1. Kunti watontonkania ki kisia kusambilila keeki kitabu wapoozeleko saana maano?

 WAKISAMBILILA bisinka bingi bya Bibilia mu keeki kitabu, nga evelia bulayo bwakue Leeza palua bukose bwa loonse, vili bantu bafuile, ni kiswapilo palua kutuntumunua. (Kasimika 9:5; Yoane 5:28, 29; Nfyulo 21:3, 4) Paange wakitendeka kuya ku kulonghaana kwa Bakasininkizia Bakue Yehova ni kuzumina nangue bali bakita lupupo lwa kisinka. (Yoane 13:35) Ni paange wakitendeka kukosia bukibuza bwa peepi pamo ni Yehova, kabili  paange wakipingula nangue utonene kumubombela. Pakaako kunti watontonkania eevi, ‘Mpalile kukita ki loonu eevi kumubombela Leeza?’

2. Juu ya ki Muetiopia waatonene abatiziiwe?

² Evio i vyaatontonkaniizie Muetiopia umo waali waikeele mu nsiku yakue Yesu. Nsita kampanda kisia Yesu kutuntumunua, Filipo musambi wakue Yesu waamusimikiile ozo muntu. Filipo waamusininkiziizie nangue Yesu waali Masia. Muetiopia waasonseziiziwe kakiine na beelia byaasambiliile, ni penka paapo waalandile eevi: “Mona menda aza. Ni kiki kili kunghanzia kubatiziiwa?”​—Miilo 8:26-28, 30-36.

3. (a) Yesu waabanine ki basambi bakue? (b) Muntu apalile kubatiziiwa siani?

³ Bibilia ili yasambilizia pasili kufiika nangue kine utonene kumubombela Yehova, upalile kubatiziiwa. Yesu waabalandile basambi bakue eevi: ‘Kite basambi kufuma ku bantu ba mu ntundu yonse, ni kubabatizia.’ (Mateo 28:19, NWT) Ni Yesu muine, waabiikile mufuano kupitila kubatiziiwa. Taazumiiziwe menda pa mutue, inzi, waaibiziziiwe ye onse mu menda. Bibilia ili yalanda eevi: “Kisia kubatiziiwa, paalia penka Yesu waafumine mu menda; kabili mona! myulu yaizukile, kabili wamuene mupasi wakue Leeza wakooka nga kakunda ni kuiza pali weene.” (Mateo 3:16, NWT) Leenu kine Mukristu watona kubatiziiwa, apalile ni weene kwibiziiwa ao kututubikua ye onse mu menda.

4. Kubatiziiwa koobe kwabalangilila ki bange?

⁴ Musita luwabatiziiwa, keekio kyalangilila bange nangue utonene kakiine kwaluka kibuza wakue Leeza, kabili utonene kumubombela. (Malumbo 40:7, 8) Ni pakaako, kunti waiipuzia eevi: ‘Mpalile kukita ki eevi kubatiziiwa?’

5. (a) Upalilenke kukita ki ntaanzi teunabatiziiwe? (b) Juu ya ki kulonghaana kwa Kikristu ni kwa mana?

⁵ Ntaanzi teunabatiziiwe, upalile kufikiila kumumana Yehova ni Yesu. Waabambile kukita evio musita luwaatendekele kusambilila Bibilia. (Soma Yoane 17:3.) Inzi, te upalile kupeleelasie paapo. Bibilia ili yalanda nangue upalile kuba ‘waizuziiziwe kumana kusili na kilubo’ kwa kutona kwakue Leeza. (Bakolosai 1:9, NWT) Kulonghaana kwa Bakasininkizia Bakue Yehova kuli kukukwasia kuba ni bukibuza bwa peepi pamo ni Yehova. Ezio ni imo pa nsaambu ya mana ya kuba wasaangua lyonse ku kulonghaana kooko.​—Baebrania 10:24, 25.

6. Eba, Yehova aloombele umane kila kintu kili mu Bibilia ntaanzi ya kubatiziiwa? Londolola.

⁶ Kulanda kisinka, Yehova takuloombele umane kila kintu kili mu Bibilia ntaanzi ufikiile kubatiziiwa. Taamuloombele Muetiopia amane kila kintu ntaanzi abatiziiwe. (Miilo 8:30, 31) Kabili twakatwalilila kusambilila palwakue Leeza loonse. (Kasimika 3:11) Inzi, eevi kubatiziiwa, upalile kumana ni kwitabila masambilizio a musinzi a Bibilia.​—Baebrania 5:12.

