LISOMO LYA 44
Eba, Nsikunkulu Yonse Ili Yamusaansamusia Leeza?
Yehova atonene tusekelele buikazi kabili tuye twali ni musita wa kwisaansamusia. Inzi, eba, nsikunkulu yonse ili yamusaansamusia? Kunti twalangilila siani nangue tumutonene Yehova palua kukita nsikunkulu?
1. Juu ya ki nsikunkulu ingi teizi kumusaansamusia Yehova?
Paange kunti wapapa kumana nangue nsikunkulu ingi, te ipateene ni masambilizio a Bibilia ao yaatendekeziiziwe na bapagaani. Ezio nsikunkulu, kunti yaya yapateene ni diini ya bufi. Kunti yaya yapateene ni bintu bya mipasi ao yaimaniine pa malanga a kulanda nangue mweo tewizi kufua. Ni inge nsikunkulu, imaniine pa kuzumina mu maka a bintu bisimanikile buino ao kuzumina lisyuko ao bati. (Isaya 65:11) Yehova ali wabasoka eevi babombi bakue: “Fume pakati kabo . . . Kabili tekukumie ku kintu kitiikeene.”—2 Bakorinto 6:17. a
2. Yehova ali waiunvua siani palua nsikunkulu ili yakitua juu ya kulumbania bantu?
Yehova ali watusoka te kunti twingile mu muteo wa ‘kuswapila bantu ba mpuni.’ (Some Yeremia 17:5.) Nsikunkulu paleepale, ili yalumbania bakateeka ao basoda bakiviinda vita. Nsikunkulu inge, ili yakitua juu ya kulanguluka busiku bwaakombwelue kyalo mu buzia ao juu ya kulumbania tulangi twa kyalo kyabo nga evelia drapo. (1 Yoane 5:21) Ni inge, ili yakitua eevi kulumbania byama bya politike ao tubungue twa baraia. Yehova ali waiunvua siani kine twatwala bulumba ku bantu ao ku bikundi bya bantu bipaangilue, aasa beelia bili byalengia bantu baaluke ni malanga apuseene ni kutona Kwakue?
3. Ni mibeele ki ili kulengia nsikunkulu tekuti itabilue kuli Leeza?
Bibilia ili yakaania “kumina saana, maliila apitiliile, kukita masiindano a kumina.” (1 Petro 4:3, NWT) Mu nsikunkulu inge, lingi bantu tebeezi kwitiinia kabili bali bakita bintu bya bukambue. Eevi tutwalilile kuya twali babibuza bakue Yehova, tupalile kutiina kukita bintu bibiipile nga bebio.
TUKEBE SAANA
Tumone viuli kumusaansamusia Yehova kupitila kukwata bupinguzi bwa mulangue palua kukita nsikunkulu.
4. Tiina nsikunkulu isiizi kumusaansamusia Yehova
Some Baefeso 5:10, kisia londoluele beebi biipuzio:
-
Tupalile kusininkizia ki musita utuli mukukeba kupingula kine tuli kukitako nsikunkulu ao abe?
-
Ku fuasi ku wikeele, ni nsikunkulu ya siani ili yakita saana bantu bengi?
-
Eba, watontonkania nangue ezio nsikunkulu ili yamusaansamusia Yehova?
Kwa mufuano, waatontonkaniziepo kale kumona kine Leeza ali wamona siani kukita nsikunkulu ya busiku bwa kuvyalua? Mu Bibilia, te kuli pa fuasi palandile nangue babombi bakue Yehova baakitile nsikunkulu ya busiku bwa kuvyalua. Inzi, ili yalandasie palua nsikunkulu ibili ya busiku bwa kuvyalua yaakitilue na bantu basibanga bamubombela Yehova. Some Kutendeka 40:20-22 ni Mateo 14:6-10. Kisia londoluele beebi biipuzio:
-
Ni bintu ki bipateene mu eezi nsikunkulu?
-
Kukoonkana ni eezi mpunda ili mu Bibilia, watontonkania Yehova ali waiunvua siani palua kukita nsikunkulu ya busiku bwa kuvyalua?
Paange kunti waiipuzia, ‘Eba, kakiine Yehova ali waiunvua ovio kine nakitako nsikunkulu ya busiku bwa kuvyalua aosie nsikunkulu inge isilandilue na Bibilia?’ Some Kufuma 32:1-8. Kisia, mone VIIDEO ni kulondoluela beebi biipuzio.
-
Juu ya ki tupalile kusininkizia keelia kiitabiilue na Yehova?
