LISOMO LYA 41
Bibilia Ili Yalanda Siani Palua Kulaalana?
Bantu bengi bali baunvua busoni bwa kulanda palua kulaalana. Anzia evio musita Bibilia luili yalanda palua kulaalana, teizi kufiika kantu. Inzi, ili yalanda evio ni mukinzi. Beelia bili byalanda Bibilia, bili byawaamia buikazi bwetu kabili bili byalengia twaluke ni maano, paantu Bibilia ifumine kuli Yehova, Kabumba weetu. Kansi, weene i amanine bintu biweeme saana bya kutukwasia. Ali watubuila bintu bitupalile kukita eevi tumusaansamusie ni beelia bili kutukwasia tusekelele buikazi loonse.
1. Yehova ali wamona siani palua kulaalana?
Kulaalana ni bupe kufuma kuli Yehova. Atonene kulaalana kubaleetele nsaansa ba mulume ni mukazi batoleene. Bobu bupe bwa kulaalana, tebuizi kulengiasie ba mulume ni mukazi bavyale baana. Inzi, buli bwalengia kabili balangililane ntono ni kusaansamusiana. I kili kyalengia Bibilia iye yalanda eevi: “Sekelela pamo ni mukazi wa mu bulumendo bobe.” (Tuswalo ni Mafunde 5:18, 19) Yehova atonene ba mulume ni mukazi Bakristu baye bali ba kisinka kila muntu ku mwinakue. Pakaako, ibe mulume ao mukazi tapalile ata kaniini kukita bukende.—Some Baebrania 13:4.
2. Bulalelaale ni kiki?
Bibilia ili yatubuila nangue “baalia bali bakita bulalelaale . . . te bakapyana Bukolo Bwakue Leeza.” (1 Bakorinto 6:9, 10, NWT) Baalia baaleembele Bibilia baabombiizie mulandu wa Kigiriki por·neiʹa, eevi kuleeta mana ya bulalelaale ao bintu bya bukambue. Mulandu por·neiʹa ubiikile mukati (1) kulaalana a kwa mwalalume ni mwanakazi basinatoolane, (2) kulaalana kwa balalumenke ao banakazinke, ni (3) bantu kulaalana ni banama. Kine ‘twatiina bulalelaale,’ tuli kumusaansamusia Yehova kabili tuli kwaluka ni buikazi bwaweeme.—1 Batesalonika 4:3, NWT.
TUKEBE SAANA
Tumone vya kunti ukite eevi utiine bulalelaale ni mpaalo iwakaba kupata kine watwalilila kuya wali ni lwendo luweeme.
3. Butuka bulalelaale
Yosefu waakeene kulaala ni mwanakazi umo waali watonene kulaala nakue. Some Kutendeka 39:1-12, kisia londoluele beebi biipuzio:
-
Kiki kyaalengiizie Yosefu abutuke?—Mona mulongo wa 9.
-
Pa lobe, watontonkania nangue Yosefu waakwete bupinguzi buweeme? Juu ya ki?
Enu nsiku, balumendo ni bakaziana kunti bakita siani eevi bakoonke mufuano wakue Yosefu ni kubutuka bulalelaale? Mone VIIDEO.
Yehova atonene fwe bonse tusuule bulalelaale. Some 1 Bakorinto 6:18, kisia londoluele beebi biipuzio:
-
Ni aali ki ili kulengia paange muntu afikiile kukita bulalelaale?
-
Kunti wabutuka siani bulalelaale?
4. Kunti wakaana kukita bulalelaale atasie kine bakulavikizia
Ni kiki kili kulengia kiye kyakolele kukaana kukita bulalelaale kine bakulavikizia? Mone VIIDEO, kisia londoluele keeki kiipuzio.
-
Musita ozu lupua ali mu eezi viideo lwaainikile nangue malanga ao mawazo ni bikitua byakue kunti byamulengia te kuti aye wali wa kisinka ku mukazi wakue, waakitile ki?
Musita unge, atasie Bakristu ba kisinka bali baandua kutwalilila kuya bali ni malanga aweeme. Kunti wakita siani eevi utiine kutwalilila kutontonkania bintu bibiipile? Some Bafilipi 4:8, kisia londoluele beebi biipuzio:
-
Ni bintu ki bitupalile kutontonkania?
-
Kusoma Bibilia ni kuya twali ni bingi byakukita mu miilo yakue Yehova, kunti kwatukwasia siani kutiina kukita lizaambi kine twalavikiziiwa?
