LISOMO LYA 39
Leeza Ali Wamona Siani Milopa?
Milopa ni ya mana saana. Bila milopa, te kuli muntu pakati keetu ali kuya wakosele. Paantu Leeza i waatubumbile, weenesie bunke i apalile kutubuila vya kubombia milopa. Ali walanda ki palua milopa? Eba, ipalile kuliiwa ao kubiikua mu misipa? Kabili, kunti wakita siani eevi ukwate bupinguzi buweeme mu ezio aali?
1. Yehova ali wamona siani milopa?
Yehova waabalandile eevi babombi bakue ba ku kale: “Bukose bwa kila musango wa mubili buli mu milopa.” (Balawi 17:14) Kuli Yehova, milopa ilangiliile bukose. Paantu bukose ni kintu kitakatiifu, kabili ni bupe kufuma kuli Leeza, kansi milopa ni yeene ni itakatiifu.
2. Leeza ali wakaania kubombia milopa mu nzila ki?
Yehova waabapeele malaizio babombi bakue ba ku kale te kunti balie milopa. (Some Kutendeka 9:4 ni Balawi 17:10.) Waasininkiziizie kabili azo malaizio musita kabungue kali katungulula lukaasambiliziizie Bakristu “batwalilile kwitiinia . . . ni milopa.”—Some Miilo ya batumua 15:28, 29, NWT.
Kwitiinia ni milopa kuli na mana ki? Kine munghanga wakukaania kumina bualua, uli kulekela. Inzi, eba uli kulia kyakulia kilimo bualua ao kutunkua bualua mu misipa? Teuviinda ata kaniini. Enka evio, kine malaizio akue Leeza alanda twitiinie ni milopa, i kulanda nangue te tupalile ata kaniini kumina milopa ao kulia nama isisiinzilue. Kabili te tupalile kulia kyakulia kyokyonse kibiikiluemo milopa.
Ale, palua kubombia milopa mu matunzo? Nzila inge ya kubombiiziamo milopa palua matunzo, ili yationasie paswetele muzilo wakue Leeza. Ezio nzila ibiikile mukati kubiikua milopa mu misipa ao kubombia seemu ina ikata ya milopa: Cembe yakasi ya milopa, cembe yasue ya milopa, bikantania milopa, ni plazima. Ni ange matunzo paange te aya ationenesie paswetele muzilo wakue Leeza. Kwa mufuano, matunzo ange ali aloomba kubombia seemu inini-iniini ifumine mu seemu ikata ya milopa. Ni bunge bufundi bwa kutunza, buli bwaloomba bamunghanga babombie milopa yenka yakue muluele. Mu ezio aali yonse, kila muntu apalile kukwata bupinguzi ye muine. a—Bagalatia 6:5.
TUKEBE SAANA
Tumone vya kupingula palua matunzo aloombele kubombia milopa.
3. Kwata bupinguzi buli kumusaansamusia Yehova palua matunzo
Weewe pa lobe, kunti wakita siani eevi ukwate bupinguzi palua matunzo apateene ni malanga akue Leeza? Mone VIIDEO, kisia asuke keeki kiipuzio. Juu ya ki ni kintu kya mana kukita bintu bilandilue paapa pensina ntaanzi ya kukwata bupinguzi?
-
Pepa eevi upate mulangue.—Yakobo 1:5.
-
Kebulula mafunde a Bibilia ni kumona vya kuabombia.—Tuswalo ni Mafunde 13:16.
-
Ipuzia palua matunzo paleepale ali abombiiwa mu fuasi mu wikeele.
-
Toosia kine ni matunzo a siani ausipalile kwitabila.
-
Sininkizia nangue bupinguzi buwakwata buli kulengia kampingu kobe kasyale kaswetele.—Miilo ya Batumua 24:16. b
-
Languluka nangue te kuli muntu apalile kukupinguila kampingu kobe ibe mulume ao mukazi obe, mukote wa mu kilonghaano ao olia umuli mwasambilila nakue Bibilia.—Baroma 14:12.
-
Leemba bupinguzi bobe.
4. Bakasininkizia Bakue Yehova bali baitabizia matunzo aweeme
Kunti kyakitika kukindika muzilo wakue Leeza ulandiile palua milopa ni kutunzua buino bila kubiikua milopa. Mone VIIDEO.
