LISOMO 9
Ni Kiki Kili Kuleeta Nsaansa mu Buikazi bwa mu Lupua Loobe?
1. Sababu ya ki kwandikisia kyupo ni kwa mana palua nsaansa ya mu buikazi bwa mu lupua?
Mpunda iweeme ili yaafuma kuli Yehova, Leeza ali ni nsaansa, akebele kila lupua lwaluke ni nsaansa. (1 Timoteo 1:11) Leeza i wateendekeziizie kyupo. Kwandikisia kyupo ni kwa mana saana palua nsaansa ya mu lupua: paantu kuli kwakwasia ba mulume ni mukazi pamo ni baana baabo beekale bateekameene. Bakristu bapalile kukiindika sheria ilandilue na buteeko bwa kuabo palua kwandikisia kyupo.—Soma Luka 2:1, 4, 5.
Leeza ali waamona siani kyupo? Weene ali waamona kyupo kuya kyaunganisia ba mulume ni mukazi beekale pamo loonse. Atonene bamulume ni mukazi boonse baye baali bakisinka pakati kaabo. (Baebrania 13:4) Teezi kutona ata kaniini kutiona kyupo. (Malaki 2:16) Inzi etabiziizie sie kutiona kyupo ni kutoola ao kutoolua kabili kine mulume ao mukazi Mukristu wakita bukeende.—Soma Mateo 19:3-6, 9.
2. Bamulume ni mukazi bapalile kukitilana siani?
Bamulume ni mukazi bali ni miilo ya kubomba kila umo mu kyupo, ni miilo ezio ni ya kukwasiana. I vyapaangile Yehova lwa babumbile. (Kutendeka 2:18) Mulume ali ni madaraka akata mu kyupo paantu weene i mutue. Apalile kufikilizia bintu bya kimubili bikabiilue na mukazi pamo ni baana bakue. Kabili, apalile kubalondoluela ni kubasambilizia palwakua Leeza. Ni kangeko, apalile kumutona saana mukazi wakue ni kwipeela saana palua mukazi wakue. Bamulume ni mukazi bapalile kutonana ni kukindikana beneenke. Bamulume ni mukazi bapalile kweleelana, paantu boonse bali baluvia. Ezio ni siri imo pakati ka masiri ali akwasia kuleeta nsaansa mu kyupo.—Soma Baefeso 4:31, 32; 5:22-25, 33; 1 Petro 3:7.
3. Kine mu kyupo kyoobe te muli nsaansa, eba, upalile kupwisia?
Kine mu kyupo kyoobe muli maavia, mupalile kukita maka mwe boonse babili eevi mulangililane kutonana. (1 Bakorinto 13:4, 5) Mulandu Wakue Leeza te usokele batoleene kutiona kyupo eevi kupwisia maavia mu kyupo kyaabo.—Soma 1 Bakorinto 7:10-13.
4. Kine uli muana ao musepuka, Leeza atonene ukite ki?
Yehova atonene uye wali ni nsaansa. Ali wakupeela masoke apalile eevi usekelele bumusepuka boobe. Atonene ubatuilizie baviazi boobe paantu beene bali ni mulangue saana kabili bamanine twingi kukila weewe. (Bakolosai 3:20) Kabumba oobe, atonene usaange nsaansa ya kukita bintu biweeme palwakue, ni palua Muana wakue.—Soma Kasimika 11:9–12:1; Mateo 19:13-15; 21:15, 16.
5. Kine uli baba ao mama, uli kukita ki eevi baana boobe baye baali ni nsaansa?
Pakunti baana beenu bapate kyakulia, pa kulaala, ni kyakuvuala, mupalile kubomba miilo ikata. (1 Timoteo 5:8) Inzi pakunti baana baaluke ni nsaansa, mupalile kubakwasia bamutone Leeza ni kwilekeela abasambilizie. (Baefeso 6:4) Kine waalangilila mu buikazi boobe nangue umutonene Leeza, ni beene bakaba kukita evio vyenka. Aasa kine masambilizio oobe aswapiile Bibilia, keekio kyakaba kubakinkizia saana mu namuna yaabo ya kutontonkania.—Soma Malanguluzi a Mizilo 6:4-7; Tuswalo ni Mafunde 22:6.
Kubakinkizia ni kubatasia baana, kuli kwabakwasia baaluke ni nsaansa. Baana bapalile kabili kusasililua ni kufuundua. Kukita evio kwakabasuunga. Kwakabakwasia kwitiinia kukita bintu byakapuisia nsaansa yaabo. (Tuswalo ni Mafunde 22:15) Inzi, musita wa kufuunda ao kupeela muana malipizi, te upalile kuya waali ni kipuki kikata ao kumukisia.—Soma Bakolosai 3:21.
Bakasininkizia Bakue Yehova bafumiizie bitabu biingi eevi bibakwasie baviazi ni baana. Bitabu beebio biswapiile Bibilia.—Soma Malumbo 19:7, 11.
