LISOMO LYA 11

Kunti Wakita Siani Eevi Kusoma Bibilia Kukukwasie Saana?

PLAY

Tontonkania nangue ukebele kwimika nsesi inzi bila wamanine pa kutendekela. Kwimika nsesi, ni miilo ikolele saana. Inzi, eevi kuleengia ezio miilo, upalile kuikasania mu miilo inini-iniini, elia ileengele saana. I vili ni kusoma Bibilia. Paange kunti waiipuzia eevi: ‘Ndi kutendekela pi?’ Mu leeli lisomo, tuli kumona bintu paleepale bileengele biupalile kukita, bili kukukwasia uye wasekelela kusoma ni kusambilila Bibilia.

1. Juu ya ki tupalile kusoma Bibilia kila busiku?

Olia muntu ali wasoma Bibilia ao “muzilo wakue Yehova” kila busiku, wakaba kuya wali ni nsaansa. (Some Malumbo 1:1-3.) Pa kunti utendeke, ezia kuya wakita dakika iniini kila busiku wasoma Bibilia. Luwakaba kuya wakila kwizibila ni Mulandu Wakue Leeza, i luwakaba kuya wakila kusekelela kuusoma.

2. Ni kukita siani eevi beelia bituli mukusoma mu Bibilia bitukwasie?

Pa kunti beelia bituli mukusoma bitukwasie saana, tupalile kwimananke mu kusoma, ni kutontonkania palua beelia bituli mukusoma. Tupalile kusoma Bibilia ni “kutontonkania saana” palua beelia bitwasoma. (Yoshua 1:8, bulondolozi bwa pensina) Musita luuli mukusoma, iipuzie biipuzio nga beebi: ‘Leeli lileembo lyansambilizia ki palwakue Yehova Leeza? Kunti nalibombia siani mu buikazi bwane? Kunti nabombia siani eezi milongo eevi nkwasieko bange?’

3. Kunti wapata siani musita wa kusoma Bibilia?

Eba, uli waandua kupata musita wa kusoma Bibilia? Ni bengi pakati keetu, bali ni bwenka bobo buavia. Ezia ‘kubombia buino musita onse uuli nao.’ (Baefeso 5:16) Kunti wakita evio kupitila kutenga musita umanikile buino wa kusoma Bibilia kila busiku. Bange bantu, basaakuile kusoma Bibilia paakili lukele-keele. Bange basaakuile kusoma musita wa kyungulo. Inzi, ni bange bali basoma Bibilia busiku ntaanzi ya kuya kulaala. Pa lobe, wamona nangue ni musita ki wa kusoma ufuaniine kuli weewe?

TUKEBE SAANA

Tumone vya kukita eevi musita obe wa kusoma Bibilia uye wakilile kusaansamusia. Tumone vya kwiteania buino eevi lisambililo lyobe lya Bibilia likukwasie saana.

Nga eveliasie vituli twaibeelezia kutona byakulia bipusene-puseene, kunti twasekelela kusoma Bibilia

4. Mona vya kukita eevi usekelele kusoma Bibilia

Paange tekia kyaleengele kutendeka kusoma Bibilia. Anzia evio kunti ‘twaaluka ni kyaka ao nkulu’ ya kusoma Bibilia, nga eveliasie muntu vyali wakuzia nkulu ya kutompa kyakulia kya leenu. Some 1 Petro 2:2, (NWT), kisia londoluele keeki kiipuzio:

Watontonkania nangue kine watendeka kusoma Bibilia kila busiku, kusoma kuli kwaluka kintu keelia kiuli kusekelela ni kutwalilila kukita evio?

Mone VIIDEO eevi mumone bantu bange vibaatendekele kusekelela kusoma Bibilia. Kisia londoluele beebi biipuzio.

