Mwaya kyalo, kila bantu bali ni malanga apuseene palua kumina bualua. Bamo bali batona kumina musita ubali pamo ni benaabo. Bange bali bapingula kusimina atasie tukaniini. Ni bange bali bamina mpaka baunvua nangue bakolua. Bibilia ili yalanda siani palua kumina bualua?

1. Eba, kumina bualua kubiipile?

Bibilia teizi kukaania kumina bualua. Inzi, ili yalanda nangue “divai elia ili yasaansamusia mutima wa muntu”, ni yeene ni bupe butwapeelue kuli Leeza. (Malumbo 104:14, 15) Bange balalume ni banakazi ba kisinka bazimbuilue mu Bibilia, baali bamina bualua.​—1 Timoteo 5:23.

2. Bibilia ili yaleeta masoke ki ku baalia bapingula kumina bualua?

Bibilia ili yakaania kumina bualua buingi ni kukolua. (Bagalatia 5:21) Mulandu wakue uli walanda eevi: “Te kusaangua pakati ka bantu bali bamina divai ingi saana.” (Tuswalo ni Mafunde 23:20) Pakaako, kine twapingula kumina atasie kine tulipo bunke, te tupalile kumina mpaka ni maano azeeza, ao ku muisio te twalanda ni kukitasie bintu binge-binge, ao kwinoona bukose bwetu juu ya kumina. Kine te tuli na buviinde bwa kwilingilila, kunti twakita buino kulekela kumina atasie tukaniini.

3. Kunti twakindika siani bupinguzi bwa bange palua kumina bualua?

Kila muntu apalile kupingula kine kunti wamina bualua ao abe. Te tupalile kumupingula ovio ao kumuseka olia wasaakula kumina bualua wailingiliile ao kumupatikizia muntu amine bualua bila watonene. (Baroma 14:10) Tuli twatiina kumina bualua musita utuli twamona nangue kine twamina, tuli kubaleetela bange maavia. (Some Baroma 14:21.) Tuli twakoonka ozu musoko uli mu Bibilia: “Kubalua muntu te kuti akebe kwiwamiizia. Inzi kubalua muntu akebesie kuwamiizia bange.”​—Some 1 Bakorinto 10:23, 24.

 TUKEBE SAANA

4. Pingula kine uli kumina ao abe

Yesu waali wamwene siani kumina bualua? Eevi upate kyasuko, mona kimpezia maano kya kuanza kyaakitile. Some Yoane 2:1-11, kisia londoluele beebi biipuzio:

• Kupitila keeki kimpezia maano, mawazo akue Yesu palua bualua ni baalia bonse bali babumina, atusambilizia ki?

• Paantu Yesu taakaaniizie kumina bualua, Mukristu apalile kumumona siani muntu olia wapingula kumina?

Inzi, paantu Mukristu ali ni buntungua bwa kumina bualua, keekio te kilangiliile nangue lyonse ni mulangue kumina bualua. Some Tuswalo ni Mafunde 22:3, kisia londoluele kine kunti wapingula kumina bualua ao abe mu aali eezi ili paapa:

• Kine uli kwenzia kiombo ao masini.

• Kine uli ni mimba.

• Kine munghanga wakikusoka ulekele kumina bualua.

• Kine uli waandua kwilingilila bualua bwa kumina.

• Kine muzilo wa buteeko ukaniizie kumina bualua.

• Kine uli ni muntu apinguile kusimina paantu musita waapitile abanga wali ni buavia bwa kwandua kwitiinia ku kumina bualua.

Pa buinga ao pa mukuposie unge, eba, upalile kubiikapo ni bualua? Eevi umane kine kunti wabiikapo ao abe, mone VIIDEO.

Some Baroma 13:13 ni 1 Bakorinto 10:31, 32. Kisia kusoma kila lileembo, londoluele keeki kiipuzio:

• Kubombia leeli lifunde, kunti kwakukwasia siani kukwata bupinguzi buli kumusaansamusia Yehova?

 5. Pingula kine uli kumina bualua bwavulile siani

Kine wasaakula kumina bualua languluka nangue: Yehova takaniizie kumina bualua, inzi akaniizie kumina bualua buingi. Juu ya ki? Some Hosea 4:11, 18, kisia londoluele keeki kiipuzio:

• Kunti kyaaluka siani kine muntu wamina bualua buingi?

Ni kiki kili kutukwasia tutiine kumina bualua buingi? Tupalile kuya twali ni maano ateekameene ao kwinika mipaka yeetu. Some Tuswalo ni Mafunde 11:2, kisia londoluele keeki kiipuzio:

• Juu ya ki ni kintu kiweeme kwibiikila mipaka kine uli kumina bualua bwavulile siani?

6. Ni kiki kili kukwasia muntu alekele kumina bualua buingi?

 MU KIFUPI

Yehova waatupeele bualua eevi tuye twaisaansamusia. Inzi, akaniizie kumina bualua buingi ni kukolua.

Kunti waasuka siani?

• Bibilia ili yalanda siani palua kumina bualua?

• Ni maavia ki ali afuma mu kumina bualua buingi?

• Kunti twakita siani eevi tukindike bupinguzi bwa bange palua kumina bualua?