LISOMO LYA 47

Eba, Witeaniizie Palua Kubatiziiwa?

PLAY

Wakimana bintu bingi palwakue Yehova kupitila lisambililo lyobe lya Bibilia. Kabili paange wakikitako ni bupilibuko eevi kubombia beelia biuli mukusambilila. Inzi, paange kuli ni kintu kikulengiizie te kunti wipeele kuli Yehova ni kufikiila kubatiziiwa. Mu leeli lisomo, tuli kumona bintu paleepale bili byalengia muntu atiine kubatiziiwa kabili viuli kukita eevi tekuti utiine.

1. Eba, upalile kumana bintu bingi saana ntaanzi ya kubatiziiwa?

Pakuti ubatiziiwe, upalile “kumana kisinka.” (1 Timoteo 2:4) Keekio te kilangiliile nangue ntaanzi ya kubatiziiwa upalile kuya wamanine kila kyasuko kya kiipuzio kibali kukwipuzia palua mpunda ili Bibilia. Atasie Bakristu baabatiziiziwe papita kale miaka ingi, ni beene batwaliliile kusambilila Bibilia. (Bakolosai 1:9, 10) Inzi, upalile kumana masambilizio a musinzi a Bibilia. Kine te wimwene nangue wakimana kale bintu bingi ao ata, landa ni bakote ba mu kilonghaano bakukwasie.

2. Ntaanzi ya kubatiziiwa upalile kukita ki?

Ntaanzi ya kunti ukabe kubatiziiwa, upalile ‘kulapila ni kupilibuka.’ (Some Miilo ya Batumua 3:19, NWT.) Ezio ili na mana ya kulanda nangue wanuuna saana juu ya bilubo biwaakitile ni kumuloomba Yehova akweleele. Kabili wapingula kakiine kulekela lwendo lubiipile, kisia utwalilile kwikala buikazi bwa kumusaansamusia Leeza. Kukila pakaako, watendeka kubombako miilo ipaangilue na kilonghaano, kuya ku kulonghaana, kwasukapo ni kusimikila wali kasimika asinabatiziiwe.

3. Juu ya ki te upalile kunvua mwenzo wa kubatiziiwa?

Bange bali baunvua mwenzo nangue kine bamulaya Yehova, te bakaba kuviinda kukita beelia bibamulaya. Kulanda kisinka, musita unge wakaba kukita kilubo. Atasie balalume ni banakazi ba kisinka bazimbuilue mu Bibilia, ni beene baakitile bilubo. Pakaako, Yehova taswapiile babombi bakue baye bapuililikile. (Some Malumbo 103:13, 14.) Inzi, ali watona kine waikwinda eevi kumusaansamusia! Wakaba kukukwasia. Kukila pakaako, Yehova watusininkiziizia nangue bintu byonse “tebikaviinda kutufumia ku ntono itutonenue na [weene].”—Some Baroma 8:38, 39.

TUKEBE SAANA

Tumone kumumana buino Yehova ni kwitabila akukwasie, vikuli kukupeela maka eevi tekuti utiine bintu bili kukulengia te kunti ubatiziiwe.

4. Mumane buino Yehova

Ntaanzi ya kunti ukabe kubatiziiwa, upalile kumumana siani Yehova? Upalile kumumana buino eevi umutone ni kukeba kumusaansamusia. Mone VIIDEO eevi kumona basambi ba Bibilia mwaya kyalo vibali bakita evio. Kisia londoluele keeki kiipuzio.

VIIDEO: Nzila ya Kukutwala ku Lubatizio (3:56)

Mu eezi viideo, ni kiki kyaakwasiizie bantu bange eevi beteanie palua kubatiziiwa?

Some Baroma 12:2, kisia londoluele beebi biipuzio:

Eba, uli watwisika palua beelia bili byasambilizia Bibilia ao kine Bakasininkizia Bakue Yehova bali basambilizia kisinka?
Kine uli watwisika, kunti wakita ki?

