1, 2. Ni kiki kyalengia umone lipepo kuba bupe bwiibeleele saana, kabili juu ya ki tupalile kumana beelia bili byasambilizia Bibilia palua lipepo?

 KINE kyapalaniiwa ku ntanda ingi ili mu lyulu, kyalo ni kiniini saana. Musita Yehova lwali wakenta pa kyalo, bantu bali mu ntundu yonse bali bamonekasie nga ka litooni kaniini saana ka menda kali mu mbeketi. (Malumbo 115:15; Isaya 40:15) Anzia kine tuli tu bantu tuniini saana kupalania na myulu ni kyalo, Malumbo 145:18, 19 ili yalanda nangue: “Yehova ali peepi ni bonse baalia bali bamukuuta, bonse bali bamukuuta mu kisinka. Ali wafikilizia nkulu ya bonse bali bamutiina; ali waunvua kulila kwabo kwa kuloomba bakwasiiwe, kabili ali wabapususia.” Kakiine tuli ni lisyuko likata! Yehova Kabumba wamaka onse atonene kutupalama, kabili atonene kutuilizia mapepo etu. Kakiine, lipepo ni lisyuko, ni bupe bwiibeleele Yehova bwapeele kila umo weetu.

² Inzi, Yehova ali kututuiliziasie kine twalondolola nakue mu nzila yali waitabila. Kunti twakita siani evio? Kansi, tumone beelia bili byalanda Bibilia palua lipepo.

3. Juu ya ki upalile kupepa kuli Yehova?

³ Yehova atonene upepe, ao umulanzie. Twamana siani evio? Twapapaata Soma Bafilipi 4:6, 7. Tontonkania palua mukupo ozo uweeme. Kabumba wa myulu ni kyalo akupoozeleko saana maano, kabili atonene umubuile maavia obe ni viuli waiunvua.

4. Kupepa lyonse kuli Yehova kuli kukosia siani bukibuza bobe pamo nakue?

 ⁴ Lipepo lili lyatukwasia kuba ni bukibuza bwa peepi pamo ni Yehova. Musita babibuza lubali babuilana lyonse malanga abo, bintu bili byabeemia ni vibali baiunvua, bukibuza bwabo buli bwakila kukosa. I vili ni kupepa kuli Yehova. Kupitila Bibilia, Yehova ali wakubuila vyali watontonkania ni vyali waiunvua, kabili ali wakubuila beelia byali wakakita musita uli waiza. Ni weewe kunti wamubuila vyuli waiunvua mukati mobe kupitila kulondolola nakue lyonse. Kine wakita evio, bukibuza bobe pamo ni Yehova buli kukila kukosa.​—Yakobo 4:8.

5. Twamana siani nangue Yehova teezi kutuilizia mapepo onse?

⁵ Eba, Yehova ali watuilizia mapepo onse? Bila. Mu nsita yakue kabika Isaya, Yehova waabalandile eevi Baisraeli: “Anzia mukite mapepo engi, nsiizi kutuilizia; minue yeenu izuzi milopa.” (Isaya 1:15) Kansi, kine te tukengeele kunti twafikiila kukita bintu bili kutuswempa kule ni Yehova, keekio kili kulengia Yehova tekuti etabile mapepo etu.

6. Juu ya ki kiketekelo ni kya mana saana? Uli kulangilila siani nangue uli ni kiketekelo?

 ⁶ Kine tutonene Yehova atuilizie mapepo etu, tupalile kuba ni kiketekelo muli weene. (Marko 11:24) Mutumua Paulo waalondoluele eevi: “Pasili kiketekelo, tekuli muntu wakumuwamiizia Leeza, paantu kubalua muntu ali wamupalama Leeza, apalile kuya waketekeele nangue Leeza kwali, kabili nangue Leeza ali walambula baalia bali bamuketekela.” (Baebrania 11:6) Inzi, teiloombelesie kulanda nangue tuli ni kiketekelo. Tupalile kulangilila kiketekelo kyetu paswetele kupitila kumunakila Yehova kila busiku.​—Soma Yakobo 2:26.

7. (a) Juu ya ki tupalile kuba twaikeefiizie kabili ni mukinzi lutuli mukupepa kuli Yehova? (b) Kunti twalangilila siani nangue lipepo lyetu lifumine ku mutima?