7. Lisambililo lyobe lya Bibilia lyakikukwasia siani?

⁷ Bibilia ili yalanda eevi: “Pasili kiketekelo, tekuli muntu wakumuwamiizia Leeza.” (Baebrania 11:6) Pakaako, upalile kuba ni kiketekelo ntaanzi ya kubatiziiwa. Bibilia ili yatubuila nangue bantu kampanda mu muzi wa kale wa Korinto, baaunvuile beelia byaasambiliziiziwe na basambi bakue Yesu, ni pakaako, “baazumiine ni kubatiziiwa.” (Miilo 18:8) Evio vyenka, lisambililo lyobe lya Bibilia lyakikukwasia kuba ni kiketekelo mu bulayo bwakue Leeza ni mu maka a ngeleelo yakue Yesu, ezio ili kuviinda  kutulubula kufuma mu lizaambi ni lufu.​—Yoshua 23:14; Miilo 4:12; 2 Timoteo 3:16, 17.

8. Ni kiki kyakaba kukukinkizia kubuilako bange beelia biwakisambilila?

⁸ Luwakila kusambilila Bibilia ni kumona viili mukukukwasia mu buikazi bobe, kiketekelo kyobe kili kukila kukosa. Uli kutona kubuilako bange beelia biuli mukusambilila. (Yeremia 20:9) Inzi, ni baani baupalile kubuilako?

9, 10. (a) Kunti wabamba kulondolola ni baani palua beelia biwakisambilila? (b) Upalile kukita ki kine utonene kusimikila pamo ni kilonghaano?

⁹ Kunti watona kubuilako bantu ba mu lupua lobe, babibuza bobe, bantu baupalameene naabo, ao babombi noobe palua beelia biuli mukusambilila. Kili buino kukita evio, inzi lyonse kita evio mu nzila iweeme kabili ya ntono. Kupuako, wakaba kuviinda kusimikila pamo ni kilonghaano. Musita luwaiunvua nangue witeaniizie kukita evio, kunti wamubuila Kasininkizia ali wakusambilizia Bibilia, kabili mubuile nangue utonene kusimikila pamo ni kilonghaano. Kine ni weene waamona nangue witeaniizie, kabili kine ukoonkele mafunde a Bibilia mu buikazi bobe, weewe ni weene muli kusakaana pamo ni bakote babili ba mu kilonghaano.

¹⁰ Ni kiki kili kukitika musita umuli kukolonghana? Bakote bali kulondolola pamo ni weewe eevi kumona kine umanine ni kuzumina masambilizio a musinzi a Bibilia, kine uli wanakila mu buikazi bobe bwa kila busiku beelia bili byasambilizia Bibilia, kabili kine utonene kakiine kwaluka umo wa Bakasininkizia Bakue Yehova. Languluka nangue bakote bali baemena kubalua muntu mu kilonghaano, pamo ni weewe, kansi te kunvua muenzo  wa kulondolola pamo naabo. (1 Petro 5:2, 3) Kisia kwikala naabo, bakote bali kukubuila kine kunti wabamba kusimikila pamo ni kilonghaano.

11. Juu ya ki ni kya mana saana kukita bupilibuko ntaanzi usimikile ni kilonghaano?

¹¹ Paange bakote kunti bakubuila nangue upalile kukita kabili bupilibuko bunge ntaanzi ya kutendeka kusimikila pamo ni kilonghaano. Juu ya ki ni kintu kya mana kukita bupilibuko bobo? Paantu lutuli twalondolola ni bange palwakue Leeza, tuli twakita evio pa fuasi yakue Yehova, kabili tupalile kuba ni buikazi buli bwamuleetela mukinzi.​—1 Bakorinto 6:9, 10; Bagalatia 5:19-21.

