Mu madiini oonse muli ni bantu bali ni mitima iweeme. Leeza abamuene kabili abapozeleko maano; ezio ni mpunda iweeme kakiine. Ni byabulaanda, paantu bintu biingi bibiipile bili byakitua mu liina lya madiini. (2 Bakorinto 4:3, 4; 11:13-15) Bintu bili mukukitika bilangilile nangue madiini ali mukwiingizia mu bikundi bikata bya bungipaani (nga evelia terrorisme ni genocide) ni mu vita. Bantunguluzi baange ba diini bali babakitila baanike bintu bibiipile ni baange bali bakita naabo bupungue. Bintu beebio, bili byabakisia saana baalia bamuzumiine Leeza baali ni mitima iweeme!​—Soma Mateo 24:3-5, 11, 12.

Diini ya kisinka ili yamutwalila sie Leeza bulumba, inzi madiini a bufi ali akita bintu byasiizi kutona. Ali asambilizia masambilizio asili mu Bibilia nga evelia bufi palwakue Leeza ni palua bantu bafuile. Inzi Yehova atonene bantu bamane kisinka palwakue.​—Soma Ezekieli 18:4; 1 Timoteo 2:3-5.

Kintu kya kusaansamusia ni keeki, Leeza teezi kubeepua na madiini ali ailanda nangue amutonene Leeza, inzi kuya atonene kyalo kyakue Sataana. (Yakobo 4:4) Mu Bibilia, madiini oonse a bufi ali akuutua “Babiloni Mukulu.” Sababu ya ki? Paantu, diini ya bufi yatendekele mu muzi ubaanga wakuutua Babiloni, kisia Mvula Ikata ya mu nsiku yakue Noa. Leenu sie, Leeza wakaba kwinoona kwa kusitukila sie madiini ali mu kubeepa ni kuteesa bantu.​—Soma Nfyulo 17:1, 2, 5, 16, 17; 18:8.

Yehova teezi kulaba bantu bali ni mitima iweeme basalangheene mu madiini abufi ali mu kyalo kyoonse. Ali wabakolonghania mu lupupo lwa kisinka kupitila kubasambilizia kisinka.​—Soma Mika 4:2, 5.

Yehova ali waemena bantu batonene kisinka kabili batonene biweeme. Ali wabalanda bafume lubilo ku madiini a bufi. Muntu amutonene Leeza ali tayari kwaluluka eevi akite beelia bitonene Leeza.​—Soma Nfyulo 18:4.

Mu miaka mia ya ntendeko, bantu baali ni mitima iweeme baitabiile ni nsaansa mpunda iweeme ibasimikiilue na batumua. Yehova wabakwasiizie kuvumbula nzila ya leenu ya buikazi ili ni nsaansa ikata; kabili yabapeele kiswapilo kya musita uli waiza ni kumana sababu ikata ya bukose. Baatusiliile mufuano uweeme wa kukoonka paantu musita ubaunvuile mpunda ezio iweeme, baamubikile Yehova pa ntaanzi mu buikazi buabo.​—Soma 1 Batesalonika 1:8, 9; 2:13.

Mu lupua lwakue lwa bantu bazumiine, Yehova ali mukupokelelamo bantu bali mukufuma mu madiini a bufi. Kine waitabila mukupo wa nsaansa wakue Leeza, wakaba kwaluka kibuza wakue kabili wakaba kwingila mu lupua luli ni ntono ikata ni kumpelezio, wakaba kupata bukose bwa loonse.​—Soma Marko 10:29, 30; 2 Bakorinto 6:17, 18.

Leenu sie, Leeza wakaba kwinoona madiini oonse a bufi. Haa, ezio ni mpunda iweeme kakiine! Bantu boonse ba mu kyalo bakafuma mu maavia ao mu masaanzo. Madiini a bufi te akababeepa kabili bantu, paantu te akabaako kabili. Bantu boonse, pa kyalo ni ku muulu bakamupupa Leeza buunke sie wa kisinka mu buumo.​—Soma Nfyulo 18:20, 21; 21:3, 4.