-
Kunti twakita siani evio?
Kunti wainika siani nangue eezi nsikunkulu teizi kumusaansamusia Yehova?
-
Eba, ipuseene ni masambilizio a Bibilia? Pa kunti winike, keba umane viyaatendekele.
-
Eba, ili yalumbania bantu, bikundi bya bantu bipaangilue, ao tulangi twa kyalo kyabo nga evelia drapo? Fwefue, tuli twamulumbania Yehova kuliko bintu byonse ni kuswapila nangue weene i wakaba kupuisia maavia ali mu kyalo.
-
Tubeelela pamo ni bintu bili byakituamo, eba, bipingeene ni mafunde a Bibilia? Fwefue, tupalile kuya twali ni lwendo lwaweeme.
5. Bakwasie bange bakindike bintu biuzumiine
Kunti kyaya kyakolele kine bange bakupatikizia ukiteko nsikunkulu isiizi kumusaansamusia Yehova. Babuile bupinguzi bobe wateekameene kabili wali ni mukinzi. Eevi umone vya kunti uviinde kukita evio, mone VIIDEO.
Some Mateo 7:12, kisia londoluele beebi biipuzio:
-
Kukoonkana ni leeli lileembo, eba, upalile kubalanda bantu ba mu lupua lobe basizumiine nangue te bapalile kukita nsikunkulu?
-
Kunti wakita ki eevi ubasininkiziizie bantu ba mu lupua lobe nangue anzia kine teukita nabo nsikunkulu, ubatonene kabili ubamwene kuya bali bantu ba mana?
6. Yehova atonene tuye twali ni nsaansa
Yehova atonene tupisie musita waweeme twali mukusekelela pamo ni bantu ba mu lupua ao babibuza betu. Some Kasimika 8:15, kisia londoluele keeki kiipuzio:
-
Mu leeli lileembo, ni kiki kyalangilila nangue Yehova atonene tuye twali ni nsaansa?
Yehova atonene bantu bakue basekelele buikazi, kabili baye bapisia musita waweeme bali mukusekelela pamo ni bange. Mone VIIDEO eevi mumone ezio aali viyaamwenekele paswetele musita wa kulonghaana kukata kwa ntundu ingi.
Some Bagalatia 6:10, kisia londoluele beebi biipuzio:
-
Eba, tupalile kukitako nsikunkulu ili yakitua saana na bantu juu ya sie ‘kuwamiizia’ bantu bange?
-
Ni kiki kili kyakuleetela saana nsaansa: eba, kupeelana paantusie kuli nsikunkulu ao paantu wapeelana mu kwitonena?
-
Musita unge, Bakasininkizia bali bateaniako busiku bwibeleele eevi basekelele pamo ni baana babo ni kubapeelako bintu bibasyakiba babalaile. Kine uli ni baana, ni bintu ki bibeeleele biuli kuviinda kubapeela?
BANGE BALI BALANDA: “Koolia kwaatendekeele nsikunkulu, te buavia saana. Kintu sie kya mana ni kupisia musita pamo ni bantu ba mu lupua ni benoobe.”
-
Kunti walanda siani?
MU KIFUPI
Yehova atonene tusekelele kupisia musita pamo ni bantu ba mu lupua ni beneetu. Inzi kabili, atonene tutiinekukita nsikunkulu yasiizi kutona.
Kunti waasuka siani?
-
Kunti twaiipuzia biipuzio ki eevi kumana kine Yehova ali watona nsikunkulu fulani?
-
Kunti twabakwasia siani bantu ba mu lupua ni beneetu bamane nangue tetwizi kukitako nsikunkulu?
-
Wamana siani nangue Yehova atonene tuye twali ni nsaansa ni kusekelela buikazi?
MANAKO NI BINGE
Mona nsikunkulu paleepale isiizi kukitua na Bakristu.
Mona nsaambu ina ilengiizie tuzumine nangue nsikunkulu ya kuvyalua teizi kumusaansamusia Leeza.
Mona mulumendo umo vyaalangiliile mukinzi lubamuzielekaniizie na benakue ku masomo paantu teezi kukitako Noeli.
Bakristu bengi saana bali bakaana kukita Noeli. Bali baiunvua siani palua bupinguzi bwabo?
“Baapatile Kintu Kimo Eevi Kyaweeme Saana” (Lupungu Lwakue Kamwenenena, lwa 01/12/2012)
a Mone Bulondolozi Bunge bwa 5 eevi kumana vya kukita mu aali inge kine bange bali mukukita nsikunkulu.
