LISOMO 10
Kunti Wainika Siani Diini ya Kisinka?
1. Eba, kuli sie diini imo ya kisinka?
‘Keengele mukabeepua na bakabika baabufi.’—MATEO 7:15.
Yesu wasambiliziizie banafunzi bakue diini imo sie ya kisinka. Walandile nangue diini ezio ipaleene ni nzila ili yatuala ku bukose bwa loonse, kabili ezio i nzila ‘isili yamonua na beengi.’ (Mateo 7:14) Leeza etabiile sie diini imaniine pa Mulandu wakue ulimo kisinka. Bantu boonse bali bamupupa Leeza baunganisiiziwe na kiketekelo kimo.—Soma Yoane 4:23, 24; 14:6; Baefeso 4:4, 5.
2. Yesu walandile ki palua Bakristu baabufi?
‘Bali balanda nangue bamumanine Leeza koku bikitua byabo byali mu kumukaana.’—TITO 1:16.
Yesu wabasokele ntaanzi basambi bakue nangue banabi baabufi bakenoona lupupo lwabasambiliziizie. Banabi baabufi bali bailanda nangue bali bamupupa Leeza mu kisinka. Bazumizi ba mu tunisa twabo bali baikuuta nangue ni Bakristu. Inzi, kunti kyakitika tubeenike baaba Bakristu baabufi. Mu diini ya kisinka sie buunke, i muli mwafuma Bakristu ba kisinka. Kabili kunti twabeenika Bakristu ba kisinka kupitila mibeele ni bikitua byabo.—Soma Mateo 7:13-23.
3. Tuli kubeenika siani bantu bali bamupupa Leeza mu kisinka?
Mona alama isaano ili kutukwasia kubeenika:
-
Bantu bali bamupupa Leeza mu kisinka bali baikindika Bibilia. Bali baimona kuya yaali Mulandu Wakue Leeza. Bali baikwinda saana kukoonka mafunde a Bibilia. Diini ya kisinka ipuseene ni madiini ali asambilizia maano afumine ku bantu. (Mateo 15:7-9) Bakristu ba kisinka te beezi kukita bintu bipuseene ni beelia bibali basimikila.—Soma Yoane 17:17; 2 Timoteo 3:16, 17.
-
Basambi ba kisinka bakue Yesu, bali bakindika liina lyakue Leeza, Yehova. Yesu wakindikile liina lyakue Leeza pakubabwilako baange liina leelio. Wakwasiizie bantu bamumane Leeza ni kubabuila vya kupepa eevi liina lyakue liswesiiwe. (Mateo 6:9) Paalia pawikeele, ni diini ki ili yababwilako baange liina lyakue Leeza?—Soma Yoane 17:26; Baroma 10:13, 14.
-
Bakristu bakisinka bali basimikila Bukolo Bwakue Leeza. Leeza wamutumine Yesu paanu pa kyalo eeze asimikile mpunda iweeme ya Bukolo. Bukolo boobo i kiswapilo sie buunke kya bantu. Yesu walandile saana palua Bukolo boobo mpaka kufua kwakue. (Luka 4:43; 8:1; 23:42, 43) Yesu walandile nangue ni basambi bakue bakasimikila ezio mpunda iweeme ya Bukolo. Eba, kuli ni muntu wakulanziizie kale palua Bukolo Bwakue Leeza? Weewe pa loobe, oozo muntu ni wa diini ki?—Soma Mateo 24:14.
-
Basambi ba kisinka bakue Yesu te bali ku lubali lwa keenu kyalo kibiipile. Uli kubamana siani? Te beezi kukita politike kabili te beezi kwiingizia mu vita. (Yoane 17:16; 18:36) Ni biingeko, bali balekela aali ya mitima ni mibeele ibiipile ya bantu ba mu keenu kyalo.—Soma Yakobo 4:4.
-
Bakristu bakisinka bali balangililana beneenke ntono ya kupapia. Kupitila Mulandu Wakue Leeza, bali basambilila kukindika bantu ba mu byalo byoonse. Bakristu babufi bali bakwasia saana vita; inzi Bakristu ba kisinka beene bali bakaana kakiine kukita evio. (Mika 4:1-3) Baaba Bakristu ba kisinka, bali babombia buino musita wabo ni bintu byabo bya kimubili eevi bakwasie ni kukoselezia baange.—Soma Yoane 13:34, 35; 1 Yoane 4:20.
4. Weewe pa loobe, diini ya kisinka ni diini ki?
Ni diini ki ili yafumia masambilizio oonse mu Mulandu Wakue Leeza? Ni diini ki ili yakindika liina lyakue Leeza? Ni diini ki ili yasimikila nangue Bukolo Bwakue Leeza i kiswapilo sie buunke kya bantu? Ni bantu ba mu diini ki batoneene kakiine kabili basiizi kwiingizia mu vita? Weewe, wamona nangue ni diini ki?—Soma 1 Yoane 3:10-12.
