LISOMO 3
Mpunda Iweeme Ili mu Bibilia Ifumine Kakiine Kuli Leeza?
1. Naani waatungile Bibilia?
Bantu baakekala loonse pa kyalo: ezio mpunda iweeme twaisaanga mu Bibilia. (Malumbo 37:29) Bibilia ili na bitabu 66. Leeza wabombiizie balalume 40 eevi, baali ni kiketekelo baleembe. Bitabu bisaano bya ku muanzo, byaleembelue na Musa tepasiapitile miaka 3 500 eevi. Kitabu kya mwisio kyaleembelue na mutumua Yoane tepasiapitile miaka ikilile pa 1 900. Eba, balalume babombiiziwe na Leeza, baaleembele maano aabo? Aata, inzi baaleembele maano akue Leeza. Leeza walandile naabo kupitila mupasi wakue utakatiifu. (2 Samweli 23:2) Kansi, Yehova i watungile Bibilia.—Soma 2 Timoteo 3:16; 2 Petro 1:20, 21.
2. Ni kiki kyatusininkiziizia nangue Bibilia ifumine kuli Leeza?
Tumanine nangue Bibilia ifumine kuli Leeza, paantu ili yalanda buino ntaanzi palua musita uli waiza bila kubeepa. Te kuli muntu ali kuviinda kukita evio. (Yoshua 23:14) Ni Leeza sie wa maka oonse i ali ni buviinde bwa kumana ni kulanda ntaanzi vyakaba buikazi bwa bantu musita uli mukuiza.—Soma Isaya 42:9; 46:10.
Bibilia ipuseene ni bitabu biinge paantu ifumine kuli Leeza. Kwa mufuano ileembelue mu mamia a ndimi. Kabili, mamilioni a Bibilia ali aleembua ni kukasaniiwa bantu kukila bitabu biinge. Ni kitabu kya kale, inzi te kili na kilubo musita lukili kyalandila palua bintu bya sayansi. Bakaleemba ba Bibilia te baapingeene. * Milaandu ya ntono ili mu Bibilia ifumine sie kuli Leeza wa kisinka kabili wa ntono. Ni leenu, Bibilia ikili sie ni buviinde bwa kuwamia buikazi bwa bantu. I sababu, mamilioni a bantu bali ni kisininkizio nangue Bibilia ni Mulandu ufumine kuli Leeza.—Soma 1 Batesalonika 2:13.
Eba, milandu ili mu Bibilia, ya aluluilue mu kupita kwa nsiku? Maleembo a kale saana a Bibilia, ali ni miaka ikilile pa 2 000, ali mukusininkizia nangue Bibilia ifumine kisinka kuli Leeza. (Isaya 40:8) Leeza taalekeleele ata kaniini Mulandu wakue winoonue.—Soma Malumbo 12:6, 7; 1 Petro 1:24, 25.
3. Bibilia ili yalondoluela palua ki?
Bibilia ili yalondolola saana palua mpunda eezi iweeme: Leeza ali ni mupaango ulangiliile kutona kwakue ku bantu. Ili yalondolola sababu ya ki bantu bakumbilue mu paradiso. Ili yalanda nangue, musita uli waiza, bantu bakeekala kabili mu paradiso paanu pa kyalo.—Soma Nfyulo 21:4, 5.
Mu Bibilia muli mizilo, mafunde ni masoke. Kabili muli maasi a bintu byakitikile alangiliile Leeza vyali wabakitila bantu. Kupitila maasi aazo, tuli kuviinda kwinika mibeele yakue Leeza. Bibilia ili kukukwasia kakiine umumane Leeza. Kabili, ili yalondolola vya kukita eevi waaluke kibuza wakue.—Soma Malumbo 19:7, 11; Yakobo 2:23; 4:8.
4. Ni kiki kili kuviinda kukukwasia kuunvua Bibilia?
Eezi broshua ili kukukwasia kuunvua Bibilia, paantu ili yabombia nzila yabombiizie Yesu. Yesu waali wazimbula milandu ya Maleembo ni ‘kuilondolola.’—Soma Luka 24:27, 45.
Mpunda iweeme ifumine kuli Leeza ili yasaansamusia saana! Inzi, bantu baange te beezi kupooza maano ku eezi mpunda. Ni baange te beezi kutona kuunvua ezio mpunda. Inzi weewe te kutooboka. Kumumana sie Leeza i kuli kukukwasia waaluke ni kiswapilo kya kwikala loonse.—Soma Yoane 17:3.
^ kip. 3 Soma broshua Kitabu kwa Ajili ya Watu Wote.
