1, 2. Lingi, bantu bali baipuzia biipuzio ki?

 BAANIKE bali baipuzia biipuzio bingi. Kunti waezia kubalondoluela kintu kampanda, inzi, bali batwalililasie kwipuzia ‘Juu ya ki?’ Kine waezia kubaasuka, kunti baipuzia kabili, ‘Inzi, juu ya ki?’

² Fwe bonse anzia kine tuli bamisepuka ao bakulu, tuli twaipuzia biipuzio. Tuli twaipuzia biipuzio palua byakulia, kuvuala ao kusita. Paange, tuli ni biipuzio bya mana saana palua buikazi ni palua musita uli waiza. Inzi, kine twaandua kupata byasuko bipalile bya biipuzio byetu, kunti twalekela kukeba byasuko.

3. Juu ya ki bantu bengi bali batontonkania nangue te baviinda kupata byasuko bya biipuzio byabo bya mana saana?

³ Eba, Bibilia ili ni byasuko bya biipuzio beebio bya mana bituli twaipuzia? Bantu bange kunti baitabizia nangue Bibilia ili ni byasuko, inzi, kuya bamuene nangue Bibilia ikolele saana kunvua. Bali batontonkania nangue bantunguluzi ni bakasambilizia ba ma diini i bali ni byasuko. Ni bange bali baunvua busoni bwa kulanda nangue te bamanine byasuko. Ale weewe uli watontonkania siani?

4, 5. Weewe, uli waiipuzia biipuzio ki? Juu ya ki upalile kutwalilila kukeba byasuko?

⁴ Paange ni weewe utonene kupata byasuko bya biipuzio nga beebi: Sababu ya ki ndi pa kyalo? Nakaaluka siani musita lunakafua? Leeza ali siani? Yesu, kasambilizia amanikile saana, waalandile eevi: “Twalilila kulomba, uli kupeelua; twalilila kukeba uli kupata; twalilila kukokoosia  uli kwizuilua.” (Mateo 7:7, NWT) Te kulekela ata kaniini kukeba, mpaka ukabe kusaanga byasuko bipalile.

⁵ Kisinka, kine “watwalilila kukeba,” uli kupata byasuko mu Bibilia. (Tuswalo ni Mafunde 2:1-5) Byasuko beebio te bikolele kunvua. Byasuko biuli kusambilila, bili kukupeela nsaansa ni buikazi buweeme leenu kabili ni kiswapilo kiweeme palua musita uli waiza. Kansi, tulondololenke palua kiipuzio kimo kili kyaemia saana bantu bengi.

6. Juu ya ki bantu bange bali batontonkania nangue Leeza tapoozele maano ku bantu?

⁶ Bantu bengi bali batontonkania nangue Leeza tatupoozeleko maano. Bali balanda nangue kabeenge Leeza watupoozeleko maano, kyalo nga te kili eevi. Leenu kuli vita, misuula ni maavia fuasi yonse. Bantu bali mukuema, kuluala, ni kufikiila kufua. Kusiali bange babaamba kwiipuzia, ‘kine Leeza atupoozeleko maano, Juu ya ki tali mukukingilila aza maavia?’

7. (a) Bantunguluzi ba ma diini bali balengia siani bantu bamone nangue Leeza tali na nkumbu? (b) Ni kiki kili kyatusininkiziizia nangue Leeza teezi kuleeta maavia ali akitika?

⁷ Mu nsita inge, bantunguluzi ba ma diini bali balengia bantu bamone nangue Leeza tali na nkumbu. Kine kwakitika kintu kibiipile bali balanda nangue ni kutona kwakue Leeza. Bali balanda nangue weene i watonaanga kikitike. Musita ubali balanda evio, bali bamubeepela Leeza. Inzi, Bibilia ili yasambilizia nangue Leeza teezi kuleeta maavia ata kaniini. Yakobo 1:13 yatubuila nangue Leeza teezi kuezia ata muntu na bintu bibiipile. Ili Yalanda eevi: “Kine muntu wabembua na meezio, tekuti alande nangue, ‘nabembua na Leeza.’ Paantu Leeza taviinda  kubembua na bubi, kabili Leeza teezi kubemba muntu.” I kulanda nangue Leeza teezi kukingilila ao kwanzia bintu bibiipile lubili byakitika, inzi, teezi kubileeta ata kaniini. (Soma Yobu 34:10-12.) Tulondoluelenke mufuano umo.