12. Juu ya ki bantu bonse bapalile kulapila?

¹² Kuli ni kinge kiupalile kukita ntaanzi ubatiziiwe. Mutumua Petro waalandile eevi: “Kansi, lapile ni kupilibuka eevi mazaambi enu avutuwe.” (Miilo 3:19, NWT) Kulapila kuli na mana ki? Mana yakue ni kunuuna kakiine palua kilubo kyokyonse kitukitile. Kwa mufuano, kine waakitile bintu bya bupungue mu buikazi bobe, upalile kulapila. Kabili, anzia kine mu buikazi bobe wakiba waikwinda saana kukita biweeme, upalilesie kulapila paantu fwe bonse tuli ba mazaambi kabili tupalile kumuloomba Leeza atweleele.​—Baroma 3:23; 5:12.

13. “Kupilibuka” kuli na mana ki?

¹³ Eba, upalile kupeleelasie pa kunuuna palua beelia biwakikita? Bila. Petro waalandile nangue upalile kabili “Kupilibuka.” I kulanda nangue upalile kulekela kubalua lwendo lobe lwa kale lubiipile ni kubamba kukita biweeme. Tulande, ulimukuya ku nkeende kampanda kuusinaye ata limo. Kusiali wainika nangue uzeezele. Uli kukita siani? Kakiine uli kukeefia lwendo, kwimana  ni kupilibuka, ni kabili uli kuya mu nzila ipalile. Evio vyenka, luuli mukusambilila Bibilia, kunti wafikiila kwinika nangue kuli mibeele ao bintu kampanda mu buikazi bobe biupalile kwalulula. Ube waiteaniiziesie “kupilibuka”​—i kulanda nangue kukita bupilibuko bupalile ​—ni kutendeka kukita biweeme.

14. Uli kwipeela siani kuli Yehova?

¹⁴ Kintu kinge kya mana kiupalile kukita ntaanzi ubatiziiwe ni kwipeela kuli Yehova. Musita wa kwipeela kuli Yehova, uli kukita lipepo kuli weene, ni mu leelio lipepo uli kumulaya kumupupa weene sie bunke ni kumona kukita kutona kwakue kuba kintu kikilile kuba kya mana mu buikazi bobe.​—Malanguluzi a Mizilo 6:15.

15, 16. Ni kiki kili kyamusonsezia muntu kwipeela kuli Yehova?

¹⁵ Kulaya kumubombelasie Yehova bunke, kuli nga evelia kulaya kupisia buikazi bukusialiileko pamo ni muntu u utonene. Waza mwalalume ni mwanakazi bali mukukita bukibuza. Musita mwalalume lwamumana buino mwanakazi, ali kukila kumutona ni kukeba kumuupa. Anzia kine kukita evio ni bupinguzi bufinine, mwalalume ali kwitabila kifulo keekio walengeelue paantu amutonene mwanakazi.

¹⁶ Luuli mukutwalilila kusambilila palwakue Yehova, uli kufikiila kumutona ni kukeba kukita maka obe onse eevi kumubombela. Keekio kili kukusonsezia kukita lipepo lya kulaya kumubombela. Bibilia ili yalanda nangue kubalua olia atonene kumukoonka Yesu apalile ‘kwikaana.’ (Marko 8:34, NWT) Kukita evio kuli na mana ki? Mana yakue wabiika kumunakila Yehova pa nkeende ya mambo mu buikazi bobe. Beelia bitonene Yehova ni bya  mana saana kukila nkulu ni mipaango yobe.​—Soma 1 Petro 4:2.

17. Ni kiki kilengele bantu kampanda tekuti bepeele kuli Yehova?

¹⁷ Bantu kampanda bali batiina kwipeela kuli Yehova, paantu bali baunvua muenzo nangue te baviinda kufikilizia bulayo bwabo bwa kumubombela. Te batonene kulengia Yehova afiitue, ao kunti batontonkania nangue kine te bepeele kuli Yehova, takabapingula palua beelia bibali mukukita.

18. Ni kiki kyakakukwasia kuanzia muenzo wa kumulengia Yehova afiitue?

¹⁸ Ntono yobe kuli Yehova yakakukwasia kuanzia muenzo wa kumulengia afiitue. Paantu umutonene, wakakita maka obe onse eevi kufikilizia bulayo bobe. (Kasimika 5:4; Bakolosai 1:10) Teukatontokania nangue kukita kutona kwakue Yehova kukolele saana. Mutumua Yoane waaleembele eevi: “Eezi i mana ya kumutona Leeza, nangue tunakile milao yakue; ni milao yakue te mutembo ufinine.”​—1 Yoane 5:3, NWT.

