LISOMO LYA 22
Kunti Wakita Siani Eevi Usimikile Mpunda Iweeme?
Musita luuli mukuya wasambilila bisinka bili mu Bibilia, kunti walanda eevi: ‘Kakiine, kila muntu apalile kumana eezi mpunda!’ Kulanda kisinka, kila muntu apalile kuimana! Inzi, kunti waunvua mwenzo wa kubabuilako bange beelia biuli mukusambilila. Tulondoluele bintu bya kunti ukite eevi kuluisia mwenzo kabili utendeke kusaansamukila kusimikilako bange mpunda iweeme ili mu Bibilia.
1. Kunti wababuilako siani bange bantu baumanine beelia biuli mukusambilila?
Basambi bakue Yesu baalandile eevi: ‘Tetuviinda kulekela kulanda pa bintu bitwaimweneene ni kwiunvuila.’ (Miilo ya Batumua 4:20) Baatonene saana masambilizio akue Yesu. Pakaako, baatonene kubuilako kila muntu beelia bibaasambiliziiziwe. Eba, ni weewe uli waiunvua enka evio? Kine i viuli waiunvua, kebako fuasi ya kubabuilako bantu ba mu lupua lobe ao benoobe bintu biuli mukusambilila, inzi kita evio wali ni mukinzi.—Some Bakolosai 4:6.
Nzila paleepale ya kutendeka kusimikila
-
Kine uli mukulanda ni bantu ba mu lupua lobe, tendeka kulanda palua mpunda ili mu Bibilia walanda eevi: “Mu onu mulungu, nakisambilila kintu kimo eevi kyaweeme.”
-
Mubuileko mwinobe aluele ao ali mukwema, lileembo lya kumukoselezia.
-
Kine mubombi nobe wakwipuzia viwakipisia mulungu, mubuileko palua beelia biwakimana mu lisambililo lyobe lya Bibilia ao beelia biwakisambilila ku kulonghaana kwa mu kilonghaano.
-
Balangilileko benoobe kitente kya Enternete kya jw.org.
-
Kupako ni bange basaangueko ku lisambililo lyobe lya Bibilia, ao ubalangilile vya kuloomba lisambililo mu jw.org..
2. Juu ya ki wibiikileko ni mupaango wa kusimikila pamo ni kilonghaano?
Basambi bakue Yesu baakitile bintu bingi kukila pa kubabuilako mpunda iweeme bantu babaali bamanine. Yesu ‘waabatumine kuya babili-babili kuti bamutangilile ku mizi ni konse kwali waumiine kuya’ kusimikila. (Luka 10:1) Ozo mupaango, waabapeele bantu bengi saana lisyuko lya kunvua mpunda iweeme. Kabili, kusimikila bali pamo, kwaabaleteele basambi nsaansa ikata. (Luka 10:17) Eba, ni weewe kunti waibiikila mupaango wa kusimikila pamo ni kilonghaano?
TUKEBE SAANA
Tumone bintu biuli kukita eevi te kuti uye wali saana ni mwenzo, kabili eevi waaluke ni nsaansa elia ili yafuma mu kusimikila mpunda iweeme.
3. Yehova wakaba kukukwasia
Bantu bange kunti baya batonene kusimikila. Inzi, kunti baunvua mwenzo wa kukentua na bange ao palua bintu bibali kubakitila.
-
Eba, uli waunvua mwenzo wa kubabuilako bange beelia biuli mukusambilila? Juu ya ki walanda evio?
Mone VIIDEO, kisia londoluele keeki kiipuzio.
-
Baaba bamisepuka, baakitile siani eevi kuluisia mwenzo wabo?
Some Isaya 41:10, kisia londoluele keeki kiipuzio:
-
Kine waunvua mwenzo wa kusimikila, juu ya ki upalile kupepa?
Eba, wakiba wamanine?
Ku ntendeko, Bakasininkizia Bakue Yehova bengi, baali batontonkania nangue te bakaviinda ata kaniini kubabuilako bange mpunda iweeme. Kwa mufuano, Sergey, waali waimwene kuya wali muntu wa bule, kabili waali wamwene kyakolele kubabuilako bange. Inzi, kisia paapo, waasambiliile Bibilia. Walanda eevi: “Anzia mwenzo unaali nao, naatendekele kubabuilako bange beelia binaali nasambilila. Kintu kyakupapia saana, kubabuilako bange palua Bibilia, kakiine kwakimpeela saana bukisinka. Kabili kubabuilako bange bintu binzumiine kuli kwakosia kiketekelo kyane.”
