Yehova wabapeele bantu kyalo. Kyalo ni nsesi yeetu. Bamulume ni mukazi ba kuanza, Adamu ni Eva te babumbilue eevi bezuzie bantu ku muulu. Paantu Leeza waali wasyabumbile bamalaika bakwikala pamo nakue kooko ku muulu. (Yobu 38:4, 7) Wamubikile muntu wa kuanza mu paradiso yaweeme saana, yaali yakuutua bukaba bwa Edeni. (Kutendeka 2:15-17) Kabili wamupeele Adamu pamo ni luvyalo lwakue buviinde bwa kwikala loonse pa kyalo.​—Soma Malumbo 37:29; 115:16.

Ku ntendeko, kubaanga kwali sie bukaba bwa Edeni i bwali paradiso. Ba Adamu ni Eva baali bafuaniine kuya baali ni baana eevi bezuzie kyalo. Baali bapalile kwemena kyalo kyoonse ni kukialula paradiso. (Kutendeka 1:28) Kyalo tekikenoonua ata limo. Kyakaba kyali sie nsesi ya bantu.​—Soma Kasimika 1:4.

Ba Adamu ni Eva te bamukindikile Yehova. I sababu baakumbilue mu bukaba bwa Edeni. Paradiso ezio yazeezele kabili te kuli muntu waviindile kuibwezia. Bibilia ili yalanda nangue kyalo kyabikilue mu maboko a bantu babiipile. (Yobu 9:24)​—Soma Kutendeka 3:23, 24.

Eba, Yehova wapuuluile mipaango yakue palua bantu? Aata! Weene ni wa maka oonse, kabili ni kutona kwakue kuli kwakitika nsita yoonse. (Isaya 45:18) Wakaba kubonvia buviinde bwakue boonse eevi afikilizie bintu byalaile.​—Soma Malumbo 37:11, 34.

Kyalo kyakaaluka kabili paradiso musita wa buteeko bwakue Yesu, Likolo asaakuilue na Leeza. Yesu pamo ni bamalaika, waakaba kwinoona balwani boonse bakue Leeza musita wa vita ili yakuutua na Bibilia Armagedoni; kisia wakaba kumukaka  Sataana mu miaka 1 000. Babombi bakue Leeza bakapusuka musita wa kwinoonua kwa babiipile paantu Yesu wakabatungulula ni kubasuunga. Kusyali bakeekale loonse mu keenu kyalo kyakaaluka paradiso.​—Soma Nfyulo 20:1-3; 21:3, 4.

Leeza wakapuisia bibiipile musita ki? Yesu watulangiliile bintu ‘byakakitika’ byakulangilila nangue mpeleezio ya palama. Bintu bili mukukitika leenu mu kyalo bili mukulengia buikazi bwa bantu buye bwali mu atari. Kabili byalangilila nangue twikeele mu “mpeleezio ya kyalo.”​—Soma Mateo 24:3, 7-14, 21, 22.

Yesu wakaba kutungulula kyalo mu miaka 1 000 waali ku muulu. Mu buteeko bwakue, wakaba kufumiapo maavia oonse. (Isaya 9:6, 7; 11:9) Wakaba Likolo kabili Koani Mukulu. Wakaba kufumia mazaambi ku balia bamutonene Leeza. Leeza wakamupeela Yesu maka akufumiapo maluele, kukota ni lufu.​—Soma Isaya 25:8; 33:24.

Bantu bali bamukindika Leeza bakeekala mu paradiso. (1 Yoane 2:17) Yesu wabalandile basambi bakue bakebe bantu bafuukile ni kubasambilizia bintu bibapalile kukita eevi betabilue na Leeza. Leenu, Yehova ali mukuteania mamilioni a bantu eevi bakeekale mu paradiso paanu pa kyalo. (Zefania 2:3) Mu nkende ya lupupo ya Bakasininkizia Bakue Yehova, ili yakuutua Nsesi ya Bukolo, bali basambilizia vya kwaluka: mulume aweeme, baba aweeme, mukazi aweeme ni mama aweeme. Mu nkende ezio, baviazi ni baana bali bamupupa Leeza lwa pamo. Kupitila masambilizio a Bibilia, bali basambilila vya kwaluka ni buikazi buwamiisie.​—Soma Mika 4:1-4.