5. Maavia te kunti akulengie wandue kubatiziiwa

Fwe bonse, tuli twasaakaana ni maavia lutuli twapingula kwipeela kuli Yehova ni kubatiziiwa. Eevi kumona mufuano umo, mone VIIDEO, kisia londoluele beebi biipuzio.

VIIDEO: Kine Umutonene Yehova Uli Kuluisia Maavia (5:22)

Mu eezi viideo, Narangerel waanziizie maavia ki eevi amubombele Yehova?
Kumutona Yehova kwaamukwasiizie siani kwanzia azo maavia?

Some Tuswalo ni Mafunde 29:25 ni 2 Timoteo 1:7, kisia londoluele keeki kiipuzio:

Ni bintu ki bili kutukwasia tuye twakinkimeene eevi kuluisia maavia?

6. Muswapile Yehova akukwasie

Yehova wakaba kukukwasia ukabe kuviinda kumusaansamusia. Mone VIIDEO, kisia londoluele beebi biipuzio.

VIIDEO: Yehova Leeza Wakaba Kukukwasia (2:50)

Mu eezi viideo, juu ya ki musambi wa Bibilia waali watiina kubatiziiwa?
Ni kiki kyaamukwasiizie eevi akile kumuswapila Yehova?

Some Isaya 41:10, 13, kisia londoluele keeki kiipuzio:

Musita luwaipeela kuli Leeza, juu ya ki uli kuya wali ni kisinka nangue wakaba kufikilizia beelia biwaamulaile musita wa kwipeela kuli weene mu lipepo?

7. Uye watasia saana juu ya ntono yakue Yehova

Kine wakila kutontonkania saana Yehova vyakutonene, wakaba kukila kumutasia ni kutona kumubombela loonse. Some Malumbo 40:5, kisia londoluele keeki kiipuzio:

Ni bintu ki bikupeele Yehova biuli watasia saana?

Kabika Yeremia waali wamutonene Yehova ni mulandu wakue. Kabili, waali watasia saana juu ya lisyuko lyabanga nalio lya kumubombela Yehova. Waalandile eevi: “Mulandu obe waalukile musaansamuko kuli neene ni nsaansa ya mutima wane, paantu liina lyobe lili lyakuutua pali neene, We Yehova Leeza.” (Yeremia 15:16) Asuka beebi biipuzio:

Juu ya ki ni lisyuko likata saana kwaluka umo wa Bakasininkizia Bakue Yehova?
Eba, ni weewe utonene kubatiziiwa eevi waluke umo wa Bakasininkizia Bakue Yehova?
Eba, kuli ni kintu kili mukuya kyakulengia te kunti ubatiziiwe?
Pa lobe, watontonkania nangue upalile kukita ki eevi ukabe kubatiziiwa?

BANGE BALI BALANDA: “Ndi mukutiina kubatiziiwa paantu nsikaba kuviinda kukita byonse binakaba kumulaya Leeza.”

Ni weewe i viumwene?

MU KIFUPI

Yehova wakaba kukukwasia eevi uviinde kwanzia buavia bonse buli mukuya bwakulengia utiine kubatiziiwa.

Kunti waasuka siani?

Eba, upalile kumana bintu bingi saana ntaanzi ya kubatiziiwa?
Ntaanzi ya kunti ukabe kubatiziiwa, kunti yaloomba ukabe kukita bupilibuko mu bintu ki?
Juu ya ki te upalile kulekelela mwenzo ukulengie utiine kubatiziiwa?

Eezi seemu twaipua pa nsiku:

Ezianke kukita eevi

Pitulukamo mu bisanduku bili ku muisio wa Seemu ya 4, bilandile “Eba, Ngiteaniizie Eevi Kusimikila Pamo ni Kilonghaano?” ni “Eba, Ngiteaniizie Eevi Kubatiziiwa?”

Paangako ni kange:

Mupaango obe unge