LISOMO LYA 21
Mpunda Iweeme Ili Mukusimikilua Siani?
Leenusie, Yehova wakaba kufumiapo maavia etu onse, kupitila Bukolo bwakue. Ezio mpunda iweeme saana ni kila muntu apalile kuimana. Yesu waatonene basambi bakue babuileko kila muntu eezi mpunda iweeme! (Mateo 28:19, 20) Bakasininkizia Bakue Yehova bali baitabizia siani azo malaizio akue Yesu?
1. Lileembo lya Mateo 24:14 lili mukufikiliziiwa siani leenu?
Yesu waalandile ntaanzi nangue: ‘Eezi mpunda iweeme ya Bukolo, yaakasimikilwanke mu kyalo kyonse.’ (Mateo 24:14) Bakasininkizia Bakue Yehova bali batona kubomba eezi miilo ya mana. Tuli twasimikila mpunda iweeme mu kyalo kyonse mu ndimi ikilile pa elufu imo (1 000)! Eezi miilo, ikata saana. Iloombele musita ni maka kabili ipalile yapaangilue buino. Teiviinda kubombua bila kukwasiiwa na Yehova.
2. Tuli twaikwinda siani eevi kusimikila bantu?
Tuli twasimikila mu fuasi yonse mutuli twasaanga bantu. Nga vibanga vyasimikila Bakristu ba mu miaka mia (100) ya ku ntendeko, ni fwefue tuli twasimikila “nsesi kwa nsesi.” (Miilo ya Batumua 5:42, NWT) Bobu bufundi, buli bwatukwasia kusimikila ma milioni a bantu kila muaka. Paantu lyonse tetwizi kusaanga bantu ku masesi abo, tuli twasimikila ni mu ma fuasi ali asaanguamo bantu bengi. Lyonse, tuli twakebako fuasi ya kubabuilako bange palwakue Yehova ni mipaango yakue.
3. Naani apalile kusimikila eezi mpunda iweeme?
Bakristu bonse ba kisinka, bapalile kubabuilako bange mpunda iweeme. Tutweme eezi miilo yeetu twafiniizie. Tuli twaikwinda kubasimikila bantu kukoonkana ni buviinde bwetu, paantu twinikile nangue ezio mpunda kunti yapususia bukose bwa bantu. (Some 1 Timoteo 4:16.) Tetwizi kulipua juu ya kusimikila, paantu Bibilia ili yalanda nangue: ‘Mwaapeeluesie, ni mwe paanesie.’ (Mateo 10:7, 8) Te kila muntu ali waitabila mpunda yeetu. Inzi, tutwaliliile kusimikila paantu twinikile nangue lutuli twakita ezio miilo, tuli twamunakila Yehova ni kumusaansamusia.
TUKEBE SAANA
Tumone fwefue Bakasininkizia Bakue Yehova vituli twaikwinda kusimikila mu kyalo kyonse, kabili tumone Yehova vyali watukwasia.
Kusimikila mwaya kyalo: (A) Kosta Rika, (B) États-Unis, (C) Benin, (D) Tailandi, (E) Yap, (F) Suède
4. Tuli twakita maka eevi tubasimikile bantu bonse
Bakasininkizia Bakue Yehova bali bakita maka mu nzila iibeleele eevi kusimikila mpunda iweeme ku bantu fuasi yonse. Mone VIIDEO, kisia londoluele keeki kiipuzio.
-
Bakasininkizia Bakue Yehova bali bakita maka eevi kusimikila. Ni kiki kyakupapiapo saana weewe palua kwikwinda kwabo?
Some Mateo 22:39 ni Baroma 10:13-15, kisia londoluele beebi biipuzio:
-
Miilo yeetu ya kusimikila, yalangilila siani nangue tubatonene bantu bange?
-
Yehova ali waiunvua siani palua baalia bonse bali basimikila mpunda iweeme?—Mona mulongo wa 15.
