LISOMO LYA 42
Bibilia Ili Yalanda Siani Palua Bumbalaka ni Kyupo?
Mu fuasi inge, bantu bali balanda nangue kine muntu tanaupe ao tanaupue, taviinda kuya wali ni nsaansa. Inzi, te bantu bonse bopeene bali ni nsaansa, kabili te bambalaka ao basimbe bonse basili na nsaansa. Kisinka ni keeki: Bibilia ili yalanda nangue bumbalaka pamo ni kyupo, byonse ni bupe kufuma kuli Yehova.
1. Mu bumbalaka muli mpaalo ki?
Bibilia ili yalanda eevi: ‘Mwalalume watona kuupa musakuwa ao mukazi wakue ao mwanakazi watona kuupua wakita buino. Inzi kine topile ao topilue wakila kuwaamia.’ (Some 1 Bakorinto 7:32, 33, 38.) Muntu asinaupe ao kupua, “wakila kuwaamia” mu nzila ki? Bambalaka Bakristu tebeezi kwemena bintu bikebele mulume ao mukazi. Pakaako, lingi bambalaka bali saana ni buntungua. Bange bali bakita bingi mu miilo yakue Yehova. Kwa mufuano, bali bakuukila mu kazonga kange juu ya kusimikila mpunda iweeme. Kintu kikilile kuwaama, kunti bakita musita wingi saana bali mukumupalama Yehova.
2. Kyupo kyandikisiiziwe ku buteeko kili ni mpaalo ki?
Nga evelia mu bumbalaka vimuli mpaalo, mu kyupo ni mwene muli mpaalo iibeleele. Bibilia ili yalanda nangue “kili buino saana bantu kuya bali babili kuliko kuya wali umo.” (Kasimika 4:9) Leelio lileembo ni lya kisinka saana ku Bakristu ba kisinka bali babombia mafunde a Bibilia mu kyupo kyabo. Baalia ba mukazi ni mulume bali baandikisia kyupo kyabo ku buteeko, bali bakita kilapo kya kuya batoneene lyonse, bakindikeene ni kusuungana. Ni kili kyafuminamo, lingi bali baisaanga basuungilue saana kupita ba mulume ni mukazi bekeele pamo bila bamanikile ku buteeko nangue bopeene. Kabili, keekio kyupo kili kyakwasia baana besaange basuungilue buino saana.
3. Yehova ali wamona siani kyupo?
Musita Yehova lwaatendekeziizie kyupo kya kuanza, waalandile eevi: “Mwalalume wakamusia baba wakue ni mama wakue ni kulamatana ni mukazi wakue.” (Kutendeka 2:24) Yehova atonene ba mulume ni mukazi baye batoneene ni kuya balamateene musita onse ubali pa kyalo. Ali walanda nangue, kine umo pakati kabo wakita bukende, ezio i nsaambu bunke ili kulengia bakaanane. Mu aali nga ezio, Yehova apeele nsaambu olia asikitileko bukende apingule kine kunti bakaanana ao abe. a (Mateo 19:9) Yehova tapeele nsaambu Bakristu baye bali ni balume ao bakazi bengi.—1 Timoteo 3:2.
TUKEBE SAANA
Tumone vya kukita eevi uye wali ni nsaansa, kabili vya kumusaansamusia Yehova anzia kine uli mbalaka, uupile ao uupilue.
4. Bombia buino bupe bwa kuya wali mbalaka
Yesu waamwene nangue bumbalaka ni bupe kufuma kuli Yehova. (Mateo 19:11, 12) Some Mateo 4:23, kisia londoluele keeki kiipuzio:
-
Yesu waabombiizie siani bupe bwa kuya wali mbalaka eevi amubombele Baba wakue ni kukwasia bantu bange?
Bakristu bambalaka kunti baaluka ni nsaansa kine babombia buino buikazi bwabo bwa mu bumbalaka nga vyaakitile Yesu. Mone VIIDEO, kisia londoluele keeki kiipuzio.
-
Bakristu bambalaka kunti babombia siani bumbalaka bwabo mu nzila ili yaleeta mpaalo?
Eba, wakiba wamanine?
Bibilia te ilandile miaka ya muntu ya kunti opilepo ao opiluepo. Inzi, ili yakinkizia muntu apembelele mpaka “apite ntendeko ya musita wa bumusepuka.” Paantu pa ozo musita, mulumendo ao mukaziana ali waaluka ni nkulu ikata ya kulaalana ili kulengia apupumine kuupa ao kuupua.—1 Bakorinto 7:36, NWT.
5. Saakula na mulangue olia wa kwaluka mulume ao mukazi obe
Kusaakula olia wakaba kwaluka mulume ao mukazi obe ni bupinguzi bukata saana buwakaba kukita. Some Mateo 19:4-6, 9, kisia londoluele keeki kiipuzio:
-
Juu ya ki Mukristu tapalile kupupumina kuupa ao kuupua?