VIIDEO: Balumendo ni Bakaziana Baibelezia Kutona Mulandu Wakue Leeza (5:33)

Baaba balumendo ni bakaziana bali mu eezi viideo, baali ni maavia ki abaaluisiizie?
Ni kiki kyaabakwasiizie batwalilile ni mipaango yabo ya kusoma Bibilia?
Baakitile siani eevi ntantiko yabo ya kusoma Bibilia iye yakilile kusaansamusia?

Masoke a kukukwasia eevi utendeke:

Saakula mpilibulo ili buino, ili yabombia lulimi lwa enu nsiku. Ezianke kusoma Biblia—Tafsiri ya Ulimwengu Mupya ao mpilibulo ya mu lulimi lunge luumanine buino.
Tendekanke kusoma seemu elia iwamona nangue ili kukusaansamusia saana. Bombia seemu ilandile “Soma Bibilia Kila Busiku.”
Biikapo kalangi pa fuasi iwasomanga. Bombia seemu ilandile “Busomi Bobe bwa Bibilia” ili mu keenu kitabu.
Bombia aplikasio ya JW Library^®. Kupitila ezio aplikasio, kunti wasoma Bibilia ao kutuilizia ma odio mu lulimi luuli waunvua buino. Kine uli wabombia tablete, telefone ao kiombo sie kinge kya kielektronike, kunti wasoma Bibilia ao kutuilizia azo ma odio ku fuasi yonse kuuli kusaangua.
Bombia ma apandise ali mu Biblia—Tafsiri ya Ulimwengu Mupya. Mu azo ma apandise, muli ma karte, bisiko bya kulangilila, ni mana ya milandu ya mu Bibilia. Bebio bintu, bili kukukwasia usekelele saana kusoma.

5. Teania beelia bimwakaba kusambilila pamo ni mwalimu obe

Some Malumbo 119:34, kisia londoluele keeki kiipuzio:

Juu ya ki kiweeme kupepa ntaanzi ya kusoma ao kuteania beelia bimwakaba kusambilila pamo ni mwalimu obe?

Kunti wakita siani eevi kila seemu ya lisomo ikukwasie? Musita luuli mukuteania lisomo limo lya mu keenu kitabu, ezianke kukita eevi:

Soma seemu ya kuanza ya leelio lisomo.
Mona bintu bikata bilimo ni kusoma maleembo, kisia ezia kunvua viapateene ni lyasi.
Sika pa milandu ikata ao misemua yaasukile kila kiipuzio; kukita evio kwakaba kukukwasia musita umwakaba kuya mwasambilila pamo ni mwalimu obe.

Eba, wakiba wamanine?

Fwefue Bakasininkizia Bakue Yehova tuli twabombia mpilibulo paleepale ya Bibilia. Anzia evio, tuli twatona saana Biblia—Tafsiri ya Ulimwengu Mupya paantu ni ya kisinka, ileengele kunvuika kabili ili yabombia liina lyakue Leeza.—Mona lyasi lili mu Kitente kya Enternete lilandile eevi: “Eba, Bakasininkizia Bakue Yehova Bali ni Bibilia Yabo?”

BANGE BALI BALANDA: “Kusambilila Bibilia kukolele saana. Nsili na musita ao maka.”

Weewe uli wamona siani palua kusambilila Bibilia?

MU KIFUPI

Eevi lisambililo lya Bibilia likukwasie saana, paanga buino musita obe wa kusoma, pepa eevi unvue beelia biuli mukusoma, kabili teania beelia bimwakaba kusambilila.

Kunti waasuka siani?

Kunti wakita siani eevi Bibilia ikukwasie saana?
Kunti waiibiikila musita ki wa kusoma ni kukita lisambililo lya Bibilia lya pa bunke?
Juu ya ki kiweeme kuteania seemu elia imwakaba kusambilila pamo ni mwalimu obe?

Leeli lisomo twalipua pa nsiku:

Ezianke kukita eevi

Teania lisomo likoonkelepo wabombia masoke ali mu leeli lisomo.

Paangako ni kange:

Mupaango obe unge