5. Tuli twabomba pamo ni Leeza
Kuli bintu bingi bituli twaimwena bilangiliile nangue Yehova i ali watungulula miilo yeetu. Kwa mufuano, busiku bumo kisia midi, musita lupua Paul lwabanga wasimikila nsesi kwa nsesi mu kyalo kya Nouvelle-Zélande, waasaakeene ni mwanakazi umo. Bobo bwenka busiku lukele-keele, ozo mwanakazi waali wapepa kuli Leeza, wazimbula liina lyakue Leeza, Yehova, wamuloomba amutumine muntu aye amukwasie kumumana Leeza. Paul walanda eevi: “Kisiasie nsa itatu, naafikile ku nsesi yakue.”
Some 1 Bakorinto 3:9, kisia londoluele keeki kiipuzio:
-
Bintu bituli twaimwena nga beebi byaakitikile mu Nouvelle-Zélande, byalangilila siani nangue Yehova i ali watungulula miilo ya kusimikila?
Some Miilo ya Batumua 1:8, (NWT), kisia londoluele keeki kiipuzio:
-
Juu ya ki tupalile kukwasiiwa na Yehova eevi tufikilizie miilo yeetu ya kusimikila?
Eba, wakiba wamanine?
Kila mulungu, ku kulonghaana kwa mu katikati ka mulungu, tuli twabeeleziiwa vya kusimikila. Kine waileko kale ku kooko kulonghaana, waamwene siani palua kooko kubeeleziiwa?
6. Tuli twanakila malaizio akue Leeza a kusimikila
Mu miaka mia (100) ya ku ntendeko, baluani baeziizie kubalekezia basambi bakue Yesu kusimikila. Bakristu ba ku ntendeko, baalandiileko ku nsaambu yabo ya kusimikila kupitila “kusakila mpunda iweeme ni kuikita itabilue kukoonkana ni mizilo.” (Bafilipi 1:7, NWT) Ni enu nsiku, Bakasininkizia Bakue Yehova i vibali bakita. a
Some Miilo ya Batumua 5:27-29, 31, 33-42, kisia londoluele keeki kiipuzio:
-
Juu ya ki tetukaba kulekela kusimikila?—Mona mulongo wa 29, 38, ni 39.
UNGE KUNTI WAIPUZIA: “Juu ya ki Bakasininkizia Bakue Yehova bali basimikila nsesi kwa nsesi?”
-
Kunti wamwasuka siani?
MU KIFUPI
Yesu waabalaiziizie basambi bakue basimikile mpunda iweeme ku bantu ba ntundu yonse. Yehova ali mukubakwasia bantu bakue bakite ezio miilo.
Kunti waasuka siani?
-
Mpunda iweeme ili mukusimikilua siani mu kyalo kyonse?
-
Miilo yeetu ya kusimikila ili yalangilila nangue tutonene bekazi neetu. Mu nzila ki?
-
Watontonkania nangue eezi miilo ya kusimikila kunti yatuleetela nsaansa? Juu ya ki?
MANAKO NI BINGE
Mona Bakasininkizia Bakue Yehova vibali basimikila bantu mu mizi ikata.
Kusimikila Kwibeleele kwa pa Fuasi ya Bantu Bengi mu Muzi wa Paris (5:11)
Bakasininkizia Bakue Yehova bali bakita siani eevi kubakwasia bambutusi ao bakimbizi?
Unvua muntu umo ali mukulondolola juu ya ki mu buikazi bwakue kupisia musita wali mukusimikila kwaamuleteele nsaansa.
Mona bupinguzi paleepale bwa mana bwaakwetue na tribinali bwaalengiizie kiye kyaleengele kutwalilila kusimikila mpunda iweeme.
“Bakasimika ba Bukolo Baisampulula ku Tribinali” (Bukolo Bwakue Leeza Buli Mukuteeka!, lyasi lya 13)
a Leeza i atupeele nsaambu ya kusimikila. Pakaako, fwefue Bakasininkizia Bakue Yehova tetwizi kupembelela mpaka bakulu ba buteeko batupeele nsaambu i kusiali tusimikile.
