LISOMO LYA 15
Yesu Naani?
Yesu ni umo pakati ka bantu bamanikile saana mu istoria. Kakiine, kukila pa kumana liina lyakue, bantu bengi te bamanine bintu bingi palwakue, kabili ni bange bali ni malanga apuseene palwakue Yesu kine naani kakiine. Bibilia ili yalanda ki palwakue?
1. Yesu naani?
Yesu ni mupasi ao malaika ekeele ku muulu wali ni maka. Weene waabumbilue kuli Yehova Leeza ntaanzi bintu byonse tebinabumbue. Ezio i nsaambu yalengia aye wakuutua “libeli likilile bilengua byonse.” (Bakolosai 1:15) Bibilia ili yamukuuta Yesu kuya wali “Muana wakue lyonga” paantu Yesu sie bunke i waabumbilue na Yehova muine. (Yoane 3:16) Yesu waabombele peepi saana ni Baba wakue, Yehova, wali mukumukwasia kubumba bintu binge byonse. (Some Tuswalo ni Mafunde 8:30.) Yesu atwaliliile kusekelela bukibuza bwa peepi pamo ni Yehova. Ali mukubomba mu kisinka wali mulanzi wakue Leeza, “Keebo,” paantu ali watuala mpunda ni malaizio akue Leeza ku bantu ni ba malaika.—Yoane 1:14.
2. Juu ya ki Yesu waaizile pa kyalo?
Tepasyapitile miaka elufu ibili (2 000) eevi, Yehova waakitile kimpezia maano. Waabombiizie mupasi utakatiifu eevi kwalula bukose bwakue Yesu chembe iniini saana ni kuikusiizia mu livumo lyakue mwanakazi asuungile kisungu ao bikira, abanga wakuutua Maria. Mu ezio nzila, Yesu waizile kuvyalua wali muntu. (Some Luka 1:34, 35.) Yesu waaizile pa kyalo eevi aaluke Masia ao Kristu waali walailue, kabili eevi apususie bantu. a Bukabika bonse buli mu Bibilia bulandiile palwakue Masia bwaafikiliziiziwe mu buikazi bwakue Yesu. Keekio kyaakwasiizie bantu benike nangue Yesu i “Kristu Mwina Leeza Mukose.”—Mateo 16:16.
3. Yesu ali ku pi leenu?
Kisia Yesu kufua, waatuntumwinue wali mupasi kabili waabuelele ku muulu. Kooko, ‘Leeza i kwaamukitile kuba mukulu kukila bintu byonse.’ (Bafilipi 2:9) Loonu, Yesu ni malaika ali ni maka saana, weenesie bunke i wa bubili kufuma pali Yehova.
TUKEBE SAANA
Tumone bintu bingi bilangiliile kine Yesu naani kakiine, kabili juu ya ki kusambilila palwakue ni kwa mana saana.
4. Yesu te Leeza Wamaka Onse
Bibilia ili yasambilizia nangue Yesu ni kibumbua kya kimupasi kili ku muulu, ali wamunakila Leeza kabili Baba wakue, Yehova. Juu ya ki twalanda evio? Mone VIIDEO eevi mumone bupusano buli pakati kakue Yesu ni Leeza wamaka onse.
Aza maleembo akoonkelepo, ali kutukwasia kumana bupusano buli pakati kakue Yehova ni Yesu. Some kila lileembo, kisia londoluele beebi biipuzio.
Some Luka 1:30-32.
-
Malaika waalandile ki kilangiliile nangue Yesu, apuseene ni Yehova Leeza, “Wapamuulu Saana”?
Some Mateo 3:16, 17.
-
Musita wa kubatiziiwa kwakue Yesu, leelia lizui lyaafumine ku muulu lyaalandile ki?
-
Watontonkania nangue leelio lizui lyaali lyakue ni?
Some Yoane 14:28.
-
Naani mukulu kabili ali ni buviinde bukata saana? Ni baba ao muana?
-
Yesu waakebele kulanda ki musita lwaamukuutile Yehova nangue Baba wakue?
Some Yoane 12:49.
-
Eba, Yesu ali watontonkania nangue weene pamo ni Baba wakue ni wenka olia muntu umo? Weewe, watontonkania siani?
5. Yesu waalangiliile nangue weene waali Masia
Mu Bibilia muli bukabika buingi bolia bwaakwasiizie bantu eevi bamuinike Masia, olia waasaakuilue na Leeza eze apususie bantu pa kyalo. Mone VIIDEO eevi mumane bukabika paleepale bwaafikiliziizie Yesu musita lwaaizile pa kyalo.
Some bobu bukabika, kisia londoluele beebi biipuzio:
Some Mika 5:2 eevi mumone kwali kwa kuiza kuvyalilua Yesu. b
-
Eba, kuvyalua kwakue Yesu kwaafikiliziizie bobo bukabika?—Mateo 2:1.
Some Malumbo 34:20 ni Isaya 53:5 eevi mumone beelia byalandile Bibilia ntaanzi palua kufua kwakue Masia.
-
Eba, bobo bukabika bwaafikiliziiziwe?—Yoane 19:33-37.
-
Eba, watontonkania nangue Yesu waalengiizie bobo bukabika bonse bukitike?
-
Keekio kyakusininkiziizia ki palwakue Yesu?
6. Kusambilila palwakue Yesu kuli kwatukwasia
Bibilia ili yalanda nangue ni kintu kya mana saana kusambilila palwakue Yesu kabili ni miilo ibaamulandile kuli Leeza akite. Some Yoane 14:6 ni 17:3, kisia londoluele keeki kiipuzio:
-
Juu ya ki kiweeme kusambilila palwakue Yesu?
Yesu waaizuile nzila ya kwaluka kibuza wakue Leeza. Waasambiliziizie kisinka palwakue Yehova, kabili kupitila Yesu, twakaba kupata bukose bwa loonse
BANGE BALI BALANDA: “Bakasininkizia Bakue Yehova bazumiine nangue Yesu ni Muana mwina Leeza. Tekikitika Leeza aye wali ni muana.”
-
Kunti waasuka siani?
MU KIFUPI
Yesu ni mupasi uli ni maka. Weene ni Muana mwina Leeza kabili i Masia.
Kunti waasuka siani?
-
Juu ya ki Yesu ali wakuutua “libeli likilile bilengua byonse”?
-
Ntaanzi ya kuiza pa kyalo, Yesu waali wakita ki?
-
Twamana siani nangue Yesu ni Masia?
MANAKO NI BINGE
Mona kine twamana siani nangue Yesu ni Masia.
Eba, Leeza waamuvyele Yesu nga eveliasie bantu vibali bavyala baana? Mona Bibilia viili yasambilizia.
“Juu ya ki Yesu Ali Wakuutua Muana Mwina Leeza?” (Lyasi lili mu Kitente kya Enternete)
Mona juu ya ki lisambilizio lya baleeza batatu te lipateene ni Bibilia.
“Eba, Yesu I Leeza?” (Lupungu Lwakue Kamwenenena, lwa 01/04/2009)
Soma umone buikazi bwakue mwanakazi umo vibwaalulukile kisia kutoosia beelia bili byalanda Bibilia palwakue Yesu.
a Mu lisomo lya 26 ni 27, twakaba kumona juu ya ki bantu bapalile kupususiiwa kabili kine Yesu ali watupususia siani.
b Mone Bulondolozi Bunge bwa 2 eevi mumane bukabika bwaalandile ntaanzi musita wine ubanga wa kuiza kwaluka Yesu Masia.