8, 9. Juu ya ki te buino kulanda nangue Leeza i ali watuleetela maavia? Leeta mufuano.

⁸ Waza mulumendo umo ali waikala ku nsesi ya baviazi bakue. Baba wakue amutonene saana kabili ali wamusambilizia vya kukuata bupinguzi bupalile. Kusiali, mulumendo ozo wasanguka kuli baba wakue ni kufuma ku nsesi. Waya kukita bintu bibiipile ni kupata maavia. Eba, kunti walanda nangue baba wakue i wamuleetela maavia paantu taakimukania muana wakue musita lwakifuma ku nsesi? Ata kaniini! (Luka 15:11-13) Nga ozu muviazi, Leeza taabakaniizie bantu musita ubasaakuile kumusangukila ni kukita bintu bibiipile. Kansi kine kintu kibiipile kyakitika, tupalile kulanguluka nangue te Leeza walengia kikitike. Kansi te kili buino kumusikilila Leeza.

⁹ Kuli ni nsaambu ilengiizie Leeza alekelele bintu bibiipile biye byakitika. Mu lyasi lya 11, wakasambilila vilandile Bibilia palua kaako. Inzi, mana nangue Leeza atutonene kabili teezi ata kaniini kutuleetela maavia atulinao. Kakiine, weenesie bunke i wakutupususia.​—Isaya 33:2.

10. Juu ya ki tuli ni kisininkizio nangue Leeza wakafumiapo bubiifi bonse buleetelue na bantu babiipile?

¹⁰ Leeza ni mutakatiifu. (Isaya 6:3) Pakaako, bintu byonse byali wakita bitakeete, biswetele kabili, biweeme. Kansi kunti twamuswapila. Bantu te bali nga weene. Beene musita unge bali bakita bisipalile. Kabili, atasie kateeka wakisinka ao aweeme tali na maka a kupuisia bubiifi buleetelue na bantu babiipile. Te kuli muntu ata umo ali ni maka nga akue Leeza. Ali ni buviinde kabili wakawamia  bintu byonse biinoonenue na bantu babiipile. Wakafumiapo bubiifi loonse.​—Soma Malumbo 37:9-11.

11. Leeza ali waiunvua siani luuli wasaanga maavia?

¹¹ Leeza ali waiunvua siani musita lwali wamona bintu bili byakitika mu kyalo pamo ni maavia auli mukusaanga mu buikazi bobe? Bibilia ili yasambilizia nangue “Leeza atonene nsaambu.” (Malumbo 37:28) Kansi, ali waemena saana bintu biweeme ni vya kupuisia bintu bibiipile. Ali wasuula saana musita bantu lubali mu maavia. Bibilia ilandile eevi “mutima wakue waakisile” musita lwaamuene mu kyalo mwaizuzisie bintu bibiipile mu nsita ya kale. (Kutendeka 6:5, 6) Leeza tanapilibuke. (Malaki 3:6) Bibilia ili yalanda nangue, kakiine Leeza akupoozeleko maano.​—Soma 1 Petro 5:7.

12, 13. (a) Ni kiki kili kyalengia tubatone ni kubeemena bange, kabili tuli twaiunvua siani palua maavia ali mu kyalo? (b) Kunti twaaluka siani ni kisininkizio nangue Leeza wakapuisia maavia ni kubulua kwa nsaambu?

¹² Kabili, Bibilia ili yalanda nangue Leeza waatubumbile mu kipalo kyakue. (Kutendeka 1:26) I kulanda nangue, Leeza waatumbule twali ni mibeele iweeme nga yakue. Kine uli wakisua mu mutima musita luuli wamona bantu basili na kilubo baema, mana nangue Leeza ali wakisua kukilapo! Twamana siani evio?

