LISOMO LYA 16
Yesu Waakitile ki Musita Lwabanga pa Kyalo?
Bantu bengi bamumanine Yesu, inzi bamo bamaninesie palua beelia byaakitikile lwabanga waali muana muniini. Bangeko bamumaninesie kuya wali kabika ali ni mulangue, ni bange bamaninesie palua kufua kwakue. Inzi, eba, kunti twamana bintu bingi palwakue Yesu kupitila kutoosia buikazi bwakue bwa pa kyalo? Mu leeli lisomo, tuli kumona bintu paleepale bya mana byaakitile Yesu, kabili kine kunti byakukwasia siani.
1. Yesu waali na miilo ki ya mana saana?
Miilo ya mana saana yakue Yesu yaali ‘kusimikila mpunda iweeme ya Bukolo Bwakue Leeza.’ (Some Luka 4:43.) Waasimikiile mpunda iweeme walanda nangue Leeza wakemika bukolo ao buteeko bolia bwakapuisia maavia onse a bantu. a Yesu waakitile miaka itatu ni nusu wali mukusimikila mpunda iweeme kwa mute saana.—Mateo 9:35.
2. Juu ya ki Yesu waakitile bimpezia maano?
Bibilia ili yalondolola “tupapo tonse ni bimpezia maano byaakitile Leeza kupitila muli weene [Yesu].” (Miilo ya Batumua 2:22) Kupitila maka akue Leeza, Yesu waatalaziizie mwela ukata, waalisiizie ma elufu a bantu, waakosiizie baluele, kabili waatuntumwine ni bafuile. (Mateo 8:23-27; 14:15-21; Marko 6:56; Luka 7:11-17) Bimpezia maano byaakitile Yesu, byaalangiliile nangue abanga watuminue na Leeza. Kabili byaalangiliile nangue, Yehova ali ni buviinde bwa kupuisia maavia onse.
3. Buikazi bwakue Yesu bwatusambilizia ki?
Yesu waamunakiile Yehova mu aali yonse. (Some Yoane 8:29.) Yesu waakitile kila kintu kibamulandile kuli Baba wakue akite. Waakitile evio mu buikazi bwakue bonse bwa pa kyalo, anzia kine bantu bengi baeziizie kumukaania. Waalangiliile nangue kunti kyakitika bantu bamubombele Leeza anzia kine bali mu aali ikolele. Kakiine, Yesu waatusiliile ‘kilangililo, eevi [tuye] twakoonkele mwali wapita.’—1 Petro 2:21.
TUKEBE SAANA
Tumone Yesu vyaababuilile bantu mpunda iweeme ni kukita bimpezia maano.
4. Yesu waasimikiile mpunda iweeme
Yesu waakitile ma kilometre engi wali mukwenda mu misebo ilimo lufunko, wali mukusimikila mpunda iweeme ku bantu bengi babanga wasaanga. Some Luka 8:1, kisia londoluele beebi biipuzio:
-
Eba, Yesu waali wasimikilasie bantu baalia babanga bakolongheene eevi kumutuilizia?
-
Yesu waakitile siani maka eevi kubapata bantu?
Leeza waalandile ntaanzi nangue Masia wakasimikila mpunda iweeme. Some Isaya 61:1, 2, kisia londoluele beebi biipuzio:
-
Yesu waafikiliziizie siani bobu bukabika?
-
Eba, watontonkania nangue ni leenu bantu bakabiile kutuilizia eezi mpunda iweeme?
5. Yesu waasambiliziizie bisinka bya mana
Kukila pa kusambilizia mpunda iweeme ya Bukolo Bwakue Leeza, Yesu waasambiliziizie masomo ali akwasia. Mona mifuano iniini ifumine mu Masambilizio akue a ku Lupili amanikile saana. Some Mateo 6:14, 34 ni 7:12, kisia londoluele beebi biipuzio:
-
Mu eezi milongo, Yesu waaleetele masoke ki ali akwasia?
-
Eba, watontonkania nangue azo masoke kunti akwasia bantu leenu?
6. Yesu waakitile bimpezia maano
Yehova waamupeele Yesu maka a kukita bimpezia maano bingi. Eevi mumone mufuano umo, some Marko 5:25-34 ao mone VIIDEO. Kisia londoluele beebi biipuzio.
-
Mu eezi viideo, mwanakazi abanga wazumiine ki?
-
Ni kiki kyakusaansamusia palua keeki kimpezia maano?
Some Yoane 5:36, kisia londoluele keeki kiipuzio:
-
Bimpezia maano byaakitile Yesu ‘bili byasininkizia’ ki ao byalangilila ki palwakue?
Eba, wakiba wamanine?
Mpunda ingi ilandile palwakue Yesu, ileembelue mu bitabu bina bili mu Bibilia bili byakuutua Nsimiko, i kulanda Mateo, Marko, Luka, ni Yoane. Kila kaleemba wa Nsimiko, waabiikilemo mpunda palwakue Yesu yapuseene ni elia yaabiikilemo unge. Kine twasoma beebi bitabu byonse bina, tuli kupata mpunda ya kusaansamusia palua buikazi bwakue.
-
MATEO
i waatendekele kuleemba Nsimiko yakue. Kitabu kya Mateo, kili kyatubuila saana bintu byaasambiliziizie Yesu palua Bukolo Bwakue Leeza.
-
MARKO
waaleembele Nsimiko ifupi saana. Ili yatubuila bintu bingi byaakitikile bya kusaansamusia.
-
LUKA
watubuila lipepo vilibanga lyali lya mana saana kuli Yesu, ni vyaali wabakitila banakazi.
-
YOANE
watubuila saana mibeele yakue Yesu, paantu waaleembele maasi engi abanga alanda Yesu pamo ni babibuza bakue ni bantu bange.
BANGE BALI BALANDA: “Yesu i Leeza Wamaka Onse.”
-
Weewe uli watontonkania siani?
MU KIFUPI
Yesu waasimikiile palua Bukolo Bwakue Leeza, waakitile bimpezia maano, kabili waamunakiile Yehova mu kila aali.
Kunti waasuka siani?
-
Yesu waali na miilo ki ya mana saana musita lwabanga pa kyalo?
-
Bimpezia maano byaakitile Yesu, byasininkizia ki?
-
Yesu waasambiliziizie masomo ki ali akwasia?
MANAKO NI BINGE
Yesu waali walandila saana palua ki?
“Bukolo Bwakue Leeza Buli na Mana ki Kuli Yesu?” (Lupungu Lwakue Kamwenenena, lwa 01/10/2014)
Mona juu ya ki kunti twazumina nangue bimpezia maano byakue Yesu byaakitikile kakiine.
“Bimpezia Maano Byakue Yesu Kunti Byakusambilizia ki?” (Lupungu Lwakue Kamwenenena, lwa 15/07/2004)
Soma umone mwalalume umo vyaaluluile buikazi bwakue musita lwaamanine Yesu vyaali wabakitila bantu bange.
“Naali Naiimwene Saana mu Buikazi Bwane” (Lupungu Lwakue Kamwenenena, lwa 01/10/2014)
Mona bintu bikata byaakitikile mu miilo yakue Yesu ya kusimikila, byakoonkeene nga mubibanga byakitikila.
a Mu lisomo lya 31 mpaka lya 33, twakaba kulondoluela saana palua Bukolo Bwakue Leeza.