4. Uye wali ni mukinzi
Ntaanzi ya kumusimikila muntu, tontonkania palua keelia kiukebele kulanda, kabili ni vya kulanda ezio mpunda wali ni mukinzi. Some 2 Timoteo 2:24 ni 1 Petro 3:15, kisia londoluele beebi biipuzio:
-
Kunti wabombia siani eezi milongo musita luuli mukulanda ni bange palua Bibilia?
-
Bantu bange ba mu lupua ao babibuza, paange tebaviinda kukwitabizia. Kunti wakita siani? Ni kiki kiusipalile kukita?
-
Juu ya ki kili buino kulondolola nabo wali ni mukinzi kuliko kubapatikizia wababuila beelia bibapalile kuzumina?
5. Kusimikila mpunda iweeme kuli kwaleeta nsaansa
Yehova, waamupeele Yesu miilo ya kusimikila mpunda iweeme. Yesu waali wamwene siani ezio miilo? Some Yoane 4:34, kisia londoluele beebi biipuzio:
-
Kulia kyakulia kiweeme, kuli kwakwasia bukose bwetu ni kutupeela nsaansa. Juu ya ki Yesu waalandile nangue kukita beelia bitonene Leeza, kwa mufuano kusimikila, kuli nga evelia kulia kyakulia?
-
Weewe, watontonkania nangue kusimikila kunti kwakuleetela nsaansa ya siani?
Masoke
-
Musita wa kulonghaana kwa mu katikati ka mulungu, kebamo nzila elia ili kukukwasia kutendekezia bulondolozi.
-
Landa pamo ni mwalimu obe akubuile vya kwaluka musambi, eevi ni weewe, utendeke kupeelua biputulua ku kulonghaana kwa mu katikati ka mulungu. Bebio biputulua, byakaba kukukwasia ukabe kuya waiteaniizie saana kubabuilako bange beelia biuli mukusambilila.
-
Bombia seemu ilandile “Bange Bali Balanda” ao “Unge Kunti Waipuzia” ili mu leeli lisomo eevi witeanie vya kwasuka baalia bali balanda bya kukupinga ao vya kwasuka biipuzio bili byaipuziiwa na bantu bengi.
UNGE KUNTI WAIPUZIA: “Watuleetela mpunda ki?”
-
Kunti wabombia siani eezi fuasi eevi kumubuilako muntu palua beelia biuli wasambilila mu lisambililo lyobe lya Bibilia?
MU KIFUPI
Kubabuilako bange mpunda iweeme kuli kwaleeta nsaansa, kabili kunti kwaya kwaleengele saana kupita evelia viuli watontonkania.
Kunti waasuka siani?
-
Ni kiki kili kukulengia ubabuileko bange mpunda iweeme?
-
Kunti walangilila siani mukinzi pa kubasimikila?
-
Kine uli ni mwenzo wa kusimikila, kunti wakita siani eevi kuuluisia?
MANAKO NI BINGE
Mona mifuano ina ileengele iuli kuviinda kubombia eevi kubabuilako bange mpunda iweeme kupitila karte ya jw.org.
Mona mibeele ina elia ili kukukwasia eevi ubabuileko bange mpunda iweeme.
“Eba, Witeaniizie Eevi Kwaluka Mulobi wa Bantu?” (Lupungu Lwakue Kamwenenena, lwa Muezi wa 09, 2020)
Mona mufuano uli mu Bibilia viuli kuviinda kukukwasia kubabuilako bange mpunda iweeme, anzia kine uli mwanike ao musepuka.
Mona viuli kuviinda kulanda palua Bibilia ni bantu ba mu lupua lobe baalia basinasambilile palwakue Yehova.
“Vya Kukumia Mutima wa Bantu ba mu Lupua Basizumiine”(Lupungu Lwakue Kamwenenena, lwa 15/03/2014)
