Yesu waasambiliziizie basambi bakue nangue te bapalile kuya bali “seemu ya kyalo.” (Yoane 15:19, NWT) Kusia wali seemu ya kyalo ao kusikwasiako bintu bya mu kyalo, kuli na mana ya kusiingizia mu bintu bya politike bya keenu kyalo ni mu vita. Kakiine, kusikwasiako ku bebio bintu te kuleengele ata kaniini. Lunge, kunti twazyelekaniiwa paantu te twiungile ku lubali ata lumo. Kunti twakita siani eevi te kunti tukwasieko bintu bya mu kyalo ni kutwalilila kuya twali ba kisinka kuli Yehova Leeza?

1. Bakristu ba kisinka bali bamona siani ma buteeko a bantu?

Bakristu bali bakindika buteeko. Tuli twakita nga vyaalandile Yesu: ‘Byakue kateeka, sonke kuli kateeka.’ Ezio i nsaambu ili yalengia tuye twanakila mizilo ya mu kyalo kitwikeelemo nga evelia elia ilandile kuya twalipa mikanda ao bitansi. (Marko 12:17) Bibilia ili yasambilizia nangue, kine ma buteeko a bantu ali mukuteeka, ni paantu Yehova abapeele nsaambu ya kuteeka. (Baroma 13:1) Pakaako twinikile nangue ma buteeko a bantu ali ni mipaka ao ali ni buviinde buniini kuliko Leeza. Tupembeelesie Leeza ni Bukolo bwakue bupuisie maavia onse ali na bantu.

2. Kunti twakita siani eevi tulangilile nangue te tukwasiizie ku lubali ata lumo?

Nga evelia Yesu, ni fwefue tetwizi kwiingizia mu bintu bya politike. Musita bantu lubaamwene kimpezia maano kyaakitile Yesu, baakebele kumutwama bamwalule likolo wabo pa kyalo, inzi Yesu waabutukile. (Yoane 6:15) Juu ya ki? Kyaalengiizie, ni milandu yaalandile kisia paapo, waalandile eevi: “Bukolo bwane te bwa paano pa kyalo.” (Yoane 18:36) Paantu tuli basambi bakue Yesu, tuli twalangilila nangue te tuli mukukwasia ku lubali ata lumo mu nzila ingi. Kwa mufuano, tetwizi kuya ku vita. (Some Mika 4:3.) Tuli twakindika tulangi tulangiliile kyalo nga evelia drapo, inzi tetwizi kubipeela mukinzi utupalile kupeela Leeza. (1 Yoane 5:21) Kabili tetwizi kukwasia ao kupinga kyama kya politike ao muntu wa kusaakulua eevi aaluke kateeka. Lutuli twakita evio, tuli twalangilila nangue tuli ba kisinka ku buteeko bwakue Leeza, i kulanda ku Bukolo bwakue.

 TUKEBE SAANA

3. Bakristu ba kisinka tebeezi kukwasia ku lubali ata lumo

Yesu pamo ni basambi bakue baatusiliile mufuano. Some Baroma 13:1, 5-7 ni 1 Petro 2:13, 14. Kisia, mone VIIDEO ni kulondoluela beebi biipuzio.

• Juu ya ki tupalile kukindika bantu ba mu buteeko?

• Kunti twalangilila mu nzila ki paleepale nangue tuli twanakila ku babo bantu?

Musita wa vita, byalo bingi bili byalanda nangue te bili ku lubali ata lumo, inzi kuya byakwasiako. Kusikwasiako kakiine ku lubali ata lumo kuli na mana ki? Some Yoane 17:16. Kisia, mone VIIDEO ni kulondoluela keeki kiipuzio.

• Kusikwasiako ku lubali ata lumo kuli na mana ki?

Ale kine ma buteeko a bantu alanda tukite kintu kipingeene ni muzilo wakue Leeza, tuli kukita siani? Some Miilo ya Batumua 5:28, 29. Kisia, mone VIIDEO ni kulondoluela beebi biipuzio.

• Kine muzilo ubiikilue na buteeko bwa bantu wapingana ni muzilo wakue Leeza, tupalile kunakilapo muzilo wakue ni?

• Kunti wazimbulako ni aali inge Mukristu mwasipalile kunakila muzilo ubiikilue na bakulu ba buteeko?

 4. Te kuya wali ku lubali ata lumo mu maano obe ni mu bikitua byobe

Some 1 Yoane 5:21. Kisia, mone VIIDEO ni kulondoluela beebi biipuzio.

• Mu eezi viideo, juu ya ki Ayenge waapinguile kukaana kwingila mu kyama kya politike ao kukitako tubeelela twa kulumbania kyalo kyabo nga evelia kupozia drapo?

• Pa lobe, watontonkania nangue waakitilesie buino?

Ni aali ki inge ili kulengia tumone kyakolele kutiina kukwasiako ku lubali ata lumo? Mone VIIDEO, kisia londoluele beebi biipuzio.

• Kunti twatiina siani kuya twali ku lubali ata lumo musita utuli mukukentelela misaapo ya kutapana ili mukusaapua mwaya kyalo?

• Kunti twatiina siani kukwasiako ku lubali ata lumo kine bupinguzi bwa bakulu ba buteeko bwatukisia ao bwawaamia buikazi bwetu?

• Kine tuli ni kabeelela ka kutuilizia mpunda ya bintu bya politike ao kwenda ni baalia bali batona kulanda bintu bya politike, juu ya ki kunti kyakola kutiina kukwasiako ku lubali ata lumo?

 MU KIFUPI

Bakristu bali baikwinda saana eevi te kunti bakwasieko ku lubali ata lumo mu bintu bya politike kupitila kutontonkania, mu kulanda ni mu bikitua byabo.

Kunti waasuka siani?

• Tupalile kuapeela ki ma buteeko a bantu?

• Juu ya ki te tupalile kukwasiako bintu bya politike?

• Ni bintu ki bili kulengia tumone kyakolele kutiina kukwasiako ku lubali ata lumo?