¹³ Bibilia ili yatusambilizia nangue “Leeza i ntono.” (1 Yoane 4:8) Kila kintu kyaliwakita, Leeza ali wasonseziiwa na ntono. Ni fwefue tuli twatona, paantu Leeza ali watona. Tontonkanianke: Kabenge wali ni maka, eba, nga wakipuisia maavia onse ni kubulua kwa nsaambu mu kyalo? Kakiine nga wakikita evio, paantu ubatonene bantu. Ale Leeza? Ali ni maka, kabili paantu atutonene,  wakaba kufumiapo kwema konse pamo ni kubulua kwa nsaambu. Kunti waaluka ni kisininkizio nangue kila bulayo bulailue na Leeza, buli ku ntendeko ya keeki kitabu bwakakitika! Inzi, pakunti uzumine bulayo bobo, upalile kumana bingi palwakue Leeza.

14. Zimbula liina lyakue Leeza. Twamana siani nangue tupalile kulibombia?

¹⁴ Kine wakeba kukita bukibuza ni muntu kampanda, uli wabambanke kumubuila ki? Liina lyobe, ati? Eba, Leeza ali ni liina? Ma diini engi ali asambilizia nangue liina lyakue ni Leeza ao Mulopue, inzi, aazo te meena akue a bunke. Ni meena a mukinzi, nga evelia “Likolo” ao “Prezida”. Leeza ali watubuila nangue liina lyakue ni Yehova. Malumbo 83:18 ili yalanda: “Eevi bantu bamane nangue weewe, liina lyobe ni Yehova, weewe sie bunke i Wapamuulu Saana pa kyalo kyonse.” Bakaleemba ba Bibilia baabombiizie liina lyakue Leeza mara ikilile pa 7 000. Yehova atonene tulimane liina lyakue kabili tulibombie. Wakubuila liina lyakue eevi waluke kibuza wakue.

15. Liina Yehova lili na mana ki?

¹⁵ Liina lyakue Leeza, Yehova, lili ni mana ikata. Mana yakue ali wafikilizia kila bulayo  bwalikulaya ni kukita kila kintu kyali kutona. Te kuli kintu kili kumwanzia. Ni Yehova sie bunke i apalile kuya waali ni leeli liina. a

16, 17. Aza meena ali na mana ki (a) “Wamaka Onse”? (b) “Likolo wa muyayaya”? (c) “Kabumba”?

¹⁶ Kyaleembua kya Malumbo 83:18 kitwasomanga ku ntaanzi, kili kyalanda eevi palwakue Yehova: “Weewe sie bunke i Wapamuulu Saana.” Ni, Nfyulo 15:3 ili yalanda  eevi: “Miilo yobe ni ikata kabili ya kupapia, Yehova Leeza, Wamaka Onse. Nzila yobe ni ya nsaambu kabili ya kisinka, Likolo wa muyayaya.” Liina lya mukinzi “Wamaka Onse” lili na mana ki? Mana yakue, Yehova i ali ni maka engi kukila muntu onse ali pa kyalo. Kabili, liina “Likolo wa muyayaya” mana yakue, weene ali wasanguakosie loonse. Malumbo 90:2 yalondolola nangue tali na ntendeko kabili tali na mpela. Kakiine keekio ni kyakupapia saana!

¹⁷ Yehova sie bunke i Kabumba. Nfyulo 4:11 ili yalanda nangue: “We Mulopue Leeza weetu! Bulumba ni mukinzi pamo ni maka ni byobe. Paantu weewe i waalengele byonse, ni kupitila mukutona kobe, pabili byakosele.” Kakiine, bamalaika bali ku muulu, ntanda ili mu lyulu, mazabo ali ku bimuti, tusabi tuli mu menda, ni kubalua kintu kiuli kutontonkania, kyabumbilue na Yehova!

18. Juu ya ki bantu bange bali batontonkania nangue te baviinda kukita bukibuza pamo ni Leeza? Bibilia yeene ili yalanda siani?

