Leeza akupile bantu boonse bamupalame kupitila lipepo. (Malumbo 65:2) Inzi, teezi kutwilizia ao kwitabila mapepo oonse. Kwa mufuano, Leeza teezi kutwilizia mapepo a mwalalume ali wamuteesa mukazi wakue. (1 Petro 3:7) Baisraeli lubakeene kulekela kukita bintu bibiipile, Leeza wakeene kwitabila mapepo aabo. Musita unge, Leeza ali waitabila mapepo a muntu akitile atasie lizaambi likata kine walapila (i kulanda nangue, wanuuna mu bikitua byakue). Lipepo ni lisyuko likata litwapeelue na Leeza.​—Soma Isaya 1:15; 55:7.

Lipepo ni seemu ya lupupo. Kansi, tupalile kupepa sie kuli Kabumba weetu, Yehova. (Mateo 4:10; 6:9) Kabili, pakuba te tupwililikile, tupalile kupepa kupitila mu liina lyakue Yesu paantu weene wafuile palua mazaambi eetu. (Yoane 14:6) Yehova teezi kutona kubwelelela mapepo aleembelue ao abikiliilue. Atonene mapepo eetu aye afuma ku mutima.​—Soma Mateo 6:7; Bafilipi 4:6, 7.

Kabumba weetu ali watuunvua atasie kine twapepela ku mutima. (1 Samweli 1:12, 13) Ali watukupa eevi tupepe kuli weene mu musita oonse. Kwa mufuano, lukelekeele ni kyungulo, pa kulia ao musita utuli ni maavia.​—Soma Malumbo 55:22; Mateo 15:36.

Te kaleengele kumupalama Leeza, paantu twikeele pamo ni bantu basimuketekeele kabili bali bapunia bulayo bwakue  bwa kwikala pa kyalo ni mutende. (2 Timoteo 3:1, 4; 2 Petro 3:3, 13) Tuli ni lazima ya kulonghaana pamo ni babombi bakue Leeza bali batukinkizia buino, kabili ni beene, bali ni lazima yeetu.​—Soma Baebrania 10:24, 25.

Kulonghaana pamo ni bantu bamutonene Leeza, kuli kwatukwasia tumupalame Leeza. Kulonghaana kwa Bakasininkizia Bakue Yehova kuli kwa tupeela musita wa mana saana wa kukinkiziiwa na kiketekelo kya baange.​—Soma Baroma 1:11, 12.

Kunti wamupalama Yehova, kwa kupisia musita waali mukutontonkania palua bintu biuli mukusambilila mu Mulandu wakue. Tontonkania palua bintu bili byakita Yehova, masoke akue ni palua bulayo bwakue. Lipepo lyoobe ni kutontonkania saana bili kukukwasia saana ulangilile sante kuli Leeza palua ntono yakue ni mulangue wakue.​—Soma Yoshua 1:8; Malumbo 1:1-3.

Te kikitika umupalame Leeza kine te umuswapiile ao kine te uli na kiketekelo. Kiketekelo kili nga kimuti kibyelue kipalile kwitililua. Ni pakaako, upalile kila musita kwitilila kiketekelo kyoobe kupitila kutontonkania palua bintu biuzumiine ni bikulengele kuzumina evio.​—Soma Mateo 4:4; Baebrania 11:1, 6.

Yehova apoozele maano ku baalia bamutonene. Kunti wakusuunga kufuma ku bintu byoonse bili kuviinda kutopia kiketekelo ni kuzeezia kiswapilo kyoobe kya kwikala loonse. (Malumbo 91:1, 2, 7-10) Ali wakusoka eevi utiine bintu bili kwinoona bukose ni nsaansa yoobe. Yehova ali wakusambilizia vya kwaluka ni buikazi bukilile kuwama.​—Soma Malumbo 73:27, 28; Yakobo 4:4, 8.