LISOMO LYA 04
Leeza Naani?
Kubambila musita wa kale mpaka loonu, bantu bali bapupa baleeza bengi. Inzi Bibilia ili yalanda nangue kuli ni Leeza umo “mukulu kupita baleeza bange bonse.” (2 Milandu ya Nsiku 2:5) Ozo Leeza naani? Kabili ni kiki kilengiizie aye wali mukulu saana kupita baleeza bange bonse bali bapupua na bantu? Mu leeli lisomo, mona Leeza vyali mukuya waizimbula kuli weewe eevi umumane.
1. Leeza liina lyakue naani, kabili ni kiki kilangiliile nangue atonene tumumane?
Leeza waizimbula mu Bibilia eevi tumumane. Walanda eevi: “Neene ndi Yehova. Leelio i liina lyane.” (Some Isaya 42:5, 8.) Leeli liina “Yehova,” lifumine mu Kiebrania. Bantu basambiliile palua Bibilia bali balanda nangue leelio liina mana yakue “Ali Walengia Kwaluke.” Yehova atonene tumane liina lyakue. (Kufuma 3:15) Ni kiki kyatusininkiziizia evio? Bibilia ili ni liina lyakue mara ikilile pa elufu saba (7 000)! a Yehova i liina lyakue “Leeza Mukose ni wa kiine.”—1 Batesalonika 1:9.
2. Bibilia ili yatubuila ki palwakue Yehova?
Bibilia ili yalanda nangue pakati ka baleeza bonse bali bapupua na bantu, Yehova i Leeza sie bunke wa kisinka. Juu ya ki? Kuli bintu bingi bisininkiziizie evio. Yehova i ali ni buviinde bukata saana, kabili weenesie bunke i “Wapamuulu Saana pa kyalo kyonse.” (Some Malumbo 83:18.) Bibilia ili yamukuuta nangue ‘Wamaka Onse,’ paantu ali ni maka a kukita kila kintu kyali kutenga. (Nfyulo 11:17) “Waalengele ao waabumbile byonse”—myulu pamo ni kila kintu kili ni bukose kili pa kyalo. (Nfyulo 4:11) Kangeko, lyonse Yehova sie bunke i waaliko, kabili i wakabako loonse.—Malumbo 90:2.
TUKEBE SAANA
Tumone bupusano buli pakati ka meena a mukinzi akue Leeza ni liina lyakue lya bunke. Kisia, tumone vyaizimbula kuli weewe kabili juu ya ki wakita evio.
3. Leeza ali ni meena engi a mukinzi, inzi alisie na liina limo lyakue bunke
Eevi kumana meena a mukinzi a muntu viapuseene ni liina lyakue lya bunke, Mone VIIDEO, kisia londoluele keeki kiipuzio:
-
Liina lya mukinzi “Mulopue,” lipuseene siani ni liina lyakue lya bunke?
Bibilia ili yalanda nangue bantu bali bapupa baleeza ni bamulopue bengi. Some Malumbo 136:1-3, kisia londoluele keeki kiipuzio:
-
“Leeza wa baleeza” ni “Mulopue wa bamulopue” naani?
4. Yehova atonene umane liina lyakue ni kuya walibombia
Ni kiki kilangiliile nangue Yehova atonene umane liina lyakue? Mone VIIDEO, kisia londoluele beebi biipuzio:
-
Ati, watontonkania nangue Yehova atonene liina lyakue limanike? Juu ya ki?
Yehova atonene bantu babombie liina lyakue, nga evelia vikilandilue mu Baroma 10:13, (NWT), lilandile eevi: “Paantu ‘kila muntu olia ali wakuutila mu liina lyakue Yehova wakaba kupusuka.’” Kisia londoluele beebi biipuzio:
-
Juu ya ki ni kintu kya mana kubombia liina lyakue Leeza, Yehova?
-
Uli waiunvua siani musita muntu umo lwali walanguluka liina lyobe ni kulibombia?
-
Tontonkanianke, ati kine weewe wabombia liina lyakue Yehova, ali kwiunvua siani?
5. Yehova atonene waluke kibuza wakue
Mwanakazi umo wa mu kyalo kya Kambodia, ali wakuutua Soten waalandile nangue “Kumana liina lyakue Leeza kwamuleteele nsaansa yasibanga wali tanapatepo.” Mone VIIDEO, kisia londoluele beebi biipuzio.
-
Mu eezi viideo, kumana liina lyakue Leeza kwamukwasiizie siani Soten?
Liingi, ntaanzi ya kukita bukibuza ni muntu, uli wamananke liina lyakue. Some Yakobo 4:8a, kisia londoluele beebi biipuzio:
-
Yehova wakulanda ukite ki?
-
Kumana liina lyakue Leeza ni kulibombia kunti kwakukwasia siani weewe wiunvue kuya wali peepi nakue?
BANGE BALI BALANDA: “Kulisie Leeza umo. Atasie umukuute mu liina ki, ali kwitaba.”
-
Usininkiziizie nangue Yehova i liina lyakue Leeza?
-
Kiki kilangiliile nangue Leeza atonene tubombie liina lyakue?
MU KIFUPI
Yehova i liina lyakue Leeza umo sie wa kisinka. Yehova atonene tumane ni kubombia liina lyakue eevi tumupalame.
Kunti waasuka siani?
-
Yehova apuseene siani ni baleeza bange bonse bali bapupua na bantu?
-
Juu ya ki tupalile kubombia liina lyakue Leeza?
-
Ni kiki kilangiliile nangue Yehova atonene umupalame?
MANAKO NI BINGE
Mona nsaambu isaano ili kulengia tuye twali ni kisinka nangue Leeza kwali.
Mona juu ya ki kuzumina nangue lyonse Leeza kwali kupateene ni maano.
“Naani Wamubumbile Leeza?” (Lupungu Lwakue Kamwenenena, lwa 01/08/2014)
Mona juu ya ki tupalile kubombia liina lyakue Leeza anzia kine te tumanine kakiine vilyali lyazimbulua musita wa kale.
Kuli ni buavia kine twamukuuta Leeza mu liinasie lyonse litwatona? Mona juu ya ki twalanda nangue alisie na liina limo lya bunke.
“Leeza Ali ni Meena Anga?” (Lyasi lili mu Kitente kya Enternete)
a Eevi upate mpunda ingi palua mana ya liina lyakue Leeza, kabili juu ya ki mpilibulo inge ya Bibilia yaafumiizie leelio liina, mona Apandisi A4 ili mu Biblia—Tafsiri ya Ulimwengu Mupya, mu lulimi lwa Swahili (Congo).