5. Mafunde akue Yehova ali atuleetela mpaalo
Yehova amanine bintu biweeme saana bitukebele. Ali watubuila vya kunti tukite eevi tuye twali ni lwendo luweeme kabili mpaalo ituli kupata kine twakoonka mafunde akue. Some Tuswalo ni Mafunde 7:7-27 ao mone VIIDEO, kisia londoluele beebi biipuzio.
-
Ozu mulumendo waali waienzia, waaiingiziizie siani mu buavia?—Mona Tuswalo ni Mafunde 7:7-9.
-
Nga vilandile Tuswalo ni Mafunde 7:23, 26, kukita bulaleelale kuli kwaleeta maavia abiipile saana. Kine twatwalilila kuya twali ni lwendo luweeme, tuli kutiina maavia ki?
-
Kine tuli ni lwendo luweeme, twakaba kupata mpaalo ki musita uli waiza?
Bantu bange bali batontonkania nangue beelia bili byalanda Bibilia palua kulaalana balalumenke ni banakazinke bilangiliile nangue Leeza asasile saana kabili tali na ntono. Inzi, Yehova ni Leeza wantono kabili atonene kila muntu asekelele buikazi loonse. Pa kunti tukasekeleleko bobo buikazi, tupalile kukoonka mafunde akue mu buikazi bwetu. Some 1 Bakorinto 6:9-11, kisia londoluele keeki kiipuzio:
-
Kukoonkana ni malanga akue Leeza, eba, kulaalana balalumenke ni banakazinke i kintu sie kimo kibiipile?
Pa kunti tumusaansamusie Leeza, kila muntu apalile kwaluluka. Eba, kukita evio ni kwa mana? Some Malumbo 19:8, 11, kisia londoluele beebi biipuzio:
-
Eba, watontonkania nangue mafunde akue Yehova akolele kunakila? Juu ya ki walanda evio?
Yehova ali mukukwasia bantu bengi baalulule lwendo lwabo nga vilandile mizilo yakue. Wakaba kukukwasia ni weewe
BANGE BALI BALANDA: “Kine bantu babili balaalana, te baluviizie, te batonanasie basi.”
-
Kunti walanda siani?
MU KIFUPI
Kulaalana ni bupe kufuma kuli Yehova. Bobo bupe bwapeelue ba mulume ni mukazi eevi babusekelele.
Kunti waasuka siani?
-
Bulalelaale bubiikile mukati kiki?
-
Ni kiki kili kutukwasia tekuti tukite bulalelaale?
-
Tuli kupata mpaalo ki kine twakoonka mafunde akue Yehova?
MANAKO NI BINGE
Mona juu ya ki ntaanzi mwalalume ni mwanakazi bekale pamo, Leeza atonene bopane.
“Bibilia Ili Yalanda Siani Palua Kwikala Pamo Bila Mwaupeene?” (Lyasi lili mu Kitente kya Enternete)
Mona juu ya ki lifunde lya Bibilia lilandiile palua kulaalana balalumenke ao banakazinke kubiipile inzi, te lilangiliile nangue tupalile kubasuula baalia bali bakita evio.
“Eba, Kulaalana Balalumenke ao Banakazinke Kubiipile?” (Lyasi lili mu Kitente kya Enternete)
Mona mizilo yakue Leeza ilandiile palua kulaalana viili yatusuunga.
“Kulaalana mu Kanua, eba ni Kwene Ni Kulaalana Kakiine?” (Lyasi lili mu Kitente kya Enternete)
Mu lyasi lilandile “Baankitiile ni Mukinzi,” mona keelia kyaamukwasiizie muntu umo abanga walaalana na balalume nakue aalulule buikazi bwakue eevi amusaansamusie Leeza.
“Bibilia Ili Yaalulula Buikazi bwa Bantu” (Lupungu Lwakue Kamwenenena, lwa 01/04/2011)
a Mu Butaabua, ili yaleeta nsoni kulandasie paswetele palua kulaalana. Inzi tupalilesie kulanda bila kufiika kantu eevi kila muntu amane mafunde akue Yehova. Kooko kulaalana, kubiikile mukati bwamba bwa mwalalume kwingizia mu bwamba bwa mwanakazi, kulaalana mu kanua, kulaalana mu matako, ni kusaapia biungo bya buviazi bya muntu unge eevi kubuusia nkulu ya kulaalana.
