LISOMO 8
Sababu ya ki Leeza Alekeleele Bintu Bibiipile ni Maavia?
1. Bintu bibiipile byatendekele siani?
Leeza alekeleele bantu batungulule kyalo musita waleepele eevi kulangilila nangue te baviinda kupuisia maavia a pa kyalo
Bintu bibiipile byatendekele pa kyalo musita Sataana lualandile bufi bwa kuanza. Ku ntendeko, Sataana waali malaika wapwililikile, inzi “taikeele mu kisinka.” (Yoane 8:44) Waakebele abambe kupupua, inzi Leeza sie buunke bwakue i apalile kupupua. Wamubeepele muanakazi wa ku ntendeko, Eva. Oozo muanakazi wamutuiliziizie Sataana kuliko kumutuilizia Leeza. Adamu wakitile nga Eva, waandilue kumutuilizia Leeza. Bupinguzi bwakue bwalengiizie kwaluke maavia ni lufu.—Soma Kutendeka 3:1-6, 19.
Sataana lwamukinkiziizie Eva andue kumukindika Leeza, walengiizie kwaluke bukisanguka ku nsaambu ya kuteeka yakue Leeza. Bantu beengi bali ku lubali lwakue Sataana. Nga weene, te batonene Leeza kuya waali Kateeka waabo. Mu ezio nzila, Sataana waalukile “kateeka wa keno kyalo.”—Soma Yoane 14:30; 1 Yoane 5:19.
2. Eba, mu bibumbua byakue Leeza muali ni kilubo?
Bintu byoonse bili byakitua na Leeza byasaangua byapwililikile. Leeza wabumbile bantu ni bamalaika baali ni buviinde bwa kumukindika mu kisinka. (Malanguluzi a Mizilo 32:4, 5) Watupeele uuru wa kusaakula kukita biweeme ao kukita bibiipile. Uuru oozo, uli watupeela fuasi ya kulangilila nangue tumutonene Leeza.—Soma Yakobo 1:13-15; 1 Yoane 5:3.
3. Sababu ya ki Leeza alekeleele maavia mpaka leenu?
Yehova alekeleele bukisanguka palua nsaambu yakue ya kuteeka mpaka leenu. Sababu ya ki? Ni kusininkizia nangue, kine bantu baezia kwiteeka beene sie bila Leeza, keekio te kiizi kuleeta ata faida. (Kasimika 7:29; 8:9) Bantu bali mu kwitungulula beene tepasyapitile miaka 6 000. Kisinka, bantunguluzi ba bantu te baviinda kufumiapo: vita, kwipaana, kupusa kwa nsaambu ni maluele.—Soma Yeremia 10:23; Baroma 9:17.
Buteeko bwa bantu te buizi kubaleetela faida bantu baange. Inzi, buteeko bwakue Leeza buene buli bwabaleetela faida ikata baalia bali babuitabila. (Isaya 48:17, 18) Leenu sie, Yehova wakaba kutiona buteeko boonse bwa bantu. Ni baalia sie basaakuile kutungululua na buteeko bwakua Leeza i bakeekala paanu pa kyalo. (Isaya 11:9).—Soma Danieli 2:44.
4. Kusipikizia kwakue Leeza kwatupeela fuasi yakukita ki?
Sataana ali walanda nangue bantu bali bamubombela sie Yehova eevi bapate faida, inzi te sababu ya kumutona. Eba, kunti kyakitika kulangilila nangue boobo ni bufi? Een, kunti kyakitika! Kusipikizia kwakue Leeza kwatupeela fuasi ya kulangilila kine tutonene kutungululua na Leeza ao na bantu. Tuli twalangilila busaakuzi bwetu kupitila mibeele yeetu ya buikazi.—Soma Yobu 1:8-12; Tuswalo ni Mafunde 27:11.
5. Tuli kulangilila siani nangue tumusaakuile Leeza kuya waali Kateeka weetu?
Bupinguzi bwetu buli bwalangilila kine tutonene kumusaakula Leeza aye waali Kateeka weetu
Tuli kulangilila siani nangue tumusaakuile Leeza kuya waali Kateeka weetu? Kupitila kukeba diini ya kisinka, ni kukoonka mafundisio afumine mu Bibilia, Mulandu Wakue Leeza. (Yoane 4:23) Kunti twalangilila nangue Sataana te kateeka weetu, kine twakaana kwiingizia mu politike ni mu vita nga vyaakitile Yesu.—Soma Yoane 17:14.
Sataana ali mukukinkizia bantu kukita mazaambi a bupungue ni bintu biinge bibiipile. Kine twatiina kukita beebio bintu, beneetu ni bantu ba mu lupua lwetu kunti batuseka ni kutupiinga. (1 Petro 4:3, 4) Kansi tupalile kwisaakuila: Eba, twakaba kukeba babibuza bamutonene Leeza? Eba, twakaba kukindika mizilo yakue ya ntono ni ya maano? Kine twakita evio, twakaba kulangilila nangue Sataana wabeepele musita lualandile nangue bantu te baviinda kumukindika Leeza musita ubali basaanzua.—Soma 1 Bakorinto 6:9, 10; 15:33.
Leeza atonene bantu. Ntono yakue yatusininkiziizia nangue bintu bibiipile ni maavia byakaba kupua. Baalia bamuketekeele Leeza ni kuya baali ku lubali lwa buteeko bwakue, bakeekala loonse pa kyalo.—Soma Yoane 3:16.
