LISOMO LYA 38
Uye Watasia Palua Bupe bwa Bukose
Kuli bintu bingi saana biweeme bituli twakita ni kusekelela paantu tukosele. Atasie musita utuli twasaakaana ni maavia, lingi kunti twasekelela bintu paleepale mu buikazi bwetu. Kunti twalangilila siani nangue tuli twatasia palua bupe bwa bukose? Ni nsaambu ki ikata ili kulengia tutasie?
1. Juu ya ki tupalile kutasia palua bukose?
Tupalile kutasia palua bukose paantu ni bupe kufuma kuli Yehova, Baba weetu wantono. Weene i “nsulo ya bukose” i kulanda nangue waabumbile bintu byonse bili ni bukose. (Malumbo 36:9) ‘Weene i ali wapeela bantu bonse bukose ni binge byonse.’ (Miilo ya Batumua 17:25, 28) Yehova ali watupeela bintu bitukabiile eevi tuye twakosele. Inzi, te bebiosie. Waatupeele ni bintu byakukwasia bukose bwetu eevi tusekelele buikazi.—Some Miilo ya Batumua 14:17.
2. Kunti twamulangilila siani Yehova nangue tuli twatasia palua bupe bwa bukose?
Kutendekelasie musita mama obe lwaalukile ni liimi ao mimba yobe, Yehova waali wakupoozeleko maano. Daudi, mubombi wakue Leeza waatunguluilue na mupasi ni kulanda eevi: “Menso obe aamwene atasie musita unaali nakili kyana kiteku munda.” (Malumbo 139:16) Yehova amwene bukose bobe kuya bwali bwa mana saana. (Some Mateo 10:29-31.) Ali waunvua ovio saana kine muntu waiipaya ao waipaya mwinakue na bufue. a (Kufuma 20:13) Kabili Yehova ali wakisua saana kine twabiika bukose bwetu mu buavia na bufue ao kine te tukitile maka eevi kukwata mipaango ya kusuunga bukose bwa bantu bange. Kine twapooza maano ku bukose bwetu ni kukindika bukose bwa bantu bange, tuli kulangilila nangue tuli twatasia palua bupe bwa mana saana bwa bukose.
TUKEBE SAANA
Tumone nzila paleepale iuli kuviinda kulangilila nangue uli watasia palua bupe bwa bukose.
3. Suunga bukose bobe
Bakristu baalia bepeele kuli Yehova, bali babombia buikazi bwabo bonse eevi kumubombela. Ili nga evelia bali bamupeela mibili yabo eevi iye yali ngeleelo kuli Leeza. Some Baroma 12:1, 2, kisia londoluele beebi biipuzio:
-
Ni kiki kipalile kukukinkizia usuunge bukose bobe?
-
Ni nzila ki paleepale iuli kukita eevi ulangilile nangue usuungile bukose bobe?
4. Wakengeele ni bintu bili kukisiana ao kwipayana
Bibilia ili yatusoka tutiine kukita bintu bili kubiika bukose bwetu mu buavia. Mone VIIDEO eevi umone bintu paleepale biuli kukita eevi bukose bobe te kuti buye bwali mu buavia.
Some Tuswalo ni Mafunde 22:3, kisia londoluele beebi biipuzio: Kunti waisuunga siani musita luuli . . .
-
ku nsesi yeenu?
-
ku fuasi kuuli wabombela?
-
mukusaapa misaapo?
-
mukwenzia ao luutwemue ku nkinga, buato ao kintu kinge?
5. Kindika bukose bwa muana ali munda
Daudi waalondoluele nangue Yehova ali wapooza maano ku kila kintu kili kyakitika ku muana ali munda, ni vyali wakula munda mwakue mama wakue. Some Malumbo 139:13-17, kisia londoluele keeki kiipuzio:
-
Eba, Yehova ali watendeka kupenda bukose bwa muntu musita mama lwaaluka ni mimba ao musita muana lwavyalua?
Baisraeli ba kale baapeelue mizilo kuli Yehova yaali yasuunga ba mama pamo ni mimba yabo. Some Kufuma 21:22, 23, kisia londoluele beebi biipuzio:
-
Yehova abanga wamona siani kine muntu waipaya muana ali munda bila wapangile kukita evio?
-
Abanga waiunvua siani kine muntu wakita evio na bufue? b
-
Weewe pa lobe, wamona siani azo malanga akue Leeza?
Musita unge, atasie mwanakazi olia akindikile bukose kunti wamona nangue kupisia mimba i kintu sie kimo kyapalile kukita. Some Isaya 41:10, kisia londoluele beebi biipuzio:
-
Kine mwanakazi wakinkiziiwa apisie mimba, apalile kubwila uni wa kunti amukwasie? Juu ya ki?
BANGE BALI BALANDA: “Mwanakazi ali ni nsaambu ya kusaakula kupisia mimba, paantu weene i atweme mimba.”
-
Ni kiki kyakusininkiziizia nangue Yehova akindikile saana bukose bwakue mama pamo ni muana wakue ali munda?
MU KIFUPI
Bibilia ili yatusambilizia kutona, kukindika ni kusuunga bupe butupeelue kuli Yehova bwa bukose. Keekio kibiikile mukati bukose bwetu ni bwa bantu bange.
Kunti waasuka siani?
-
Juu ya ki bukose bwa muntu ni bwa mana kuli Yehova?
-
Yehova ali waiunvua siani kine muntu waipaya mwinakue na bufue?
-
Juu ya ki uli watasia palua bupe bwa bukose?
MANAKO NI BINGE
Kunti twakita siani eevi tulangilile nangue tuli twamutasia Yehova palua bupe bwa bukose?
Mona kyasuko kya keeki kiipuzio, eba, Leeza kunti waeleela mwanakazi olia waapisiizie mimba?
“Bibilia Ili Yalanda Siani Palua Kupisia Mimba?” (Lyasi lili mu Kitente kya Enternete)
Mona kumana malanga akue Leeza palua bukose vikupalile kutukwasia lutuli twasaakula misaapo.
“Eba, Upalile Kusaapako ‘Misaapo Ili Yabiika Bukose mu Buavia’?” (Buuke!, ya 08/10/2000)
Ale kine muntu ali ni malanga a kwiipaya? Mona Bibilia viili kumukwasia.
a Yehova ali waemena saana baalia bonse bali ni mitima ili ni bulanda. (Malumbo 34:18) Ali wainika misa ili yaunvua bantu ili yabalengia baaluka ni malanga ao mawazo a kwiipaya kabili atonene kubakwasia. Eevi umone vyali wabakwasia basipikizie azo malanga a kwiipaya, soma lyasi lilandile “Ntonene Kufua—Eba, Bibilia Kunti Yankwasia Kine Naaluka ni Malanga a Kwiipaya?” mu seemu ilandile Manako ni Binge ili mu leeli lisomo.
b Baalia bonse bali bapisia mimba te bapalile kwipingula ovio mu nzila ipitiliile paantu Yehova kunti wabeleela. Eevi kumana bingi palua ezio mpunda, mona lyasi lilandile eevi: “Bibilia Ili Yalanda Siani Palua Kupisia Mimba?” mu seemu ilandile Manako ni Binge ili mu leeli lisomo.