19. Juu ya ki te upalile kunvua muenzo wa kwipeela kuli Yehova?

¹⁹ Eevi kwipeela kuli Yehova, te iloombele ube wapuililikile. Ta tuloombele ata kaniini tukite bintu bikilile buviinde bwetu. (Malumbo 103:14) Wakakukwasia kukita bintu biweeme. (Isaya 41:10) Muswapile Yehova na mutima obe onse, kabili “wakalungika tuila toobe.”​—Tuswalo ni Mafunde 3:5, 6.

20. Ni kiki kiupalile kukita kisia kwipeela kuli Leeza?

²⁰ Eba, watontonkania nangue witeaniizie kwipeela kuli Yehova? Kisia kwipeela kuli Yehova, uli kuba waiteaniizie palua kintu kikoonkelepo. Upalile kubatiziiwa.

21, 22. Kunti wafikiila siani “kupunda ntaanzi ya bonse” palua kiketekelo kyobe?

 ²¹ Mubuile mukote emaniine kabungue ka bakote ka mu kilonghaano kyobe nangue waakipeela kuli Yehova, kabili utonene kubatiziiwa. Kisia ali kuana bakote kampanda batoosie pamo noobe masambililo a musinzi a Bibilia. Kine bamona nangue upalile, bakaba kukubuila nangue kunti wabatiziiwa ku kulonghaana kukata kwa Bakasininkizia Bakue Yehova kuli mukuiza. Ku kulonghaana kooko, kwakalandua lyasi lilondoluele  mana ya lubatizio. Kisia mulanzi wakabepuzia baalia beteaniizie kubatiziiwa biipuzio bibili bileengele. Kupitila kwasuka biipuzio bebio, ‘wakapuunda ntaanzi ya bonse’ palua kiketekelo kyobe.​—Baroma 10:10, NWT.

²² Kupuako wakabatiziiwa. Wakebiziiwa we onse pa menda. Lubatizio lwakalangilila kila muntu nangue waakipeela kuli Yehova kabili nangue waaluka umo wa Bakasininkizia Bakue Yehova.

23. Kubatiziiwa “mu liina lyakue Baba ni lyakue Muana ni lya mupasi utakatiifu” kuli na mana ki?

²³ Yesu waalandile nangue basambi bakue bakubatiziiwa “mu liina lyakue Baba, lyakue Muana ni lya mupasi utakatiifu.” (Soma Mateo 28:19, NWT) Keekio kili na mana ki? Mana yakue wainika buviinde ao bukulu bwakue Yehova ni kifulo ao miilo yakue Yesu mu mupaango wakue Leeza, ni kabili wainika Leeza vyali wabombia mupasi wakue utakatiifu eevi kufikilizia kutona kwakue.​—Malumbo 83:18; Mateo 28:18; Bagalatia 5:22, 23; 2 Petro 1:21.

24, 25. (a) Lubatizio lulangiliile ki? (b) Twakaba kulondoluela ki mu lyasi lya mpeleezio?

²⁴ Lubatizio lulangiliile kintu kampanda kya mana saana. Musita luwaibiziiwa mu menda, kyalangilila nangue wafua, ao walekenkana ni buikazi bobe bwa kale. Musita luwafuma pa menda, watendeka buikazi bwa leenu bwa kukita kutona kwakue Leeza. Lubatizio, lwalangilila nangue kutendekela paapo wakaba kumubombela Yehova. Languluka nangue tewipeele ku muntu, ao ku kuteania aosie ku miilo. Yehova i uwakipeela buikazi bobe.

²⁵ Kwipeela kobe kuli Leeza kwakakukwasia kukuzia bukibuza bwa peepi pamo nakue. (Malumbo 25:14) Keekio te kilangiliile nangue muntu wakapusukasie paantu wabatiziiwa. Mutumua Paulo waaleembele eevi: “Twalilile kubombela bupusuko bwenu mwe beene, mwali ni muenzo kabili mwatutuma.” (Bafilipi 2:12, NWT) Kubatiziiwa ni ntendekosie. Inzi, kunti wasiala siani peepi ni Yehova? Lyasi lya mpeleezio lya keenu kitabu, lyakaba kwasuka kiipuzio keekio.