kya mana saana. (Luka 1:74) Kabili ni kifulo kyaapeelue Bakristu bonse ba kisinka kuli Yesu. Kila umo weetu apalile kusimikila mpunda iweeme ya Bukolo Bwakue Leeza. Eba, waatendekele kale kukita evio?​—Mateo 24:14; 28:19, 20.

¹⁶ Mutumua Paulo waamuene nangue miilo ya kusimikila yaali ya mana saana; waaikuutile miilo ezio kuba “bukonto.” (2 Bakorinto 4:7) Kubabuilako bange palwakue Yehova ni mupaango wakue, i miilo ya mana saana iupalile kubomba. Ezio ni nzila ya kunti umubombele Yehova, kabili ali wamona beelia biuli wamukitila kuba bya mana. (Baebrania 6:10) Kabili kusimikila, kunti kwakukwasia weewe pamo ni baalia bali bakutuilizia, paantu uli mukukwasia bange ni we muine eevi kumupalama Yehova ni kupata bukose bwa loonse. (Soma 1 Bakorinto 15:58.) Kakiine, te kuli miilo inge kukila pa ezio, ili kuviinda kukuleetela nsaansa.

17. Juu ya ki miilo ya kusimikila ni yakukitua lubilo?

 ¹⁷ Miilo ya kusimikila ni ya kukitua lubilo saana. Tupalile ‘kusimikila mulandu,’ kabili tupalile ‘kukita evio na mute.’ (2 Timoteo 4:2, NWT) Bantu bapalile kunvua palua Bukolo Bwakue Leeza. Bibilia ili yalanda nangue: “Busiku bukata bwakue Yehova bwapalama! Bwapalama kabili buli mukuiza lubilo saana!” Mpela “teikaandua kufika pa musita!” (Zefania 1:14; Habakuki 2:3) Kakiine, leenusie, Yehova wakaba kwinoona kyalo kibiipile kyakue Sataana. Ntaanzi keekio tekinakitike, bantu bapalile kukengeziiwa eevi basaakule kumubombela Yehova.

18. Juu ya ki tupalile kumupupa Yehova pamo ni Bakristu bange bakisinka?

¹⁸ Yehova atonene tumupupe pamo ni Bakristu bange bakisinka. Bibilia ili yalanda eevi: “Tukilesie kukinkiziania ni kutonana pamo ni kubomba miilo iweeme. Tekuti tulekele kulonghaana nga mulimwakitila bange, inzi tukoselezianie. Paliibufi ono musita usyaliwapalama kuiza kwakue Mulopue.” (Baebrania 10:24, 25) Tupalile kukita maka etu onse eevi kuba ku kulonghaana konse. Kulonghaana kuli kwatupeela fuasi ya kuteekiana mutima ni kukoseleziana.

19. Ni kiki kili kutukwasia kubatona balupua ni bankazi betu Bakristu?

¹⁹ Kine waya ku kulonghaana, wakaba kupata babibuza baweeme bakakukwasia kumupupa Yehova. Wakaba kusaakaana ni balupua ni bankazi bafumine mu nkeende ilekenkeene, kabili bali ni bumuntu bupusene-puseene, bali bakita maka abo onse eevi kumupupa Yehova nga weewe. Kabili, ni beene te bapuililikile, bali bakita bilubo nga weewe. Kine baluvia, ube waiteaniiziesie kubeleela. (Soma Bakolosai 3:13.) Lyonse, pooza maano ku mibeele iweeme ya balupua ni bankazi bobe Bakristu, kukita evio, kwakakukwasia kubatona ni kukila kumupalama Yehova.

20, 21. “Bukose bwine-bwine” ni kiki?

²⁰ Yehova atonene babibuza bakue bonse babe ni buikazi bukilile kuwaama. Bibilia ili yatusambilizia nangue buikazi bwetu bwa musita uli waiza bwakaba bwaibeleele kakiine ni boonu butuli naabo.

²¹ Mu musita uli waiza, twakeekala loonse, te kubasie kwikala miaka 70 ao 80. Twakasekelela “bukose bwa loonse” bwapuililikile, mutende, ni nsaansa mu paradiso ifuaniine. Bobo i buli bwakuutua na Bibilia “bukose bwine-bwine.” Yehova alaile kutupeela bukose bobo bwine-bwine, inzi, tupalile kukita maka etu onse eevi “kubukwatisia.”​—1 Timoteo 6:12, 19, NWT.

22. (a) Kunti ‘twakwatisia bukose bwine-bwine’ mu nzila ki? (b) Juu ya ki tetuviinda kupata bukose bwa loonse ku maka etu fwe beene?

²² Kunti ‘twakwatisia bukose bwine-bwine’ mu nzila ki? Tupalile kuba ‘twakita bintu biweeme’ ni kuba twali “banoonsi mu miilo iweeme.” (1 Timoteo 6:18) I kulanda nangue tupalile kubombia beelia bituli twasambilila mu Bibilia. Inzi, bukose bwine-bwine tebuswapiile maka etu fwe beene. Tetuviinda ata kaniini kubupata ku maka etu. Ni bupe bwa kwitonena kufuma kuli Yehova ku babombi bakue ba kisinka, mufuano wa “kuwaamia [kwakue] kusipalilue.” (Baroma 5:15, NWT) Baba weetu wa ku muulu atonene kakiine kubapeela babombi bakue bakisinka bupe bobo.

23. Juu ya ki upalile kukita bupinguzi bupalile leenu?

²³ Lipuzie eevi, ‘Eba, ndi mukumupupa Leeza mu nzila yali waitabila?’ Kine wasaanga nangue upalile kukita bupilibuko kampanda, kita evio bila kukokola. Kine twamuswapila Yehova ni kukita maka etu onse eevi kumunakila, Yehova wakaba kibutukilo kyetu. Wakabasuunga bantu bakue ba kisinka mu nsiku ya mpeleezio ya kyalo kibiipile  kyakue Sataana. Kupuako, Yehova wakasininkizia nangue twaikala loonse mu Paradiso, nga evelia vyaalaile. Kakiine, kunti wapata bukose bwine-bwine kine wakita bupinguzi bupalile leenu!