⁷ Tupalile kuba twaikeefiizie, kabili ni mukinzi lutuli mukupepa kuli Yehova. Juu ya ki? Kine twaya kulondolola ni likolo ao prezida, tuli kukita evio mu nzila ya mukinzi. Yehova ni Leeza Wamaka Onse, kansi kuli weene i kutupalile kwikeefia ni kulangilila mukinzi ukililepo musita utuli mukumulanzia. (Kutendeka 17:1; Malumbo 138:6; 1 Petro 5:5) Kabili, tupalile kupepa kuli Yehova kufuma ku mutima, te kuba twabueluluka lyonse milandu imonke. Tupalile kumubuila beelia bitukabiile kakiine.​—Mateo 6:7, 8.

8. Kine twapepa palua kintu kampanda, tupalile kukita ki kinge?

⁸ Kupuako, musita utuli mukupepa palua kintu kampanda, tupalile kukita maka etu onse eevi kubombela palua keelia kitwapepanga. Kwa mufuano, kine twamuloomba Yehova bintu bitukabiile bya kila busiku, te tupalile kabili kwaluka bananghani ni kupembelelasie Yehova atupeele kila kintu, anzia kine tuli ni maka a kubomba eevi kubipata. Tupalile kubomba saana ni kwitabila kubalua miilo ituli ni buviinde bwa kukita. (Mateo 6:11; 2 Batesalonika 3:10)  Kabili, kine twapepa kuli Yehova atukwasie tulekele kukita kintu kampanda kibiipile, tupalile kutiina kubalua aali ili kutuingizia mu bwezio. (Bakolosai 3:5) Kansi loonu, tumone biipuzio kampanda bili byaipuziiwa saana palua lipepo.

9. Tupalile kupepa kuli ni? Lileembo lya Yoane 14:6 lyatusambilizia ki palua lipepo?

⁹ Tupalile kupepa kuli ni? Yesu waabasambiliziizie basambi bakue kupepa kuli “Situe [ao, Baba weetu] wa mwiulu.” (Mateo 6:9) Kabili waalandile eevi: “Nene i nzila, nene i kiine [ao, kisinka], nene i bukose. Tekuli muntu wakuya kuli Tawe [ao, Baba] kine tapitiile muli nene.” (Yoane 14:6) Kansi, tupalile kupepa kuli Yehova sie bunke kupitila Yesu. Kupepa kupitila muli Yesu kuli na mana ki? Pakunti Yehova etabile mapepo etu, tupalile kulangilila mukinzi palua kifulo ao muilo wiibeleele waapeelue Yesu kuli Yehova. Nga vitwakisambilila, Yesu waaizile pa kyalo eevi kutupususia kufuma mu lizaambi ni lufu. (Yoane 3:16; Baroma 5:12) Kabili Yehova amubiikile Yesu kuba Kitambua ao Koani Mukulu ni Mupinguzi.​—Yoane 5:22; Baebrania 6:20.

10. Eba, tupalile kuba mu aali imo eevi iibeleele musita utuli mukupepa? Londolola.

¹⁰ Eba, tupalile kuba mu aali imo iibeleele musita utuli mukupepa? Bila, Yehova tatuloombele kufukama, kwikala, ao kwimana, musita utuli mukupepa. Bibilia ili yatusambilizia nangue kunti twalondolola ni Yehova mu aali yonse ilangiliile mukinzi. (1 Milandu ya Nsiku 17:16; Nehemia 8:6; Danieli 6:10; Marko 11:25) Kya mana saana kuli Yehova te aali itulimo musita lutuli mukupepa, inzi kulanda nakue na mukinzi kabili kufuma ku mutima i bintu bya mana kuli weene. Kunti twapepa na lizui, mu kansongia ao ku mutima ku fuasi konse kutuli ibe ni busiku ao koba. Lutuli mukupepa kuli Yehova, kunti twaswapila nangue  ali kututuilizia anzia kine tekuli muntu unge atutuiliziizie.​—Nehemia 2:1-6.

