Yehova atonene umumane buino saana. Juu ya ki? Aswapiile nangue luwakaba kukila kumana mibeele yakue, vyali wabakitila bantu, ni beelia byatonene, wakaba kukila kutona kwaluka kibuza wakue. Eba, weewe kunti waaluka kakiine kibuza wakue Leeza? (Some Malumbo 25:14.) Kunti wakita ki eevi waaluke kibuza wakue Leeza? Bibilia ili yaasuka bebio biipuzio. Kabili Bibilia ili yatubuila juu ya ki Yehova i kibuza akilile kuwaama uuli kwaluka nakue.

1. Yehova wakukupa ukite ki?

“Mupalame Leeza, ni ye ali kumipalama.” (Yakobo 4:8) Bobo bulanzi buli na mana ki? Yehova ali mukuya wakukupa waaluke kibuza wakue. Bange bali bamona kyakolele kukita bukibuza pamo ni Leeza paantu te beezi kumumona. Inzi mu Mulandu wakue, Bibilia, Yehova ali watubuila kila kintu kitukabiile kumana palua mibeele yakue eevi tumupalame. Musita utuli twasoma mpunda itupeelue na Leeza ili mu Bibilia, bukibuza bwetu pamo nakue buli bwakila kukosa anzia kine tetwizi kumumona.

2. Juu ya ki Yehova i Kibuza aweeme saana uuli kwaluka nakue?

Te kuli muntu akutonene saana nga evelia Yehova vyakutonene. Atonene uye wali ni nsaansa, kabili uye wapepa kuli weene nsitasie yonse iuli mu maavia. Kunti ‘wamutuulila Leeza maavia obe onse, paantu weene i akulabukiile.’ (1 Petro 5:7) Lyonse, Yehova eteaniizie eevi kubakwasia, kubakoselezia ni kubatuilizia babibuza bakue.​—Soma Malumbo 94:18, 19.

3. Pa kuti twaluke babibuza bakue Yehova, tupalile kukita ki?

Yehova atonene bantu bonse, inzi “ali wakita bukibuza bwa peepi pamo ni bantu balungheeme.” (Tuswalo ni Mafunde 3:32) Yehova aswapiile babibuza bakue bakite bintu byamwene nangue biweeme, kabili batiine kukita bintu byamwene nangue bibiipile. Bange bamwene nangue tebaviinda ata kaniini kukoonka beelia bilandile Yehova bakite ao te kunti bakite. Inzi, Yehova amanine buino ezio aali. Ali wamwitabila kila muntu olia amutonene kakiine, ni kuya wakita maka eevi kumusaansamusia Yehova.​—Malumbo 147:11; Miilo ya Batumua 10:34, 35.

 TUKEBE SAANA

4. Abrahamu waali Kibuza wakue Yehova

Mpunda ili mu Bibilia ilandiile palwakue Abrahamu (abanga wakuutua kabili Abramu), yatukwasia kwinika mana ya kuya wali kibuza wakue Yehova. Some mpunda ilandiile palwakue Abrahamu ili mu Kutendeka 12:1-4. Kisia, londoluele beebi biipuzio:

• Yehova waamulandile Abrahamu akite ki?

• Yehova waamulaile ki?

• Abrahamu waakitile siani musita Yehova lwaamupeele malaizio?

5. Yehova aswapiile babibuza bakue bakite ki?

Liingi, tuli twaikala twaswapiile bintu fulani kufuma ku babibuza betu.

• Weewe uli watona babibuza bobe baye bakukitila bintu ki paleepale?

Some 1 Yoane 5:3, kisia, londoluele keeki kiipuzio:

• Yehova atonene babibuza bakue bakite ki?

Pa kuti tumunakile Yehova, kuti twaya twakabiile kwalulula lwendo lwetu ao mibeele yeetu. Some Isaya 48:17, 18, kisia londoluele keeki kiipuzio:

• Juu ya ki Yehova akebele babibuza bakue bawaamie lwendo lwabo?

 6. Yehova ali wakita ki eevi kubakwasia babibuza bakue?

 MU KIFUPI

Yehova atonene aaluke Kibuza obe, kabili wakaba kukukwasia eevi umupalame.

Kunti waasuka siani?

• Yehova ali wabakwasia siani babibuza bakue?

• Juu ya ki Yehova ali wabalanda babibuza bakue bawaamie lwendo lwabo?

• Eba, uli watontonkania nangue kikolele saana kwaluka kibuza wakue Yehova? Juu ya ki uli watontonkania evio?