LISOMO 6
Tuli ni Kiswapilo ki Palua Bantu Bafuile?
1. Kuli mpunda ki iweeme palua bantu bafuile?
Yesu waali ni kibuza, liina lyakue Lazaro, waali waikala ku Betania mu peepi ni ku Yerusalemu. Kusyali, busiku bumo kibuza wakue wafua. Kisia nsiku ina, Yesu waile ku Betania. I luaile ku mankabuli pamo ni badaada wakue kwa Lazaro, ba Marta ni Maria. Bila kukokola, bantu baizile beengi ku mankabuli. Kooko, Yesu wamubusiizie Lazaro kufuma ku lufu. Ezio nsaansa yaunvuile ba Marta ni Maria, tekakuezia!—Soma Yoane 11:21-24, 38-44.
Marta waali wamanine ntaanzi mpunda iweeme palua bantu bafuile. Waali wamanine nangue Yehova wakabafufula bantu bafuile eevi bakeekale kabili pa kyalo.—Soma Yobu 14:14, 15.
2. Muntu kine wafua ali waaluka siani?
Leeza wamulandile Adamu eevi: “Uli lufunko kabili wakabuela ku lufunko.”—KUTENDEKA 3:19, nwt-ZS.
Bantu baafumine ku lufunko. (Kutendeka 2:7; 3:19) Tuli bibumbua bya kimubili. Te tuli mipasi ikeele mu mibili. Kansi lutuli twafua, te kuli ata kantu ku mubili weetu kali kasiala kaakosele. Muntu luali wafua, boongo ni buene bwalekela kubomba. Oowee, takili wawaza, kabili takili waiunvua ata kantu! Bantu bafuile te bamanine ata kantu. Lazaro wafuile ni kufufulua, inzi taalandile ata kantu palua bukose kisia kufua.—Soma Kasimika 9:5, 6, 10.
Eba, Leeza aliwateesa bantu mu mulilo kisia kufua kuabo? Bibilia ili yasambilizia nangue bantu bafuile te bamanine ata kantu. Lisambilizio lya mulilo wa mateeso ni lya bufi kabili lili lyamuzielekania Leeza. Lelio lisambililizio ni lya nkeni kuli Leeza.—Soma Malanguluzi a Mizilo 12:31.
3. Eba, bantu bafuile kunti batuteenzia?
Bantu bafuile te beezi kuteenda ao sie kuunvua. (Malumbo 115:17) Inzi, kuli bamalaika babiipile bali balanda na bantu eevi tumone nangue bantu bafuile bakosele. (2 Petro 2:4) Yehova ali watukaania saana kutenda na bantu bafuile.—Soma Malanguluzi a Mizilo 18:10, 11.
4. Ni baani bakafufulua?
Mamilioni a bantu bafuile akabusiiwa eevi bakeekale pa kyalo. Baalia basyamumanine Leeza kabili baakita bintu bibiipile ni beene bakafufulua.—Soma Luka 23:43; Miilo 24:15.
Baalia bakafufulua baakaba ni musita wa kusambilila kisinka palwakue Leeza kabili kumuketekela Yesu ni kumukindika. (Nfyulo 20:11-13) Baalia bakakita bintu biweeme bakeekala loonse paanu pa kyalo.—Soma Yoane 5:28, 29.
5. Kufufulua kwa bantu kwatusambilizia ki palwakue Yehova?
Leeza wamutumine Muana wakue paanu pa kyalo eevi eeze atufuile. Kupitila sie Leeza tuli ni kiswapilo palua bantu bafuile. Bufufuko bwatulangilila nangue Yehova atutonene kabili ali buino kuli fwefue atasie kine te tupalile. Weewe pa loobe, naani uutonene saana kumona pa boonse bakafufulua?—Soma Yoane 3:16; Baroma 6:23.