¹⁸ Bantu bange, musita ubali basoma palua mibeele yakue Yehova, bali baunvua muenzo ni kutontonkania nangue ‘Leeza ali ni maka saana, akindeeme ao mukulu saana kabili ali kule saana, kunti wangemena neene kakiine? Eba, Leeza atonene twiunvue evio ? Atasie kaniini. Yehova atonene tumupalame. Bibilia ili yalanda nangue “Tali kule ni fwefue [ni kila umo weetu].” (Miilo 17:27) Leeza atonene umupalame, kabili walaya nangue “ali kukupalama.”​—Yakobo 4:8.

19. (a) Kunti wakita siani eevi waluke kibuza wakue Yehova? (b) Pa mibeele yonse yakue Yehova, ni ilipi iutoneesie?

¹⁹ Kunti wakita siani eevi waluke kibuza wakue Leeza? Yesu waalandile: “Bukose bwa muyayaya ni bobu: kukumana weewe bunke Leeza wa kiine, ni Yesu Kristu uwaatumine.” (Yoane 17:3) Twalilila kusambilila, wakaba kumumana Yehova ni Yesu. Ni kangeko, wakapata bukose bwa loonse. Kwa mufuano, twakisambilila kale nangue “Leeza i ntono.” (1 Yoane 4:16) Inzi, ali ni mibeele inge ingi iweeme. Bibilia ili yatubuila nangue Yehova ali “waeleela” kabili weene ni wa nkumbu, teezi kuleenga kufiitua, kabili ali ni ntono ikata ya kiine kabili ni “kisinka.” (Kufuma 34:6) Yehova “aweeme kabili alengele kweleela.” (Malumbo 86:5) Leeza ali wapembelela kabili weene ni wakisinka. (2 Petro 3:9; Nfyulo 15:4) Wakaba kusambilila bingi saana palua eezi mibeele yakue iweeme yuli mukusoma mu Bibilia.

20-22. (a) Kunti twamupalama siani Leeza anzia kine te twamumona? (b) Upalile kukita siani kine muntu wakeba kukukania kusambilila Bibilia?

²⁰ Kunti wamupalama siani Leeza anzia kine te  wamumona? (Yoane 1:18; 4:24; 1 Timoteo 1:17) Kine wasoma mu Bibilia palwakue Yehova, uli kumana nangue weene ni muntu kisinka. (Malumbo 27:4; Baroma 1:20) Kine watwalilila kusambilila bingi palwakue Yehova, uli kufikiila kumutona saana ni kumupalama.

²¹ Uli kwinika nangue Yehova ni Baba weetu. (Mateo 6:9) Waatupeele bukose, kabili atonene tuye twali ni buikazi buweeme, nga evelia baba ali ni ntono vyali watona baana bakue baye baali. (Malumbo 36:9) Kakiine, Bibilia ili yasambilizia nangue kunti waaluka kibuza wakue Yehova. (Yakobo 2:23) Tontonkanianke, Yehova, Kabumba wa kyalo, atonene weewe waluke kibuza wakue!

²² Bantu kampanda kunti bakulanda ulekele kusambilila Bibilia. Kunti batiina nangue, uli kusia diini yobe. Inzi, te kulekeela muntu ata umo akwanzie kwaluka kibuza wakue Yehova. Weene i kibuza aweeme uupalile kuya waali nakue loonse.

23, 24. (a) Juu ya ki upalile kutwalilila kwipuzia biipuzio? (b) Twakaba kulondoluela ki mu lyasi likonkelepo?

²³ Musita uwatwalilila kusambilila Bibilia, kuli ni bintu binge biusikaba kunvua. Te kunvua busoni bwa kwipuzia ao kuloomba bakukwasie. Yesu waalandile nangue tupalile kwikoosia nga baanike. (Mateo 18:2-4) Baanike, bali baipuzia saana biipuzio. Leeza atonene upate byasuko. Kansi, sambilila Bibilia wapoozeleko saana maano eevi waluke ni kisininkizio nangue biuli mukusambilila ni bya kisinka.​—Soma Miilo 17:11.

²⁴ Nzila iweeme ya kukukwasia kumumana Yehova, ni kusambilila Bibilia. Mu lyasi likonkelepo, twakaba kumana sababu ya ki Bibilia ipuseene saana ni bitabu binge.