11. Kunti twamuloomba Yehova bintu ki kampanda?

¹¹ Kunti twapepa palua bintu ki? Kunti twapepa palua kila kintu kiitabiilue na Yehova. Bibilia ili yalanda eevi: “Kine twamuloomba Leeza kubalua kantu kukoonkana ni mwatoneene, ali watunvua.” (1 Yoane 5:14) Eba, kunti twapepa palua bintu byetu bunke? Een. Kupepa kuli Yehova kupalile kuba nga evelia kulondolola na kibuza wa peepi. Kunti twamubuila Yehova kubalua kintu kili mu maano ao ku mutima weetu. (Malumbo 62:8) Kunti twamuloomba atupeele mupasi utakatiifu utukwasie kukita bintu bipalile. (Luka 11:13) Kabili kunti twamuloomba Yehova mulangue eevi kukwata bupinguzi buweeme, kabili kunti twamuloomba maka a kuluisia maavia. (Yakobo 1:5) Tupalile kumuloomba Yehova atweleele mazaambi etu. (Baefeso 1:3, 7) Kabili tupalile kupepelako ni bange, pamo ni lupua lwetu ni balupua ni bankazi mu kilonghaano.​—Miilo 12:5; Bakolosai 4:12.

12. Ni biki bipalile kuba bya mana saana mu mapepo etu?

¹² Ni biki bipalile kuba bya mana saana mu mapepo etu? Yehova pamo ni kutona kwakue. Tupalile kutontonkania kufuma ku mutima weetu palua kila kintu kyatukitiile. (1 Milandu ya Nsiku 29:10-13) Twamana evio paantu musita Yesu lwabanga pa kyalo, waabasambiliziizie basambi bakue vya kupepa. (Soma Mateo 6:9-13.) Waalandile nangue, baali bapalile kupepanke liina lyakue Leeza liswesiiwe, i kulanda nangue likindikue ao limonue kuba litakatiifu. Kabili, Yesu waalangiliile nangue tupalile kupepa Bukolo Bwakue Leeza buize ni kutona kwakue Yehova kukitike pa kyalo kyonse. Ni kisiasie kupepa palua bintu bebio bya mana saana, Yesu i lwaalandile nangue tupalile kupepa palua bintu bitukabiile pa lwetu bunke. Musita lutwamubiika  Yehova ni kutona kwakue pa nkeende ya mambo mu mapepo etu, twalangilila beelia bitumuene kuba bya mana saana.

13. Mapepo etu apalile kuba aleepele siani?

¹³ Mapepo etu apalile kuba aleepele siani? Bibilia teilangiliile. Mapepo etu kunti aba afupi ao aleepele, kukoonkana ni aali. Kwa mufuano, kunti twakita lipepo lifupi ntaanzi ya kulia, inzi, lipepo lileepele musita utuli mukumusantila Yehova ao lutuli mukumubuila bintu bili  byatwemia. (1 Samweli 1:12, 15) Te tupalile kukita mapepo aleepele eevi kupapia bange, nga evelia bantu bange vibaali bakita mu nsiku yakue Yesu. (Luka 20:46, 47) Yehova teezi kumwenamo mu mapepo a ozo musango. Kya mana kuli Yehova ni kukita lipepo lifumine ku mutima weetu.

14. Tupalile kupepa linga, kabili keekio kyatusambilizia ki palwakue Yehova?

¹⁴ Tupalile kupepa linga? Yehova watukupa tupepe kuli weene lyonse. Bibilia ili yalanda nangue tupalile ‘kupepa bila kulekela,’ “kusipikizia mu lipepo,” kabili ‘kupepa musita onse.’ (Mateo 26:41, NWT; Baroma 12:12, NWT; 1 Batesalonika 5:17) Lyonse, Yehova eteaniiziesie kututuilizia. Kunti twamutasia kila busiku palua ntono yakue ni kupaana kwakue. Kabili kunti twamuloomba atutungulule, atupeele maka, kabili atuteekie mutima. Kine twamona mu kisinka nangue kupepa kuli Yehova ni lisyuko, tuli kubombia kubalua fuasi eevi kulondolola nakue.

