Leeza wateaniizie baana ba mu luvialo lwakue kikolue Abrahamu, eevi baaluke ntundu kabili wabapeele mizilo. Ezio ntundu waikuutile mu liina lya “Israeli.” Ntundu ezio ibaanga yapalile kukita ni kusuunga lupupo lwa kisinka ni Mulandu Wakue Leeza. (Malumbo 147:19, 20, nwt-ZS) Kupitila ntundu ya Israeli, bantu ba ntundu yoonse nga bapaalilue.​—Soma Kutendeka 22:18.

Leeza wasaakuile Baisraeli eevi baaluke bakasininkizia bakue. Lyasi lyabo lilangiliile nangue kine twakindika mizilo yakue Leeza, tuli kupatilamo faida. (Malanguluzi a Mizilo 4:6) Bantu ba ntundu inge baali ni fuasi ya kusambilila kumumana Leeza wa kisinka kupitila sie Baisraeli.​—Soma Isaya 43:10, 12.

Mukupita kwa nsiku, Baisraeli bazeziizie lisyuko lya kwitabilua na Leeza. Ni pakaako, Yehova wasaakuile libumba lya Kikristu pa fuasi ya ntundu ya Baisraeli. (Mateo 21:43; 23:37, 38) Leenu, Bakristu bakisinka i Bakasininkizia Bakue Yehova, te Baisraeli kabili.​—Soma Miilo 15:14, 17.

Yesu wateaniizie basambi bakue eevi ni beene basimikile ni kukita basambi kufuma ku bantu ba ntundu yoonse. (Mateo 10:7, 11; 24:14; 28:19, 20) Paantu twikele mu nsita ya mpelezio ya kyalo, miilo ezio ili mukukitika saana kukila musita wapitile. Te kinakitikepo mu kyalo kuunganisia baantu nga Yehova vyali mukuunganisia mamilioni a bantu kufuma mu ntundu yoonse. (Nfyulo 7:9, 10) Bakristu bakisinka bateaniiziwe eevi baye bakinkiziana ni kukwasiana. Ku kulonghaana i kubali baapata masambilizio a Bibilia kupitila ntaantiko imo sie mu kyalo kyoonse.​—Soma Baebrania 10:24, 25.

Mu miaka ya 1870, kikundi kiniini kya banafunzi ba Bibilia, kyavumbuile bisinka byali byalabilue miaka iingi. Bainikile nangue Yesu waateaniizie libumba lya Kikristu eevi lisimikile. Ni pakaako, babaambile kusimikila Bukolo mu kyalo kyoonse. Mu muaka wa 1931, baatendekele kukuutua Bakasininkizia Bakue Yehova.​—Soma Miilo 1:8; 2:1, 4; 5:42.

Mu miaka mia ya kuntendeko, kubaanga kwali mabumba engi a Kikristu mu byalo biingi. Mabumba aazo, abaanga atungululua na kabungue kali katungulula (i kulanda nangue balalume bali ni bufuundi bukata). Kabungue kaako, kaali kamanine nangue Yesu i Mutue wa libumba. (Miilo 16:4, 5) Mu nsita eenu, Bakasininkizia Bakue Yehova bali mukupata faida mukukoonka butunguluzi bwa Kabungue Kali Katungulula. Kikundi kya bakote baabo bali ni bufuundi, kiimaniine misaambo ili ni miilo ya kupilibula, kufumia ku mapapie ni kukasania mpapulo ezio iswapiile Bibilia ili mu ndimi ikilile pa 900. Mabumba akilile pa 120 000 ali mu kyalo kyoonse, ali mukukinkiziiwa ni kutungululua na Kabungue Kali Katungulula. Mu kila libumba, muli mwasaangua ni balalume bali bakuutua bakote ba mu libumba. Bakote baabo, bali mu kwemena ‘libumba libapeelue na Leeza’ baalangiliile ntono.​—Soma 1 Petro 5:2, 3.

Bakasininkizia Bakue Yehova bapangilue buino eevi basimikile mpunda iweeme ni kukita basambi. Tuli twasimikila nsesi kwa nsesi nga evelia batumua vibabaanga baakita. (Miilo 20:20) Kine twasaanga muntu atonene kakiine kumana kisinka, tuli twatendeka kusambilila nakue Bibilia. Fwefue te tuteaniiziwe sie, inzi tuli lupua kabili tuli ni Baba umo atutonene. Tuli balupua ni bankazi bali baemenana kakiine. (2 Batesalonika 1:3) Bantu bali bamupupa Yehova, bali baemena saana kukita bintu byatonene ni kukwasia baange, kabili bateaniiziwe buino eevi baviinde kukita evio. Kansi, beene i lupua luli ni nsaansa ikata pa kyalo!​—Soma Malumbo 33:12; Miilo 20:35.