LISOMO LYA 17

Yesu Ali ni Mibeele ki?

PLAY

Musita utuli twasambilila bintu byaalandile ni kukita Yesu lwabanga pa kyalo, tuli twavumbula mibeele iweeme ili kutulengia tutone kwaluka babibuza bakue Yesu ni Yehova. Eba, ni mibeele ki paleepale ezio iweeme? Kabili kunti twamupala siani Yesu mu buikazi bwetu?

1. Yesu ali nga Baba wakue mu nzila ki?

Yesu waapuile ma milioni engi saana a miaka wali ku muulu. Mu ozo musita, abanga wamumona baba wakue wa ntono ni kusambilila kuli weene. Pakaako, ali watontonkania, ali waiunvua, kabili ali wakitasie nga Baba wakue. (Some Yoane 5:19.) Kakiine, Yesu waalangiliile mu kupuililika mibeele yakue Baba wakue. I kyalengele alande nangue: “Olia wamona neene, wamumona ni Baba.” (Yoane 14:9, NWT) Kine wasambilila palua mibeele yakue Yesu, wakaba kumumana buino Yehova. Kwa mufuano, mibeele yakue Yesu ya kwemena bantu, yalangilila Yehova vyali waiunvua pa lobe.

2. Yesu waalangiliile siani nangue amutonene Yehova?

Yesu waalandile: ‘Eevi bekala kyalo bamane nangue neene mutonene Tawe ao Baba, kabili ndi nakita munaalailue na Tawe.’ (Yoane 14:31) Lwabanga pa kyalo, Yesu waalangiliile ntono ikata kuli Baba wakue kupitila kumunakila anzia kine kyali kyakolele kukita evio. Kabili paantu waali wamutonene saana Baba wakue, lyonse waali watonene kulandila palwakue ni kubakwasia bantu bange bakuzie bukibuza bwa peepi pamo Nakue.—Yoane 14:23.

3. Yesu waalangiliile siani nangue atonene bantu?

Bibilia ili yalanda nangue Yesu ‘atonene saana bantu.’ (Tuswalo ni Mafunde 8:31, bulondolozi bwa pensina) Waalangiliile ntono yakue kupitila kukoselezia ni kukwasia bantu mukwitonena. Waakitile bimpezia maano bisyaalangiliilesie maka akue, inzi byaalangiliile kabili nkumbu yakue. (Marko 1:40-42) Waakitiile bantu bonse mu buwaame kabili bila bukapatulula. Milandu yakue yaakoseleziizie ni kubapeela kiswapilo baalia bonse baali ni mitima ipalile, baalia baali bamutuilizia. Yesu waali waiteaniiziesie kusaanzua ni kufua paantu waali wabatonene bantu bonse. Inzi, atonene saana baalia bali bakoonka masambilizio akue.—Some Yoane 15:13, 14.

TUKEBE SAANA

Tumane bingi palua mibeele yakue Yesu. Kabili, tumone vya kulangilila ntono ni mibeele ya kupeelana nga vyabanga wakita.

4. Yesu amutonene Baba wakue

Mufuano wakue Yesu, watusambilizia vya kulangilila nangue tumutonene Leeza. Some Luka 6:12 ni Yoane 15:10; 17:26. Kisia kusoma kila lileembo, londoluele keeki kiipuzio:

Kunti twamupala siani Yesu, ni kulangilila nangue tumutonene Yehova?

Yesu waali wamutonene Baba wakue wa ku muulu kabili waali walanda nakue lyonse mu lipepo

5. Yesu ali waemena bantu babuliilue

Yesu waali waemena saana bantu bange kukila vyabanga waiemena ye muine. Atasie musita lwaali watopele, waabombiizie musita ni maka akue eevi kukwasia bantu. Some Marko 6:30-44, kisia londoluele beebi biipuzio:

Mu leeli lyasi, Yesu waalangiliile mu nzila ki paleepale nangue waali wapoozeleko maano ku bantu bange?—Mona mulongo wa 31, 34, 41, ni wa 42.
Ni kiki kyaali kyamusonsezia Yesu akwasie bantu?—Mona mulongo wa 34.
Paantu Yesu waalangiliile mibeele yakue Yehova, ezio mibeele yonse yakusambilizia ki palwakue Yehova?
Ni nzila ki inge paleepale yakue Yesu ya kwemena bange ituli kuviinda kupala?

6. Yesu ali ni mibeele ya kupeelana

Yesu waali ni mibeele ya kupeelana anzia kine tabanga wakwete bintu bingi bya kimubili, kabili watukoselezia tuye twali ni mibeele ya kupeelana. Some Miilo ya Batumua 20:35, kisia londoluele keeki kiipuzio:

Kukoonkana ni milandu yakue Yesu, kunti twaaluka siani ni nsaansa?

Mone VIIDEO, kisia londoluele keeki kiipuzio.

VIIDEO: “Mu Kupeelana Muli Nsaansa Ingi”—Seemu (4:00)

Ni mu nzila ki paleepale mutuli kulangilila nangue tuli twapeelana anzia kine te tukwete bintu bingi bya kimubili?

Eba, wakiba wamanine?

Bibilia ili yatusambilizia kupepa kuli Yehova kupitila mu liina lyakue Yesu. (Some Yoane 16:23, 24.) Lutuli twapepa mu ezio nzila, tuli twalangilila nangue tuli twatasia palua beelia byaakitile Yesu pa kutukwasia twaluke babibuza bakue Yehova.

BANGE BALI BALANDA: “Leeza i waatengele mbeela aza maavia ali mukusaakaana na bantu.”