Some Tito 3:2, kisia londoluele keeki kiipuzio:
-
Juu ya ki tupalile kuya twali ni mukinzi kabili twafuukile musita utuli mukulanziana ni ba munghanga?
|
Isipalile kwitabila |
Bupinguzi bwa kila Mukristu |
|---|---|
|
A. Plazima |
Seemu inini-iniini ifumine mu plazima |
|
B. Cembe yasue |
Seemu inini-iniini ifumine mu cembe yasue |
|
C. Bikantania milopa |
Seemu inini-iniini ifumine mu bikantania milopa |
|
D. Cembe yakasi |
Seemu inini-iniini ifumine mu cembe yakasi |
5. Musita luiloombele kubombia seemu inini-iniini ya milopa
Milopa ili na seemu ikata ina: Cembe yakasi, cembe yasue, bikantania milopa, ni plazima. Ezio seemu ikata ili ni seemu ingi iniini saana ili yakuutua seemu inini-iniini ya milopa. c Seemu inge ili yabombiiwa mu matunzo eevi kuluisia maluele ao kukwasia kwimika milopa ilekele kufuma.
Palua kubombia seemu inini-iniini ya milopa, kila Mukristu apalile kupingula ye muine kukoonkana ni kampingu kabeeleziiziwe na Bibilia. Bange kunti bapingula kukaana matunzo ao bufundi bubali babombia babiikilemo ni seemu inini-iniini ya milopa. Kukoonkana ni kampingu kaabo, bange bali baitabizia ezio seemu inini-iniini.
Musita luukebele kukwata bupinguzi, tontonkania keeki kiipuzio:
-
Kunti namubuila siani munghanga kyalengia nkaane ao ngitabile kubiikua seemu paleepale inini-iniini ya milopa?
UNGE KUNTI WAIPUZIA: “Kubiikua milopa mu misipa kubiipileko ki?”
-
Weewe, watontonkania siani?
MU KIFUPI
Yehova atonene tutiine kubombia milopa mu nzila ibiipile.
Kunti waasuka siani?
-
Juu ya ki Yehova amwene milopa kuya yali itakatiifu?
-
Twamana siani nangue malaizio akue Leeza a kwitiinia ni milopa ali abomba ni palua kubiikua milopa mu misipa?
-
Kunti wakita siani eevi ukwate bupinguzi buweeme palua atunzo aloombele kubombia milopa?
MANAKO NI BINGE
Juu ya ki upalile kutontonkania ntaanzi ya kukwata bupinguzi palua bufundi bwa kutunza buloombele kubombia milopa yobe?
“Biipuzio Kufuma ku Bakabeleenga” (Lupungu Lwakue Kamwenenena, lwa 15/10/2000)
Upalile kutontonkania palua ki kine ukebele kwitabila ao kukaana kubiikua seemu inini-iniini ya milopa?
“Biipuzio Kufuma ku Bakabeleenga” (Lupungu Lwakue Kamwenenena, lwa 15/06/2004)
Kiki kyaamukwasiizie munghanga umo azumine nangue malanga akue Yehova palua bukose apateene ni maano?
“Naaitabiziizie Malanga Akue Leeza Palua Milopa” (Buuke!, ya 08/12/2003)
Mona bakote ba kilonghaano bali mu Kabungue Kali Kabomba Pamo ni Opitali vibali bakwasia balupua ni bankazi babo.
a Mona Lisomo lya 35, “Kukita Siani Eevi Tukwate Bupinguzi Buweeme?”
b Mona kamutue kaniini ka 5 kalandile, “Musita Luiloombele Kubombia Seemu Inini-iniini ya Milopa,” ni Bulondolozi Bunge bwa 3, “Matunzo Aloombele Kubombia Milopa.”
c Ba munghanga bange bali bamona elia seemu ina ikata nangue ni yeene ni seemu inini-iniini ya milopa. Pakaako, upalile kumubuila munghanga kyalengia ukaane kubiikua mu misipa milopa yonse yalingi ao cembe yakasi, cembe yasue, bikantania milopa, ao plazima.