15. Juu ya ki tupalile kukita “amen” ku mpeleezio ya lipepo?

 ¹⁵ Juu ya ki tupalile kukita “amen” ku mpeleezio ya lipepo? Mulandu “amen” mana yakue “kakiine” ao “evio sile.” Ni nzila ya kulangilila nangue twaitabizia bintu bitwaloomba mu lipepo lyetu, nangue bifumine ku mutima. (Malumbo 41:13) Bibilia ili yatusambilizia nangue kilisie buino kwitabila “amen,” anzia kine ni mu kansongia ao na lizui, ku mpeleezio ya lipepo lya pa bantu bengi eevi kulangilila nangue twaitabizia beelia byalanduanga.​—1 Milandu ya Nsiku 16:36; 1 Bakorinto 14:16.

16. Eba, kakiine Yehova ali waasuka mapepo etu? Londolola.

¹⁶ Eba, kakiine Leeza ali waasuka mapepo etu? Een, ali waasuka. Bibilia ili yamukuuta nangue “Katuilizia wa lipepo.” (Malumbo 65:2) Yehova ali watuilizia ni kwasuka mapepo a mamilioni a bantu afumine ku mutima, kabili ali wakita evio mu nzila paleepale.

17. Yehova ali wabombia siani ba malaika ni babombi bakue bali pa kyalo eevi kwasuka mapepo etu?

¹⁷ Yehova ali wabombia ba malaika ni babombi bakue bali pa kyalo eevi kwasuka mapepo etu. (Baebrania 1:13, 14) Kuli byakumuenako bingi bya bantu baali bapepa eevi bakwasiiwe kunvua Bibilia, ni musita uniinisie kisia kukita evio, baaendeelue na umo wa Bakasininkizia Bakue Yehova. Bibilia ilangiliile nangue ba malaika bali bakwasia kubila “mpunda iweeme” pa kyalo kyonse. (Soma Nfyulo 14:6.) Kabili, bengi pakati keetu twaapepele kuli Yehova palua maavia etu bunke ao palua bintu bitwali twaakabiile, ni kisia paapo, twaakwasiiziwe na balupua ni bankazi mu kukabila kwetu.​—Tuswalo ni Mafunde 12:25; Yakobo 2:16.

18. Yehova ali wabombia siani mupasi utakatiifu ni Bibilia eevi kwasuka mapepo etu?

¹⁸ Yehova ali wabombia mupasi wakue utakatiifu eevi kwasuka mapepo etu. Musita utwamuloomba atukwasie  kuluisia buavia, kunti wabombia mupasi wakue utakatiifu eevi kututungulula ni kutukoselezia. (2 Bakorinto 4:7) Kabili Yehova ali wabombia Bibilia, eevi kwasuka mapepo etu ni kutukwasia tukite bupinguzi bupalile. Kine twasoma Bibilia, kunti twasaanga maleembo ali kuviinda kutukwasia. Kabili Yehova kunti wakinkizia muntu kampanda waasuka ku kulonghaana, alande bintu bitukabiile kunvua ao mukote wa mu kilonghaano alondolole pamo netu kantu kamo kafumine mu Bibilia.​—Bagalatia 6:1. a

19. Juu ya ki kunti kyamoneka nangue Yehova teezi kwasuka mapepo etu?

¹⁹ Musita unge, paange kunti twaiipuzia, ‘Juu ya ki Yehova tanaasuke mapepo ane?’ Languluka nangue, amanine musita ni vya kwasuka mapepo etu. Amanine beelia bitukabiile. Paange kunti twatualilila kupepa mu nsita kampanda eevi kulangilila nangue tukabiile kakiine bintu bituli mukuloomba, kabili kulangilila kakiine nangue tuli ni kiketekelo muli weene. (Luka 11:5-10) Nsita inge Yehova ali waasuka mapepo etu mu nzila itusiswapiile. Kwa mufuano, kunti twapepa palua aali ikolele, inzi, kuliko kufumia buavia, kunti watupeela maka a kusipikizia buavia bobo.​—Soma 2 Bakorinto 4:7.

20. Juu ya ki tupalile lyonse kupepa kuli Yehova?

²⁰ Lisyuko na baani lituli nalio lya kupepa kuli Yehova! Kunti twaaluka ni kisinka nangue wakabakututuilizia. (Malumbo 145:18) Kabili, kine twakila lyonse kupepa kuli Yehova kufuma ku mutima, bukibuza bwetu pamo nakue bwakaba kukila kukosa.