LISOMO 7
Bukolo Bwakue Leeza Ni Kiki?
1. Bukolo Bwakue Leeza ni kiki?
Sababu ya ki Yesu i Likolo apalile?—MARKO 1:40-42.
Bukolo Bwakue Leeza ni buteeko buli ku muulu. Bwakaba kupiana buteeko boonse ni kufikilizia kutona kwakue Leeza ku muulu ni pa kyalo. Ezio ni mpunda iweeme kakiine! Bantu bali ni laazima ya buteeko buweeme. Inzi, ni buteeko bwakue Leeza sie i bwakaba kufikilizia kaako kakebele bantu. Bwakaba kuunganisia beekazi boonse ba pa kyalo.—Soma Danieli 2:44; Mateo 6:9, 10; 24:14.
Buteeko boonse buli ni likolo. Yehova wasaakuile Muana wakue, Yesu Kristu, eevi aaluke Likolo wa Bukolo bwakue.—Soma Nfyulo 11:15.
2. Sababu ya ki Yesu i Likolo apalile?
Muana muina Leeza i Likolo apalile paantu weene aweeme kabili ali watona bintu biweeme. (Mateo 11:28-30) Ni kangeko, wakateeka kyalo wali ku muulu. Ali ni maka akata saana a kukwasia bantu. Kisia kufufulua, Yesu wabuelele ku muulu ni kwikala ‘ku kuboko kulio kwakua Leeza’ wapembeele kwalulua Likolo. (Baebrania 10:12, 13) Kupuako, Leeza wamwaluile Likolo wa Bukolo bwakue.—Soma Danieli 7:13, 14.
3. Ni baani baakateeka pamo ni Yesu?
Kikundi kya “batakatiifu” kyakaba kuteeka pamo ni Yesu ku muulu. (Danieli 7:18) Batakatiifu ba kuanza kusaakulua baali basambi bwakua Yesu. Mpaka loonu, Yehova atwaliliile kusaakula balalume ni banakazi bakisinka. Bali mukufufulua baali ni mibili ya kimupasi nga vyafufuilue Yesu.—Soma Yoane 14:1-3; 1 Bakorinto 15:44.
Ni bantu baanga baakaya ku muulu? Yesu waalandile nangue baakaba sie ‘libumba liniini.’ (Luka 12:32) Kupuako, mpendua yaabo yakaba 144 000 kabili bakatungulula kyalo baali pamo ni Yesu.—Soma Nfyulo 14:1.
4. Ni kiki kyakitikile musita watendekele Yesu kuteeka?
Bukolo Bwakue Leeza bwatendekele kuteeka mu muaka wa 1914. * Ni kiki kyabambile kukita Yesu lwatendekele kuteeka? Wamupoozele Sataana ni bamalaika bakue paanu pa kyalo. Sataana wafiitilue saana, ni pakaako, waleetele bubiifi mu kyalo kyoonse. (Nfyulo 12:7-10, 12) Kutendekela paapo, maavia ali mukukila sie kuvula ku bantu. Vita, nzala ikata, maluele, nteensi ni biingeko i bintu ‘byakumaninako’ nangue kwasiala sie musita uniini, Bukolo Bwakue Leeza bukabe kutendeka kutungulula kyalo.—Soma Luka 21:7, 10, 11, 31.
5. Bukolo Bwakue Leeza buli mukukita ki leenu?
Kupitila miilo ya kusimikila, Bukolo Bwakue Leeza buli mukuunganisia bantu beengi bali mu byalo byoonse. Mamilioni a balalume ni banakazi bafuukile bali mukwaluka bekala kyalo ba bukolo bwakateekua na Yesu. Bukolo Bwakue Leeza bwakabasuunga musita wa kwinoonua kwa keenu kyalo. Kansi, baalia batonene kusekelela makola akaleetua na bukolo boobo, bapalile kumusaakula Yesu kuya waali Likolo ni kumukindika.—Soma Nfyulo 7:9, 14, 16, 17.
Mu kipiindi kya miaka 1 000, boobu Bukolo bwakafikilizia mupaango walandilue ntaanzi na Leeza musita luabumbile bantu. Kyalo kyoonse kyakapilibuka ni kwaluka paradiso. Kisia paapo, Yesu wakamubueziizia Bukolo Baba wakue. (1 Bakorinto 15:24-26) Eba, kuli ni muntu uutonene saana kulondolola naakue palua mpunda ya Bukolo Bwakue Leeza?—Soma Malumbo 37:10, 11, 29.
^ kip. 6 Pakunti umane biingi palua bunabi ao bukabika buli mu Bibilia bwalandile nangue Bukolo Bwakue Leeza bwakatendeka kuteeka mu muaka wa 1914, soma kitabu Biblia inatufundisha nini?, ku lubali lwa 217-220.
