Leeza i wabumbile bintu byoonse. Weene tali na ntendeko kabili tali na mpela. (Malumbo 90:2) Mpunda iweeme ili mu Bibilia ifumine kuli Leeza. (1 Timoteo 1:11) Kabili, Leeza i waatupeele bukose. Kansi tupalile kumupupa weene sie buunke.​—Soma Nfyulo 4:11.

Te kuli ata muntu wamumuene kale Leeza, paantu Leeza ni mupasi. Mipasi ili ni bukose buibeleele saana kabili bwa pa muulu kukila bwa bantu; te ili na mubili wa nama kabili te izi kwikala pa kyalo. (Yoane 1:18; 4:24) Inzi, kunti twamana vili Leeza kupitila bintu byakitile. Kwa mufuano, mazabo paleepale ni vili vya mena bintu bituli twabiala, byatusambilizia nangue ali ni ntono ikata ni maano a pa muulu. Ni bukata bwa kyalo bwatusambilizia nangue Leeza i wa maka oonse.​—Soma Baroma 1:20.

Kunti twasambilila kabili palwakue Leeza kupitila kusoma Bibilia. Kwa mufuano, Bibilia ili yatubuila bintu byatonene ni beelia byasitonene, vyali wakitila bantu ni vyakitiile bantu mu musita wa kale mu aali ipuseene puseene.​—Soma Malumbo 103:7-10.

Yesu walandile eevi: ‘We Situe wa mwiulu, Liina lyoobe lilumbue.’ (Mateo 6:9) Leeza ali ni meena engi a mukinzi. Inzi, ali sie na liina limo lya buunke. Ni liina leelio te liizi kuzimbulua mu namuna imo mu ndimi yoonse. Mu Kitaabua, tuli twakuuta nga mu Kiswahili, “Yehova.” Inzi baange, bali bakuuta “Yahweh.”​—Soma Malumbo 83:18, nwt-ZS.

Mu Bibilia iingi, liina lyakue Leeza lyafumiziwemo ni kubikwamo meena a mukinzi nga evelia, Mulopue, Wamuyayaya  ao Leeza. Inzi, ku ntendeko liina lyakue Leeza lyali lyasaangua mu Bibilia mara 7 000 eevi. Yesu wababuilile bantu liina leelio musita luali walandila palwakue Leeza.​—Soma Yoane 17:26.

Maavia pa kyalo avulile saana. Eba, keekio kilangiliile nangue Yehova tatupozeleko maano? Baange bali balanda nangue Leeza ali watuteesa eevi atuezie, inzi boobo ni bufi.​—Soma Yakobo 1:13.

Leeza akindikile bantu pa kubapeela uuru wa kwisaakuila. Tuli ni nsaansa ya kuya twali ni uuru oozo. Kunti twaisaakuila kumubombela Leeza. (Yoshua 24:15) Inzi byabulaanda, paantu bantu baange bali basaakula kukitila benaabo bintu bibiipile. I sababu maavia avulile eevi ku kyalo. Yehova ali wakisua saana kumona bantu baatanua nsaambu.​—Soma Kutendeka 6:5, 6.

Yehova ali watuemena. Atonene tuye twali ni nsaansa mu buikazi. Leenu sie, wakaba kufumiapo maavia oonse ni balia bali baleeta maavia. Mukupembelela, alekeleele maavia aazo. Inzi, ali ni nsaambu ya kukita evio. Lisomo lya 8 lyakaba kutusambilizia ezio nsaambu.​—Soma 2 Petro 2:9; 3:7, 13.

Yehova ali watukinkizia tumupalame kupitila lipepo. Ali waemena kila umo wetu. (Malumbo 65:2; 145:18) Ali sie tayaari kutueleela. Ali wamona vituli twaikwinda eevi tumusaansamusie, anzia kine tuli twasiakwandua kukita evio. Atasie kine te tupwililikile kunti twaaluka bakibuza bakue Leeza.​—Soma Malumbo 103:12-14; Yakobo 4:8.

Yehova watupeele bukose. Palua kaako, tupalile kumutona saana weene kuliko muntu unge. (Marko 12:30) Uli kulangilila siani nangue umutonene Leeza? Kupitila kusambilila ni kukita beelia byakebele. Mu nzila eezi uli kumupalama saana.​—Soma 1 Timoteo 2:4; 1 Yoane 5:3.