LISOMO LYA 01

Bibilia Kunti Yawaamia Siani Buikazi Bobe?

PLAY

Fwe bonse tuli ni biipuzio bituli twaiipuzia palua buikazi, kwema, kufua, ni palua musita uli waiza. Kabili tuli twaikala twatonene tukwasiiwe eevi tumane vya kupuisia maavia etu a mu buikazi, nga evelia vya kupata nfalanga, ni vya kwaluka ni nsaansa mu lupua lwetu. Bantu bengi bamwene nangue Mulandu Wakue Leeza, Bibilia, tewizisie kubapeela byasuko bya biipuzio byabo bikata palua buikazi, inzi kabili, uli wabapeela ni masoke ali abakwasia mu buikazi bwa kila busiku. Ati, umanineko ni muntu ali kuwaamia buikazi bwakue kine watendeka kusambilila Bibilia?

1. Bibilia ili yaasuka biipuzio ki paleepale?

Bibilia ili yaasuka biipuzio beebi bya mana: Bukose bwaatendekele siani? Juu ya ki tuli pa kyalo? Juu ya ki bantu bali baema? Muntu kine wafua ali waaluka siani kabili ali waya pi? Kine kila muntu atonene mutende, ale juu ya ki vita ivulile saana? Eba, mpela ya kyalo yakabako ao abe? Bibilia ili yatukinkizia kukeba byasuko bya biipuzio nga bebio, kabili bantu bengi saana baakifikiila kumona nangue byasuko bifumine mu Bibilia bili byateekia saana mutima.

2. Bibilia kunti yatukwasia siani kusekelela buikazi bwetu bwa kila busiku?

Bibilia ili yatupeela masoke aweeme. Kwa mufuano, ili yasambilizia vya kukita eevi lupua luye lwali saana ni nsaansa. Ili yatubuila vya kukita kine tutiokele mutima ni vya kusekelela miilo yeetu. Wakaba kumana bili byasambilizia Bibilia palua azo maasi ni angeko kine twatwalilila kusambilila bonse mu keno kitabu. Kine twakita evio, wakaba kufikiila kwinika nangue “Malembo onse [kila kintu kili mu Bibilia] . . . apalile ao ali akwasia.”—2 Timoteo 3:16.

Keeki kitabu te kipyene Bibilia. Inzi, kikukinkiziizie utoosie Bibilia we muine. Pakaako, twakupapaata uye wasoma maleembo ali mukati ni kuapalania ni beelia biuli mukusambilila mu keeki kitabu.

TUKEBE SAANA

Mona Bibilia viikwasiizie bantu, vya kukita eevi uye watona kuisoma, kabili juu ya ki kili buino uye wali ni muntu wa kukukwasia kunvua bili mukati.

3. Bibilia kunti yatutungulula

Bibilia ili nga torshi. Kunti twabombia Bibilia eevi itubuile vya kukwata bupinguzi ao bwamuzi buweeme kabili itubuile beelia byakaba kukitika musita uli waiza.

Some Malumbo 119:105, kisia londoluele beebi biipuzio:

Kaleemba wa aza malumbo waali waimwene siani Bibilia?
Ale weewe uimwene siani Bibilia?

4. Bibilia kunti yaasuka biipuzio byetu

Mwanakazi umo waamwene nangue Bibilia yaamwasukile biipuzio bibanga byamwemia mu miaka ingi. Mone VIIDEO, kisia, londoluele biipuzio bili paapa.

VIIDEO: Te Kulekela ata Kaniini Kuswapila! (1:48)

Mu eezi viideo, ozu mwanakazi waali waiipuzia biipuzio ki?
Kusambilila Bibilia kwaamukwasiizie siani?

Bibilia ili yatukinkizia kwipuzia biipuzio. Some Mateo 7:7, kisia, londoluele keeki kiipuzio:

Ni biipuzio ki biuli nabio biuli kutona Bibilia ikukwasie kwasuka?

5. Uli kunvua makola a kusoma Bibilia

Bantu bengi bali mukunvua makola a kusoma Bibilia, kabili ili mukubakwasia. Mone VIIDEO, kisia, londoluele biipuzio bili paapa.

VIIDEO: Kusoma Bibilia (2:05)

Mu eezi viideo, bamisepuka baali bamona siani kusoma?
Anzia kine tebeezi kutona kusoma, juu ya ki loonu bali batona kusoma Bibilia?

Bibilia ili yalanda nangue kunti yatupeela masoke a kututeekia mutima ni kutupeela kiswapilo. Some Baroma 15:4, kisia, londoluele keeki kiipuzio:

Waiunvua siani palua bulayo buli mu Bibilia bwa kututeekia mutima ni kutupeela kiswapilo?

6. Bange kunti batukwasia kunvua Bibilia

Kuongezia pa beelia bibali baisomena bo beene mu Bibilia, bantu bengi bakimona nangue kuya bali ni muntu wa kulondolola nabo palua Bibilia, kuli kwakwasia. Some Miilo ya Batumua 8:26-28, 30-31, kisia, londoluele keeki kipuzio:

Kunti twakita siani eevi tunvue Bibilia?—Mone mulongo wa 30 ni 31.

Olia mwalalume Mwetiopia, abanga wakabiile kukwasiiwa eevi onvue Maleembo. Bantu bengi leenu bamwene nangue kuya bali ni muntu wa kulondolola nabo palua Bibilia, kuli kwakwasia

BANGE BALI BALANDA: “Kusambilila Bibilia ni kuzeeziasie musita kya mpuni.”

Ale weewe uli wamona siani? Juu ya ki?

MU KIFUPI

Bibilia ili ni masoke ali akwasia mu buikazi bwa kila busiku, ili yaasuka biipuzio bya mana, kabili ili yabateekia bantu mutima ni kubapeela kiswapilo.