Bibilia kunti yakukwasia umane mibeele iweeme ya muntu wakuupana nakue. Kintu kya mana saana, kebako olia wa kwaluka mulume obe ao mukazi obe olia amutonene Yehova. b Some 1 Bakorinto 7:39 ni 2 Bakorinto 6:14. Kisia londoluele beebi biipuzio:
-
Juu ya ki tupalile kuupasie ao kuupuasie na Mukristu neetu?
-
Watontonkania Yehova kunti waiunvua siani kine muntu wapingula kuupa ao kuupua na muntu olia asimutonene Weene?
Kine ba nama babili bapuseene saana bakakililua ku mupingo umo, bali kwema saana. Enka evio, kine Mukristu waupana na muntu asizumiine, ali kuya wali ni maavia engi
6. Mona kyupo nga Yehova vyali wakimona
Mu musita wa Baisraeli, balalume bange bali bationa byupo byabo juu ya nsaambu isili na mana. Some Malaki 2:13, 14, 16, kisia londoluele keeki kiipuzio:
-
Juu ya ki Yehova ali wafiitua kine bantu bakaanana juu ya nsaambu inge bila pali kilubo kya bukende?
Bukende pamo ni kutiona kyupo, bili byalengia olia asikitileko kilubo eeme pamo ni baana
Mone VIIDEO, kisia londoluele keeki kiipuzio.
-
Kine mulume ao mukazi obe tazumiine, kunti wakita siani eevi kyupo kyenu kiye kyali ni nsaansa?
7. Bombia mafunde akue Yehova alandiile palua kyupo
Musita unge, kunti yaloomba muntu akite saana maka eevi abombie mafunde akue Yehova alandiile palua kyupo. c Inzi, Yehova ali wapaala baalia bali bakita maka. Mone VIIDEO.
Some Baebrania 13:4, kisia londoluele beebi biipuzio:
-
Eba, watontonkania nangue mafunde akue Yehova alandiile palua kyupo alisie buino? Juu ya ki walanda evio?
Yehova atonene Bakristu bandikisie byupo byabo ku buteeko, ni musita wa kutiona baye ku buteeko, nga evelia vilandile ma buteeko engi mwaya kyalo. Some Tito 3:1, kisia londoluele keeki kiipuzio:
-
Kine muupeene, eba, usininkiziizie nangue kyupo kyenu kimanikile ku buteeko?
UNGE KUNTI WAIPUZIA: “Juu ya ki mpalile kwandikisia kyupo kyane ku buteeko? Ale vitwikeelesie buino?”
-
Kunti waasuka siani?
MU KIFUPI
Bumbalaka ni kyupo, byonse ni bupe kufuma kuli Yehova. Kila umo kunti waaluka ni nsaansa ni buikazi buweeme kinesie waikala wakoonkele bintu bitonene Yehova.
Kunti waasuka siani?
-
Muntu kunti wakita siani eevi abombie buino bumbalaka bwakue?
-
Juu ya ki Bibilia ili yalanda kuupasie ao kuupuasie na Mukristu nobe?
-
Ni nsaambu ki imosie ili yalanda Bibilia ili kulengia kyupo kitionue?
MANAKO NI BINGE
Kuupana “muli Mulopue sie” kuli na mana ki?
“Biipuzio Kufuma ku Bakabeleenga” (Lupungu Lwakue Kamwenenena, lwa 01/07/2004)
Mona ma viideo abili afupi, ali kuviinda kukukwasia kukwata bupinguzi buweeme musita luuli mukuya wakeba wa kuchumbiana nakue ao wakuupana nakue.
Mona juu ya ki lupua umo, ali wamona nangue beelia byali wamupeela Yehova te kantu, inzi beelia bili byamupeela Yehova ni bya mana saana.
Ntaanzi ya kutiona kyupo ao kutengana, muntu apalile kukita ki?
“Kindika ‘Keelia Kyaakwataniiziwe na Leeza’” (Lupungu Lwakue Kamwenenena, lwa Muezi wa 12, 2018)
a Mona Bulondolozi Bunge bwa 4 kine paaluka kutengana bila pali akitile bukende.
b Mu fuasi inge, baviazi bali basaakwila muana wabo mwalalume ao mwanakazi muntu wakuupana nakue. Mu aali nga ezio, baviazi bali ni ntono, te bapalilenke kupooza maano ku nfalanga ao ku aali ya buikazi bwa ozo muntu wa kwaluka mu ka muana wabo. Inzi, bapalile kumonanke kine amutonene Yehova.
c Kine wikeele ni muntu uusyupeene nakue, we muine i wa kupingula kine kumusia ao muupane.
